Sepur modèl
![](http://upload.wikimedia.org/wikipedia/commons/thumb/0/0a/Noch-maerklin_hg.jpg/220px-Noch-maerklin_hg.jpg)
Sepur modèl utawa kréta latu modèl (krama) utawa sepur miniatur iku modèl sepur ing skala modèl cilik. Sepur modèl iku sajinising hobi kang yasa modèl-modèl sepur. Skala modèl iki ngamot lokomotif, wagon, trèm, ril, sinyal, dalan, gedhong, wahana liyané, figur-figur modèl, cahya lan diorama fitur-fitur alami kaya ta kali, wukir lan lebak.
Sepur modèl kang awal dhéwé diarani 'sepur karpèt' (basa Inggris carpet railways) lan muncul ing dasawarsa 1840-an. Sepur modèl iki diarani mangkono amarga ora mrelokaké ril kanggo ngglindhing. Sepur modèl mawa tenaga listrik wiwit muncul ing awal abad kaping 20. Nalika iku sepur-sepur modèl iki namung mèmper kanthi kasar waé karo asliné. Sepur modèl jaman saiki rupané luwih réalistis. Para sutresna sepur modèl racaké ora namung kolèksi modèl-modèl sepur waé, nanging uga nggawé layout sepur-sepuran utawa diorama kang niru lokasi utawa periode sajeroning sajarah pasepuran.
Ing Jerman ana organisasi modèl pasepuran kang nduwé jeneng NEM. Organisasi iki kang nemtokaké pamérangan jaman ing pasepuran ing taun 1968.
Skala
[besut | besut sumber]![](http://upload.wikimedia.org/wikipedia/jv/thumb/8/89/Ludmilla-H0-TT-N.jpg/220px-Ludmilla-H0-TT-N.jpg)
Sepur modèl iku ana ing sawatara skala. Skala kang lumrah iku ya iku:
- Skala H0/HO utawa ukurané 1:87
- Skala TT utawa ukurané 1:120
- Skala N utawa ukurané 1:160
- Skala Z utawa ukurané 1:220
Skala H0 iku kang populèr dhéwé banjur skala N iku kang populèr nomer loro. Ing Indonésia kang populèr uga skala H0 lan N. Skala TT iku mligi populèr ing (manten) Jerman Wétan. Banjur skala Z iku mligi kang nggawé namung pabrik siji waé ya iku; Märklin.
Pamérangan miturut jaman
[besut | besut sumber]NEM utawa lembaga para kolektor sepur modèl in Jerman, ing taun 1968 nemtokaké pamérangan jaman ing sepur modèl. Pamérangan jaman iki ing basa Jerman diarani Epoche.
- Jaman I: 1835-1925
- Jaman II: 1925-1945
- Jaman III: 1945-1970
- Jaman IV: 1970-1990
- Jaman V: 1990-2006
- Jaman VI: 2006 lan sabanjuré
Tenaga sepur modèl
[besut | besut sumber]Sepur modèl skala cilik racaké nganggo mesin tenaga dinamo listrik. Dinamo iki akèhé nganggo setrum arus padha (DC). Nanging uga ana kang nganggo mesin arus bolak-balik (AC). Saliyané iku ing skala kang radha gedhé, uga ana kang nganggo mesin bakar jero utawa mesin uwab. Saiki kang umum nganggo sistem arus bolak-balik (AC) iku namung Märklin waé ing skala H0. Sanadyan mangkono uga akèh produsèn liya kang nggawé lokomotif kanggo sistémé Märklin.
Sawetara mèrek produsèn sepur modèl
[besut | besut sumber]- Märklin saka Jerman
- Fleischmann saka Jerman
- Roco saka Ostenrik
- Piko saka Jerman
- Hornby saka Inggris
- Rivarossi saka Italia
- Kato saka Jepang
- Rokuhan saka Jepang
Uga delengen
[besut | besut sumber]- Inglenook Sidings, sawijining cangkriman utawa teka-teki sepur modèl
Réferènsi
[besut | besut sumber]Pranala njaba
[besut | besut sumber]- Situs wèb ngenani sepur modèl ing Indonésia Archived 2011-07-06 at the Wayback Machine. (pranala mati diaksès tanggal 25 September 2011)
- Situs wèb adhedhasar Wordpress ngenani sepur modèl ing Indonésia
T (1:450) | ZZ (1:300) | Z (1:220) | N (1:160) | TT (1:120) | H0 (1:87) | 00 (1:76,2) | S (1:64) | 0 (1:45) | I (1:32) | II (1:22,5)
TY (1:900 / 1:1000) (ora resmi)