Kurow

Kurów

Kurow (Kurów [ˈkuruf]) es un vileta en Polsca sude-este, entre Pulawy e Lublin, a la Rio Kurówka. Lo es la capital de un gmina (comunia legal) nomada Gmina Kurów, en la provinsia de Lublin. La vileta ave 2804 persones (en 2007).

Kurow ia es fundada en 1185. A alga tempo entre 1431 e 1442, on ia dona a la vileta la diretos de la site, diretos fundada en la Lege de Magdeburg. Como un vila privata, lo ia es la sentro per comersa de comedas de la area ambiente. Alga fabricerias de pelo e cuoro ia es ance ala. En la sententio 16, Kurow ia es un de la sentros de Calvinisme, car multe persones de la Frates Polsce veni de ala. A 1660, la plu de la abitantes ia converti a arianisme.

Pos 1660, la istoria de la vila ia es partida con la otra partes de la area. En 1795, pos la parti tre de Polsca, Kurow ia es ajuntada a Osteraic. En 1809, lo ia deveni un parte de la Duxia de Warsawa. En 1815, el deveni parte de la Renia de Polsca. En la Revolta de Novembre, un batalia minor, la Batalia de Kurow, aveni, en cual la militaria polsce su la comanda de Jeneral Józef Dwernicki ia defeta la armada rusce. En 1870, en la Revolta de Janero, la vila ia perde final se carta, ce lo no ia retrae. De 1918, Kurow ia deveni denova un parte de Polsca.

A 9 setembre 1939, en la Gera de Defende de Polsca, cual es la nom en Polsca per la comensa de Gera Mundal 2, la vila ia es bombada multe par la Luftwaffe de Deutxland. Entre la ojetos destruida ia es un ospital nonmilitar (marcada par cruses roja), do multe vitimas ia mori. En Gera Mundal 2, Deutxland ia funda du campos de labora sclaval en la vila. En 1942, un geto minor ia es fundada. An tal, la plu de la polsces ci ia es prisonada en Kurow ia evade e ia junta se a grupos de la Armada Nasional cual ia es operante en la forestas prosima.