Raki

Raki

a̱kan

Tafa	anise drink, flavored liquor
Yet kap	Turkish cuisine
A̱lyoot a̱lyem a̱byin	Rakı
A̱byin	Turkiya
A̱byin neet	Turkiya
Jen ntsa	17. century
A̱sa̱khwot	colorless, white
Made from material	grape, anise seed, fig, date, barrel
Cuisine	Turkish cuisine

Raki ku rakı, (yei Turukya: [ɾaˈkɯ] (fa̱k)) yet a̱kan nia nang á̱ weang a̱sa̱khwot lywei sum a̱na̱p a̱ka̱feang a̱ni. Ni̱nia yet a̱kan a̱byin Turukya. Á̱ ka ndyen nna mi̱ bibyin Bali̱kan ghyáng nang apéritif mbeang ma̱ a̱byin Ka̱za̱ktan. Á̱ ni̱ nka̱u ma̱ng kyayak kyai a̱sa̱khwot hwa di̱n jen ma̱ a̱di̱di̱t ku meze. Á̱ maai á̱ mak nna ma̱ng á̱kan á̱ghyang di̱ nfam Meditaronya ma̱ng A̱ka̱wa̱tyia̱ A̱tyin na, kidee pastis, ouzo, sambuca, arak ma̱ng aguardiente.

Mami Ka̱rita, tsikoudia yet tangka̱i pomace brandy hwa nang á̱ ka ngyei rakı di̱ jen jhyang. Á̱ bu nyia̱ ta̱m ma̱ng á̱na á̱ nyia̱ rakomelo, na̱ byia̱ tong a̱ni ma̱ng si̱nnamon. Á̱ ka̱u Rakomelo ka̱nang na̱ shwai ma̱ a̱da̱dei di̱n zwát a̱vwuoshyim. Raki Ka̱rita nwai byia̱ anise, mat a̱nia yok tyia̱ tai nna ma̱ng tangka̱i Turukya hu bah.

Bwoi a̱lyoot

Swang a̱lyiat raki ji ku neet di̱ swang a̱lyiat Turukya ji rakı ja. A̱wot swang a̱lyiat La̱ra̱ba ji arak (La̱ra̱ba: عرق [ʕaraq]), si̱ fa "a̱ngga nang á̱ ku lywei a̱ni", a̱wot nvak yei jhyang si̱ yet araka, araki, ariki. A̱telyut ba, ba̱ yet a̱banwap kwai-A̱turukya ba a̱ni ba̱ swan mi̱ Si̱beriya, nyia̱ ta̱m ma̱ng swang a̱lyiat ji arakı ji̱ fa a̱sa̱khwot a̱na̱p ku ntangka̱i a̱kan njhyang. Bi̱ri̱ng ma̱ng a̱nia, mi̱ Helen Gbangbang ji á̱ ku ngyei a̱na̱p ῥάξ (yei Helen: [raks]) wa.

A̱yaayet

Á̱ ku gwai a̱gwai raki nang á̱ ni̱ ntyei swam aniseed a̱mami a̱ni neet mi̱ gbangbang nang a̱yet song mi̱ A̱dana mbeang A̱za Kuburut neet ma̱ a̱lyia̱ 2010. A̱yet Rakı Swanta mi̱ A̱dana, si̱ ta ghwut neet mi̱ taada ndyia̱ cyi jhyiung nang á̱ ni̱ nfwuong nyinyang a̱tywaat nam A̱dana a̱ni, ma̱ng a̱lyia̱, şalgam ma̱ng rakı. A̱yet ka si̱ bwuak tyia̱ a̱yet song a̱zagaat a̱byin a̱ni nang á̱niet cat, á̱niettsot-bubwom ba̱ tsot byín ma̱ng zuri̱na, ba̱ mun gwai á̱nietcen mba fwuo a̱mgba̱m a̱tyetuk ka ma̱ a̱tyetuk A̱sa̱ba̱t a̱feang kuzang Zwat Swak ma̱ng Sweang. A̱yet Rakı Kuburut A̱za yet a̱yet wa nang á̱ song sati nyiung da̱ á̱ nyia̱ mi̱ Girne, Lefkoşa ma̱ng Gazi Mağusa.

Nta̱m njhyang

Mi̱ Ka̱rita tsikoudia yet bi̱randi pomet ja nang á̱ ka ngyei rakı jen jhyang a̱wot á̱ nyia̱ nji ma̱ng sum a̱na̱p hwa. Á̱ ni̱ nnyia̱ ta̱m ma̱ng a̱nji á̱ nyia̱ rakomelo, nang á̱ ni̱ ntyia̱ nkyangswam ma̱ng tong mbeang si̱namon a̱wot á̱ ka nka̱u ma̱nang ku ni̱ mbyia̱ shwai a̱ni mi̱ zwát jen a̱vwuoshyim.

Nkwaa̱mbwat

• Forbes, Robert, J. (1997). Short History of the Art of Distillation from the Beginnings Up to the Death of Cellier Blumenthal (hardcover ed.). Brill Academic Publishers. ISBN 90-04-00617-6.

A̱ka̱fwuop nta

• Kyangswuo a̱byin Turukya, Raki (di̱n Shong)
• Tazwa a̱bataada Raki ka mi̱ Turukya Archived 2011-07-26 at the Wayback Machine (di̱n Shong)
• Shei-kaswuo Raki Turukya (mi̱ YouTube)
• Ta̱si̱la Kyayak Turukya (di̱n Shong)
• Mami Itambut, raki ma̱ng za̱kwa a̱bwong a̱fa-a̱lyiak ka̱ sang sangba̱p a̱ni Archived 2014-10-14 at the Wayback Machine
• Kyikyo-nkhang Rodiaki