პლაჟი
![](http://upload.wikimedia.org/wikipedia/commons/thumb/8/86/Man_o%27war_cove_near_lulworth_dorset_arp.jpg/220px-Man_o%27war_cove_near_lulworth_dorset_arp.jpg)
პლაჟი (ფრანგ. plage — ზღვის დამრეცი ნაპირი) — ზღვის სანაპირო ზოლი, რომელიც აგებულია ზვირთცემის ნაკადის მოქმედების ზონაში დაგროვილი ნატანი მასალით. განასხვავებენ კენჭიან, ხრეშიან, ქვიშიან, ნიჟარიან პლაჟებს.
პლაჟი წარმოადგენს ზვირთცემისაგან ნაპირის დაცვის ბუნებრივ საშუალებას. მორფოლოგიურად განარჩევენ სრული და არასრული პროფილის პლაჟებს. პირველს დამრეცი ზვინულის ფორმა აქვს, მეორე წარმოადგენს ზღვისკენ დახრილ ნატანის გროვას, რომლის ზურგი ნაპირის ბექს ებჯინება. ზვირთცემის პირდაპირი და უკუდინების სიჩქარეთა განსხვავების გამო პლაჟზე ხდება ნატანი მასალის დახარისხება სიდიდისა და სიმკვრივის მიხედვით.
გარკვეულ ხელსაყრელ პირობებში პლაჟზე წარმოიქმნება სასარგებლო წიაღისეულის ქვიშრობული საბადოები. სოლარიუმებისა და აერარიუმებით მოწყობილ პლაჟებს იყენებენ მკურნალობისათვის.
ფართო გაგებით პლაჟი იქმნება არა მხოლოდ ზღვაზე, არამედ ტბაზე, წყალსატევებზე და სხვა. სანაპირო ზოლები პლაჟის სახით მსოფლიოს მრავალ ქვეყანაშია წარმოდგენილი. მ.შ. შესანიშნავი საერთაშორისო საზღვაო კურორტები სანაპირო ფართო და ვიწრო პლაჟის სახით გააჩნია საქართველოს საზღვაო ქალაქებსაც, რომლებიც ათვისებულია რეკრეაციული მიზნებისათვის.
რესურსები ინტერნეტში
[რედაქტირება | წყაროს რედაქტირება]- პლაჟი — სტატია დიდი რუსული ენციკლოპედიიდან (რუსული)
- პლაჟი — სტატია ენციკლოპედია ბრიტანიკიდან (ინგლისური)
ლიტერატურა
[რედაქტირება | წყაროს რედაქტირება]- ქართული საბჭოთა ენციკლოპედია, ტ. 8, თბ., 1984. — გვ. 99-100.
- Ricci Lucchi F., Sedimentologia. Parte 3, cap. 6, pp. 183-214, Bologna, CLUEB, 1980.
|