Ornitorinco
![](http://upload.wikimedia.org/wikipedia/commons/thumb/e/e0/Wild_Platypus_4.jpg/220px-Wild_Platypus_4.jpg)
La ornitorinco (Ornithorhynchus anatinus), alga nomida la platipo, es un mamal semiacual oviparinte trovada en Australia este e Tasmania. Lo es la sola survivente de sua familia e jenera, an si alga spesies relatada apare en la arcivo de fosiles.
Con la cuatro spesies de ecidna, lo es un de la sinco spesies esistente de monotrematos, la sola mamales cual pone ovos en loca de pare enfantes vivente. Como otra monotrematos, la ornitorinco sensa sua preda tra eletroloca. Lo es ance un de la poca spesies de mamales cual es venenosa. La mas ave un speron a sua pede anterior cual produi un venena capas de causante dole sever a umanas.
La aspeta strana de est animal cual pone ovos, ave un beco simil a lo de un pato, un coda simil a lo de un castor, e pedes simil a los de un lutra ia confusa naturalistes european cuando los ia vide los per la prima ves, e la siensistes prima per esamina un corpo conservada ia judi ce lo ia es nonautentica, construida de alga animales variosa coseda con lunlotra.
La cualias unica de la ornitorinco ia resulta en lo deveni un sujeto importante en la studia de biolojia de evolui, e un simbol reconosable de Australia. Lo ia apare como un mascote a avenis nasional e es trovada sur la reversa de la moneta australian de 20 sentimes. Lo es ance la animal simbolin de la stato de New South Wales.
Asta la sentenio 20 temprana, umanas ia xasa la platipo per sua pelo, ma lo es aora protejeda tra sua tota estende. An si programes de eleva ensircada ia susede sola limitada, e la platipo es sin defende contra la efetos de contamina, lo no es su cualce menasa per aora.