Patro Aësde Mechele
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Mechels (Belsj Limburg), es te dit dialek sjpriks.
![](http://upload.wikimedia.org/wikipedia/commons/thumb/1/1d/Patro_Eisden_Maasmechelen_17-7-2013_18-26-10.jpg/220px-Patro_Eisden_Maasmechelen_17-7-2013_18-26-10.jpg)
Patro Aësde Mechele (Nederlands: Patro Eisden Maasmechelen) is 'n voetbalclub oet Belsj Limburg gevesteg in Aësde, bij Mechele. De club woort opgeriech in 1942 esVV Patro Eisden en heet es stamnómmer 3434. In 't sezoen 2014/15 späölt de club in de Twiede Klas.
Historie
[bewirk | brón bewèrke]Patro woort in 1942 opgeriech door keplaon Van Schoenebeek; de naom verraojt de kathelieke herkoms vaan de club (patronaot). Bij de hervörming vaan 't voetbal in 1952 góng de club nao de Daarde Klas; in 1956 promoveerde ze nao de Twiede en in 1960 zelfs nao de Ierste. Dao kós Patro ziech evels neet hawwe.
Vaanaof de jaore 1970 begós de club weer te kwakkele; ze späölde e groet deil vaan d'n tied in de Daarde Klas. In 1981 woort ze zelfs nao de Veerde trökgezat um competitiefraude, al lökden 't nao ei jaor weer te promovere. De res vaan de jaore 1980 verlepe beter; in 1984 kaom de club trök in de Twiede en in 1988 haolde ze de kwartfinaal vaan de Beker vaan 't Belsj.
In 1992 woort de club bij 't vieftegjaoreg bestoon 't predikaot keuninklek verliend, zoetot ze wijer góng es K. Patro Aësde, meh datzelfde jaor degradeerde ze ouch. Trainer Lei Clijsters, dee vreuger es es speuler bij Patro had gespäöld, brach de club wel e jaor nao de Twiede trök. In 1998 en 2001 volge nog twie naomsveranderinge: iers nao K. Maasland Mechele, daan trök nao K. Patro Mechele (in 'n poging ouch supporters vaan boete Aësde te binde).
De club waor in dees jaore 'ne liegvleger in de Twiede Klas en degradeerde in 't sezoen 2004/05 (wie René Trost trainer waor). Es straof veur organisatorisch wanbeleid woort de club nog wijer trökgezat en mós ze in de Veerde goon speule. In 2005 woort wijer d'n dörpsnaom Aësde trök in de naom gezat. De sportief instorting waor neet direk opgelos en Patro mós nog e paar sezoene in de Veerde blieve speule. In 2011 lökden 't daan toch veur direk te promovere. In 2014 woort zelfs weer nao de Twiede Klas gepromoveerd, oonder Eric Eurlings.
Stadion
[bewirk | brón bewèrke]Sinds 2002 späölt de club in 't Patrostadion, tegeneuver d'n awwe kojl vaan Aësde.
Bron
[bewirk | brón bewèrke]Dit artikel is gebaseerd op, meh neet vertaold oet, 't corresponderend Nederlandstaoleg artikel.