Kapitalisme

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

---

't Kapitalisme is 'n economisch systeem det is gegróndj op investeringe van geldj mitte verwachting veur wins te make. De productiemiddele zeen meistes in privaat eigendóm van 'ne producent dae daobie väölal gebroekmaak van loeanarbeid veur mieëwaerd te creëre. Geldj en kapitaalaccumulatie höbbe hiebie de primair rol euvergenómme vanne beheufdjebevraejiging in 't economisch procès.

Ouchal is 't neet aanwaezig in eder vorm van kapitalisme, de vriej mert wuuertj ouch väöl gezeen es e wichtig kènmirk. Dore oetereinloupendje ideeje die, döks langs ideologische liene, innen tied zeen óntwikkeldj euver waatdet 't kapitalisme inhèltj, zeen dees kènmirken aevel ómstreje.

Kapitalisme haet wie väöl anger begrippen 'n óntwikkeling doorgemaak, wobie Werner Sombart óngersjied maakdje tössen 't vreugkapitalisme vanaaf helverwaenge d'n dertieëndjen ieëf toet helverwaenge d'n achtieëndjen ieëf; 't hoeagkapitalisme löp van óngevieër 1750 toet 1914 en 't hujig kapitalisme neump t'r 't laatkapitalisme.