Himalia-Grupp

Diagramm an deem d'Bunnhallefachse vun de baussenzege Jupiter-Mounden (a Mio. km, horizontal Achs) géint d'Neigung vun hirer Bunn (a °, Hallefbou) opgedroe ginn. D'Gréisste vun de roude Kreesser illustréieren nëmmen déi relativ Moundradien a sinn net am Moossstaf zu de Bunnelementer. Déi giel Linne stellen de Spillraum tëscht dem Jupiternächste resp. -wäitste Punkt vun der jeeweileger Moundëmlafbunn duer. De Kallisto ass als Referenzgréisst uginn.

Detail-Vue vun der Himalia-Grupp aus dem ieweschten Diagramm. Et erkennt een, datt d'Mounde vun dëser Grupp Neigunge vun hirer Bunn tëscht 26° an 29° hunn an ongeféier 11 bis 12 Mio. km vum Jupiter ewech sinn

D'Himalia-Grupp ass eng Grupp vu baussenzege Mounde vum Planéit Jupiter, déi sech an hire Bunneegenschafte gläichen. Et gehéiere véier Mounden zur Grupp:

• Leda
• Himalia
• Lysithea
• Elara
• Diva (ass e weidere Kandidat fir dës Grupp)

D'Membere vun der Grupp zielen zu den irreguläre Mounden, deenen hir Bunne staark exzentresch sinn an eng däitlech Neigung (Inklinatioun) géigeniwwer dem lokale Laplace-Plang hunn. De Laplace-Plang vun dëse Mounde fält op dëser Distanz vum Planéit graff mat dem Bunnplang vum Jupiter zesummen, steet awer duerch baussenzeg Aflëss - besonnesch duerch de Saturn - ëm bis zu 1,5° schréi dergéint. Wéi bei alle baussenzege Jupitermounden ënnerleien d'Bunnelementer vun dëse Mounde staarken zäitleche Schwankungen.

D'Moundbunne vun der Himalia-Grupp si prograd (rechtleefeg), dat heescht: d'Mounde lafen an der selwechter Richtung ëm de Planéit wéi d'Rotatiounsrichtung vum Jupiter. D'Gruppememberen hunn Ofstänn vum Planéit tëscht 11 an 12 Mio. km, wat ongeféier 22 % vum Hill-Radius gläich kënnt (stabil Orbiter si fir prograd Mounde bis maximal 47 % vum Hill-Radius méiglech).

Baussenzeg Jupitermounde mat dësen Eegenschafte kréien zënter 1976 en Numm, dee mat engem a ophält, wougéint d'Nimm vu retrograden (réckleefege) irreguläre Jupitermounde mat engem e ophält (regulär Mounde sinn ëmmer prograd).

D'Himalia-Grupp ass no hirem gréisste Vertrieder genannt, dee gläichzäiteg de fënneftgréisste vun alle Jupitermounden ass. D'Grupp ass méiglecherweis aus engem eenzegen Asteroid entstanen, dee vum Jupiter duerch d'Gravitatioun agefaange gouf a spéider duerch d'Awierkung vun de Gezäitekräften a Stécker gebrach ass.

Kuckt och

Portal Astronomie