Lanker
- Dit artikel is gesjreve in 't Mestreechs. Ómdat 't plaatsgebónge is, maogs doe 't ómzètte nao 't Lankers, es te dit dialek sjpriks.
Lanker (Nederlands Lanklaar) is e dörp in Belsj Limbörg en 'n deilgemeinte vaan Dilsen-Stokkem. 't Ligk in 't zuidweste vaan die gemeinte, zjus westelek vaan Stokkem en noordelek vaan Mechele. Lanker, wat tot 1971 'n apaarte gemeinte waor, had in 2006 4.388 inwoeners en mèt 15,84 km².
![](http://upload.wikimedia.org/wikipedia/commons/thumb/6/63/Lanklaar.jpg/220px-Lanklaar.jpg)
![](http://upload.wikimedia.org/wikipedia/commons/thumb/c/cf/Sint-Pauluskerk_Lanklaar_18-06-2018_10-55-19.jpg/220px-Sint-Pauluskerk_Lanklaar_18-06-2018_10-55-19.jpg)
Westelek vaan 't dörp löp de Zuid-Willemsvaort. Oonder Lanker vèlt ouch Mulhem zoewie de villawieke Groeëten Homo, Kleinen Homo en Nujen Homo, die westelek vaan d'n dörpskern en de vaort op de Mechelse Hei ligke.
Monuminte en aonzien
bewirk't Dörpsgeziech weurt gedomineerd door de 43 meter hoeg tuibrögk euver de Willemsvaort. De Sint-Pauluskèrk is vaan de groond aof gemete al-evel hoeger, meh de brögk begint al op diekniveau, wat e paar meter hoeger is es 't dörp. De kèrk kaom veerdeg in 1959 en is gebouwd in conservatieve stijl. 't Interieur umvat 'ne Romaonsen doupvoont en e barok Paulusbeeld. De kerk vervingk 'n awwer kèrk oet 1854, die nao de wijing vaan de nui kèrk woort aofgebroke. Daoveur waor Lanker gein parochie en gaof 't allein 'n kepel. Wijer vint me nog diverse kleinder momuminte in 't dörp, boe-oonder e brögkwachtershuiske, 'ne Verkierde Slivvenier (vaan oersprunkelek veer) en, op 't dörpsplein, 't standbeeld vaan 't Zavelknuiperke.
Historie
bewirkLanker woort al in 't neolithicum bewoend en laog vreuger aon de Romeinse heerbaon vaan Tóngere nao Nimwege. De Aw Baon in 't dörp volg dat trajek nog. In 1281 weurt 't dörp veur 't iers geneump, es Langlaer, wat moot weure verstande es 'laankgerèkde ope veld in 't bos'. Lanker veel toen oonder Mulhem, 'n situatie die ziech väöl later zouw umkiere. Kèrkelek en wereldlek veel Lanker iewelaank oonder Stokkem.
In 1809, in de Fransen tied, woort Lanker 'n apaarte gemeinte. Tösse 1812 en 1813 woort in de buurt ouch 'ne nuie steinweeg aongelag. 't Dörp begós gans te bleuje en woort in 1842 groet genóg bevoonde veur 'n eige parochie. Nog väöl sterker greujden 't wie kortbij, in Eisde, 'ne mijn opegóng. Vaanaof de jaore 1920 gónge hei väöl mijnwèrkers woene. Heibij greujde Mulhem ouch aon Lanker-dörp vas.
In 1970 woort de gemeinte opgeluf um same mèt Stokkem, Dilse, Roeëtem en Ieële tot de nui gemeinte Dilse-Stokkem te fusere.
Bron
bewirkDit artikel is gebaseerd op, meh neet vertaold oet, 't corresponderend Nederlandstaoleg artikel, en wel in dees versie.
Deilgemeintes, dörper en gehuchte: Dilse · Lanker · Ieële · Roeëtem · Stokkem |