Amiria de Sisilia
La Amiria de Sisilia ia es un amiria en la isola Sisilia cual ia esiste de 831 a 1072. Sua capital ia es Palermo.
La muslimes, ci ia invade un en 625, ia controla la isola entera de la Impero Bizantian en un serie de disputas entre 827 e 902. Un cultur arabi-bizantian ia developa, produinte un stato multilingual e multirelijiosa. La Amiria ia es concistada par la mersenarios cristian normande su Roger 1 de Sisilia, ci ia fundi la Contia de Sisilia en 1071. La ultima site muslim en la isola, Noto, ia es concistada en 1091.
La muslimes sisilian ia resta sitadanes de la Contia e, a pos, la Rena de Sisilia, asta ce los ci ia no converti ia es espulsada en 1240. Asta la sentenio 12 tarda, e probable tan tarda como 1220, la muslimes ia es la majoria de popla de la isola. Sua influe ia resta importante en alga elementos de la lingua sisilian, como ance en nomes familial e locas.
Invades arabi un de Sisilia
[edita | edita la fonte]En 535, la imperor Justiniano 1 reconcista Sisilia per la Impero Roman, aora sola governada de Constantinopoli. Cuando la potia de lo ce oji es conoseda como Impero Bizantian ia diminui en la ueste, Sisilia ia es invadeda par la Califia Raxidun en la rena de la califa Utman en la anio 652. An tal, esta invade un ia dura poca, e la arabi ia abandona multe temprana. En la fini de la sentenio 7, con la concista umaian de Africa norde, la arabia ia catura la porto de Cartago, permetente a los construi barconerias e un base permanente de la cual envia a mar atacas plu sustada.