Maria Magdalena
Maria Magdalena ia es un fem iudi ci, seguente la cuatro evanjelios canonal, ia viaja con Jesus como un de sua seguores, e ia es un atestor a sua crusi, entera, e revive. El es notada par nom du-des veses en la evanjelios, plu ca la plu de la apostoles. La epiteto "Magdalena" ave probable la sinifia ce el ia deveni de la vila de Magdala, un vila de pescores a la costa ueste de la Mar de Galilea.
![](http://upload.wikimedia.org/wikipedia/commons/thumb/6/60/IVANOV_YAV_HRISTA_MARI1.jpg/220px-IVANOV_YAV_HRISTA_MARI1.jpg)
![](http://upload.wikimedia.org/wikipedia/commons/thumb/0/0f/Carlo_Crivelli_-_Maria_Magdalena_001_%28Cropped%29.jpg/220px-Carlo_Crivelli_-_Maria_Magdalena_001_%28Cropped%29.jpg)
![](http://upload.wikimedia.org/wikipedia/commons/thumb/f/fb/Maria_Maddalena%2C_1893.jpg/220px-Maria_Maddalena%2C_1893.jpg)
![](http://upload.wikimedia.org/wikipedia/commons/thumb/c/c1/Albert_Edelfelt_-_Christ_and_Mary_Magdalene%2C_a_Finnish_Legend_-_Google_Art_Project.jpg/220px-Albert_Edelfelt_-_Christ_and_Mary_Magdalene%2C_a_Finnish_Legend_-_Google_Art_Project.jpg)
La evanjelio de Lucas 8:2-3 lista Maria como un de la femes ci ia viaja con Jesus e ia aida suporta sua ministria par la usa de sua propre recursos, cual indica ce el ia es probable relativa rica. La mesma parte dise ance ce sete demones ia es estraeda de el, un cosa cual es repeteda en la fini plu longa de evanjelio de Marco. En tota evanjelios, el ia es un atestor a la crusi de Jesus, e en la evanjelios resomal, el ia es ance presente a sua entera. E en tota evanjelios, el es un membro de un grupo plu grande de femes ci ia atesta la tomba vacua, e la prima ci ia atesta la revive. Per esta razonas, el es conoseda en multe tradisiones cristian como "la apostol a la apostales". Maria es un person sentral en scrives apocrifa de cristiania gnosica, incluinte la Conversa de la salvor, la Pistis Sophia, la evanjelio de Tomas, la evanjelio de Filipe, e la evanjelio de Maria. Esta testos, cual eruditas no vide como conteninte informa esata istorial, mostra el como la disiplo la plu prosima de Jesus e la sola ci ia comprende vera sua instruis. En a evanjelios gnostica, la prosima de Maria Magdalena a Jesus ia resulta en tensa con la otra disiplos, spesial con Simon Petro.
En la eda medieval, Maria Magdalena ia es confusada en la tradision ueste con Maria de Betania e "la fem pecosa" no nomida ci ia unje la pedes de Jesus. Esta ia resulta en la crede popular ma no vera ce el ia es un fem promiscua o un prostituida. Lejendes medieval detaliosa de Europa ueste nara de la ricia e belia de Maria, e de sua viaje suposada a Frans sude. La identifia de Maria Magdalena con Maria de Betania e la "fem pecosa" no nomida ia es un debata major en la anios ante la reforma, e alga xefes protestante ia rejeta lo. En la contrareforma, la Eglesa Catolica ia usa Maria Magdalena como un simbol de espia.
En 1969, la identifia de la tre Marias como un person ia es sutraeda de la Calendario Jeneral Roman par Pape Paul 6, ma la ides de Maria como un prostituida reformida ia continua en cultur popular. Maria Magdalena es videda como un santa par la eglesas catolica, ortodox este, anglican, e luteran, con un dia de festa a julio 22. Otra eglesas protestante onora el como un eroe de la fide. La eglesa ortodox este onora el ance a la soldi de la portores de la mira, la corespondente de un de la tradisiones ueste de la tre Marias. Divinas sur Maria Magdalena ce el ia es la sposa de Jesus, o ce los ia ave relatas sesal con lunlotra, es videda como multe dutada par la plu de isoristes.