Surat Kecil untuk Tuhan (2017)
Surat Kecil untuk Tuhan (2017) | |
---|---|
![]() Surat Kecil Untuk Tuhan (2017) | |
Disutradarani | Fajar Bustomi |
Diprodhuseri | Frederica |
Ditulis déning | Agnes Davonar |
Diskénariyoni | Upi |
Dibintangi | Bunga Citra Lestari Joe Taslim Izzati Khanza Bima Azriel Lukman Sardi Aura Kasih Rifnu Wikana Ben Joshua Maudy Koesnaedi Jeroen Lezer Chew Kin Wah Susan Bachtiar Dorman Dorisman |
Dimusiki | Khikmawan Santosa Mohamad Ikhsan Sungkar |
Sinématografi | Yudi Datau |
Dibesut déning | Ryan Purwoko |
Dibabar déning | Falcon Pictures |
Tanggal metu | 25 June 2017 |
Nagara | ![]() |
Basa | Indonésia |
Surat Kecil Untuk Tuhan (Serat Alit kanggé Gusti) inggih punika filem sandiwara saking Indonesia ingkang dipundamel déning Falcon Pictures taun 2017, dipunangkat saking novèl kanthi judhul ingkang sami. Filem punika dipunsutradarani Fajar Bustomi, dhedhasar skénario anggitanipun Upi Avianto. Para paraga filem punika antawisipun Bunga Citra Lestari, Joe Taslim, Lukman Sardi, Aura Kasih, Ben Joshua, Maudy Koesnaedi, Chew Kin Wah, Susan Bachtiar, lan Jeroen Lezer. Sadèrèngipun, ing taun 2011, filem kanthi judhul ingkang sami kasil panèn kasuksèsan wonten ing box office filem Indonesia. Sapunika Surat Kecil Untuk Tuhan dipunsuguhaken malih kanthi cariyos ingkang bèntèn, ngandhut prakawis kamanungsan ingkang wekdal-wekdal kepengker dumados ing Indonesia.[1][2][3][4][5]
Latar wingking
[besut | besut sumber]Skénario filem Surat Kecil Untuk Tuhan kaserat déning Upi, ingkang naté ngarahaken filem My Stupid Boss. Juru damel saking Falcon Pictures, Frederica, ngakèni bilih piyambakipun ngadhepi tantangan nalika nggarap filem Surat Kecil Untuk Tuhan. Amargi taun 2016 kepengker, tigang filem kumedhi damelanipun Falcon Pictures (Comic 8, My Stupid Boss, dan Warkop DKI Reborn) ugi panèn pangalembana saking sagung pamirsa lan ngasilaken. ”Tumrap kawula, filem Surat Kecil Untuk Tuhan punika filem ageng, kathah pitedah ingkang dipunlebetaken. Pramila para punggawa Falcon Pictures badhé ngecakaken ingkang saé amrih kasilipun filem punika,” ngendikanipun. Fajar Bustomi, ingkang dipunpracaya minangka sutradara filem punika rumaos tuhu nges, ”Kawula rumaos, niki filem ingkang saé ingkang naté kawula arahaken. Saèstu kathah pambiyantu ingkang dipuncawisaken déning para punggawa prodhuksi, ingkang kawula kajengaken. Panyengkuyung saking Falcon Pictures ugi saèstu ageng,” Pratélanipn. Bunga Citra Lestari ingkang naté maragani minangka Kerani wonten filem My Stupid Boss, ngakèni remèn saget ndhèrèk kadhapuk wonten filem Surat Kecil Untuk Tuhan. ”Cariyosipun tuhu adamel trenyuh wekdal wiwitan kawula maos skénarionipun,” ngendikanipun.
Lampahan
[besut | besut sumber]Cariyos ngenes babagan pagesangan kangmas-adhi yatim-piatu, Anton lan Angel. Kekalihipun mboten saget éwah saking satunggalipun gerombolan ingkang badhé ngginakaken laré-laré alit glandhangan dados tiyang ngemis. Kekalihipun mboten naté sumerep sesawanganipun mangsa alit. Saéngga satunggalipun dinten Angel nandang kacilakan wonten ing margi. Nalika Angel èmut, piyambakipun sampun dipuntilar piyambakan wonten griya sakit. Lan awit saking punika Angel sampun mboten sesarengan kaliyan Anton. Piyambakipun mboten mangertos, wonten pundi dunungipun Anton, kangmasipun. Gangsal welas taun, ing Sydney, Australia. Awit saking sih lan katrésnan kulawarga angkatipun, Angel (Bunga Citra Lestari) sansaya ageng dados prawan ayu lan pinter. Piyambakipun kasil nyembadani gegayuhanipun minangka satunggalipun pengacara. Wonten ing mriku, Angel pinanggih kaliyan Martin (Joe Taslim) dokter nèm saking Indonesia ingkang becik penggalihé lan adamel kesengsem. Pagesanganipun sapunika sampun tentrem rahayu. Éwasemanten Angel tetep kemawon tansah kèmutan mangsa kepengker. Piyambakipun mboten saget mandhek anggènipun mikiraken Anton. Tekadipun namung satunggal, sawatawis badhé bebrayan kaliyan Martin, Angel kedah saged manggihi Anton wonten Jakarta.
Ingkang maragani
[besut | besut sumber]- Bunga Citra Lestari minangka Angel
- Joe Taslim minangka Martin
- Izzati Khanza minangka Angel Kecil
- Bima Azriel minangka Anton
- Lukman Sardi minangka Om Rudi
- Aura Kasih minangka Ningsih Dewasa
- Rifnu Wikana minangka Asep
- Ben Joshua minangka Let. Joko
- Maudy Koesnaedi Mama Soraya
- Jeroen Lezer minangka Papa Edwards
- Chew Kin Wah minangka Bapak Martin
- Susan Bachtiar minangka Ibu Martin
- Dorman Borisman minangka Pak Wiryawan
Rujukan
[besut | besut sumber]- ↑ Poskota News: ‘Surat Kecil untuk Tuhan’ Dengan Cerita Berbeda, kapundhut 9 Mèi 2017
- ↑ Showbiz Liputan6: Nonton Surat Kecil Untuk Tuhan, Vin Diesel Resmi Diundang, kapundhut 9 Mèi 2017
- ↑ Hot Detik: Film 'Surat Kecil untuk Tuhan' Digarap dengan Cerita Baru, kapundhut 9 Mèi 2017
- ↑ Bintang: Kisah Pilu Film Surat Kecil untuk Tuhan, kapundhut 9 Mèi 2017
- ↑ Tempo: BCL Bintangi Surat Kecil untuk Tuhan, Produser: Ini Bukan Remake, kapundhut 9 Mèi 2017