Lawrence R. Klein

Lawrence Klein

Lawrence Robert Klein miyos wonten ing Omaha, Nebraska nalika taun 1920 lan asalipun saking keturunan Yahudi. Saking karyanipun nyiptakaken modhèl penghitungan kanggé mrekirakaken tren ékonomi wonten ing babagan ekonometrik wonten ing Universitas Pennsylvania, piyambakipun dipunanugrahi Bebungah Nobel babagan Ékonomi nalika taun 1980. Ingkang spésifik "kanggé panciptan modél ékonomi lan patrapaning wonten ing analisis fluktuasi ékonomi lan kabijakan ékonomi."

Profesor Klein inggih punika lulusan saking Universitas California, Berkeley, ing pundi piyambakipun miwiti modhèl pangétanganipun; piyambakipun pikantuk gelar PhD wonten ing Institut Teknologi Massachusetts (MIT) nalika taun 1944.

Klein lajeng pindhah dhateng Cowles Commission for Research in Economics, ingkang wekdla punika wonten ing Universitas Chicago, sapunika Cowles Foundation. Wonten ing mrika piyambakipun mbiyangun sawijining modhèl ékonomi Amérikah Sarékat kanggé mrakirakaken pangembangan fluktuasi bisnis lan nyinaoni èfèk kabijakan ékonomi pulitik pamaréntah. Sasampunipun perang donya II, Klein migunakaken modelipun kanggé mrakirakaken kanthi agenging pangarep saking masarakat, bilih badhé wonten kemajuan ékonomi tinimbang depresi. Piyambakipun mrakirakaken kanthi pas bilih resesi badhé kadadosan wonten ing pungkasaning Perang Koréa.

Nalika taun 1959, Klein dipunanugrahi John Bates Clark Medal, salah satunggal saking 2 bebungah paling bergengsi wonten ing babagan ékonomi.

Wonten ing Universitas Michigan, Klein ngembangaken modhèl (makroékonomi) ingkang dipuninggilaken, mliginipun modhèl Klein-Goldberger ingkang misuwur, dipundamel kaliyan Arthur Goldberger, ingkang dhedhasar kaliyan dhasar ingkang dipundunungaken Profesor Jan Tinbergen saking Walanda, ingkang salajengipun menangaken Penghargaan Bank Swèdhen wonten ing babagan Ilmu Ékonomi kanggé méngeti Alfred Nobel nalika taun 1969. Klein bendten kaliyan Jan Tinbergen kanthi migunakaken téyori ékonomi alternatif lan tèhnik statistik ingkang bènten.

Klein pindhah dhateng Inggris nalika taun 1954, amargi "witch-hunt" anti kuminisme Senator Joseph Raymond McCarthy, lan panolakan masa jabatanipun ingkang kalajengaken wonten ing University of Michigan. Klein sampun dados anggota Parté Kuminis Amérika nalika taun 1946 lan 1944 sadangunipun wonten ing Chicago; ing wuri piyambakipun ngendika bilih punika minangka akibat kenaifan nalika taksih timur.

Wonten ing Inggris, Klein ngembangaken modél ékonomi Britania Raya wonten ing Universitas Oxford, sadéréngipun wangsul dhateng Amérikah Sarékat nalika taun 1958 kanggé kagabung kaliyan Jurusan Ékonomi wonten ing University of Pennsylvania. Piyambakipun dados "Profesor Benjamin Franklin wonten ing Ilmu Ékonomi lan Keuangan" wonten ing Wharton Business School nalika taun 1968.