Lago

Un lago es un area plenida con acua, locada en un basin, ensircada par tera, estra cualce rio o otra esflue cual pleni o dreni la lago. Lagos reposa sura tera e no es parte de un mar, e donce distinguida de lagones. Los es ance plu grande e profonda ca lagetas, an si on ave no definis ofisial o siensal. Lagos es contrastada con rios o rietas, cual es normal fluente. La plu de lagos es plenida e drenida par rios e rietas.

Lagos natural es jeneral trovada en areas montaniosa, zonas de faliones, e areas con glasi continuante. Otra lagos es trovada en basines endoreica o longo la curso de rios matur. En alga partes de la mundo on ave multe lagos como la resulta de modos caosal de dreni cual resta de a eda de glasia presedente. Tota lagos es tempora tra tempo jeolojial, car los va pleni con depone o malversa de sua basin.

Multe lagos es fabricada e es construida per usa industrial o cultival, per jenera potia idroeletrical o furni acua per usa umana, o per intendes estetical, recreal, o otra ativias.

La plu de lagos sur tera es de acua dulse, e la plu es en la emisfera norde e a latitudes alta. Canada, per esemplo, ave sirca 31,752 lagos plu grande ca 300 ectares. Suomi ave sirca 56,000 lagos plu grande ca un hectare.

La plu de lagos ave a min un esflue natural como un rio o rieta, cual manteni la nivel promedia de la lago par permete dreni de la acua esesente. Alga lagos no ave un esflue natural e perde acua sola par vapori o filtri su tera, o ambos. Esta es nomida lagos endoreica.

Orijina de lagos

Lagos ave orijinas variosa, cual es usada par alga siensistes per clasi los.

Lagos tetonica

Lago Baical, Rusia

Lagos tetonica es formida par la deformi de la placas de tera, e la moves ladal e vertical resultante. Esta moves inclui falia, apoia, plia, e contorse. Alga de la lagos bon conoseda e grande sur tera es lagos de faliones, per esemplo, la lagos de faliones de Africa sentral e Lago Baical. Otra lagos tetonica inclui la Mar Caspio (vera un lago, no un mar), la Mar Aral (ance un lago), e otra lagos de la basines pontocaspian cual ia es separada de la mar par la leva tetonica de la leto de la mar supra la nivel de mar.

Lago Grande de Sal, Utah

Comun, la ativa tetonica de estende de la crosta ia crea un serie alternante de fosos e crestas paralel cual formi basines longa alternante con cadenas de montes. Esta no sola promove la crea de lagos par la disturba de redes esistente de dreni, ma ance crea basines endoreica en rejiones seca cual conteni lagos salosa. Los formi do on no ave un esflue natura, un rapida de vapori alta, e un surfas de dreni de la nivel de satura ave un cuantia de sal plu ca normal. Esemplos inclui la Lago Grande de Sal (en Utah, SUA) e la Mar Mor (entre Israel e la Riva Ueste de Filastin).

Lagos volcanal

Lago Crater, Oregon

Lagos volcanal es lagos cual es locada en crateres. La crateres pleni con presipida plu rapida ca los vacui par vapori o filtri. Un esemplo es Lago Crater en Oregon, SUA. Otra lagos volcanal ia es creada cuando rios o rietas es parada par la flue de lava o fango.

Lagos glasial

La Lagos Dita, New York

Lagos glasial es creada par la ativia direta de glasias e telones continental de jelo. Un varia de tipos diferente de prosedes glasial crea basines encluida, cual resulta en un varia de tipos diferente de lagos glasial: lagos contatante direta un glasia; basines taliada par un glasia; morenas con basines vacuida par acua dejelada; e basines de vaga glasial. Lagos glasial es la tipo de lago la plu comun. La plu de lagos en Europa norde e America Norde ia es creada o alterada par glasi. Un esemplo es la "Lagos Dital" (Finger Lakes) de New York, SUA.

Lagos rial

Lagos rial es lagos produida par acua corente, cual escava la letos de rios, crea curvas cual para la rios o la enflues de la rio, etc.

Rio Nowitna, Alaska

La tipo la plu comun es la lago cresente, cual formi en vales de rios como la resulta de vaga. La rio, movente lente, crea un forma sinusal cuando la lados esterna de la curvas es erodeda plu rapida ca la lado interna. Ultima un cresente developa e la rio talia tra la colo magra. Esta alora formi la pasaje major per la rio e la finis de la cresente pleni con deponeda e la lago es creada. Esemplos inclui lagos cresente longo la Rio Mississippi.

Lagos disolveda

Cenote de los Sacrificios, Yucatan

Esta lagos es creada par la pleni de un basin formida par la disolve de la surfas de la roca madral. Presipita e permea produi comun cavetas, cual colasa per formi dolinas. Si la acua sutera es prosima la depresa, la dolina va es plenida con acua. En alga casos, cavas de calcaria conteni pisinas de acua, cual es nomida lagos suteran. Esemplos inclui lagos a la costa de Corvatsca e partes de Florida, SUA.

Lagos de liscas de tera

La lisca de tera cual crea Lago Quake

Esta lagos es creada par la bloci de un vale par liscas de tera, fango, o rocas. Tal lagos es comun en rejiones montaniosa. An si estas pote es grande e profonda, los tende no dura longa. En esemplo es Lago Quake en Montana (SUA), cual ia resulta de la trematera de Lago Hebgen en 1959

Lagos de venta

Lagos de venta es lagos produida par la ativia de la venta. Los es trovada xef en ambientes seca, an si alga lagos es restas de paleoclimas. Los es composada de basines parada par arena ventada. Lago Moses en Washington (SUA) es un esemplo.

Lagos Gippsland, Australia: lagos costal

Lagos costal

Lagos costal es creada par la bloci de estuarios o par la acrete de crestas de plaias par corentes, spesial corentes paralel a la costa.

Lagos organica

Pantanes e lagos de torba

Esta lagos es creada par la ativia de plantas e animales. Los tende es rara e peti, e de dura corta. Esemplos inclui la pararios de castores, lagos de coral, o pararios formida par plantas. Lagos de torba es un varia de estas: la acumula de materia plantal partal decomposada en un ambiente moiada resulta en la surfas de plantas su la nivel de acua sutera per un dura continuante. Estas es tipal povre en nurintes e alga asidal, con acua profonda povre en osijen disolveda.

Lagos antropojen

Lago Vyrnwy e sua parario, Powys, Cimri

Esta es un nom alga ostentosa per un lago creada par umanas. Los pote es la resulta de la para de rios o rietas, o la pleni de escavas abandonada par acua sutera, presipita, o ambos.

Lagos de meteorites

Lago Pingualuit, Quebec

Estas es lagos creada par la colide desastrosa de meteorites e la tera. Esemplos inclui la Lago de Crater Lonar en India, Lago Elgygytgyn en Txucotca (Rusia), e Lago de Crater Pingualuit en Quebec (Canada). La depones en esta lagos pote conteni informa valuada par siensistes como arcivos de periodos longa de cambias paleoclimal.

Un lista de alga lagos importante

Lago Peyto, Alberta (Canada)

La Tera		model
Continentes:	Africa \| America Norde \| America Sude \| Antartica \| Asia \| Australia \| Europa
Otra areas de tera:	Desertos \| Isolas \| Montes \| Rejiones de Tera
Mares:	Mar Artica \| Mar Atlantica \| Mar Pasifica \| Mar Indian \| Mar Antartica
Otra areas de acua:	Lagos \| Rios \| Mares, golfos, e stretas
Popla:	Nasiones \| Sites \| Linguas