Hirohito
![](http://upload.wikimedia.org/wikipedia/commons/thumb/8/8e/Emperor_Showa.jpg/220px-Emperor_Showa.jpg)
Hirohito (29 April 1901-7 Januari 1989) punika kaisar Jepang ingkang kaping 124. Ing sajarah Jepang panjenenganipun punika Kaisar paling lami ingkang mangrèh (1926-1989) lan wujud salah sawijining tokoh wigatos ing mangsa Perang Donya II lan pembangunan malih Jepang.
Biografi
[besut | besut sumber]Hirohito dipunwiyosaken ing Puri Aoyama, Tokyo tanggal 29 April 1901. Putra sepindhah saking Kaisar Yoshihito (Taisho) lan Ratu Sadako (Teimei), lan rakanipun Pangéran Yasuhito Chichibu (1903-1953), Pangéran Nobuhito Takamatsu(1905-1987) sarta Pangéran Takahito Mikasa (1915-). Sadèrèngipun minggah tahta panjenenganipun dipuntepungi minangka Pangéran Michi (Michi-no-Miya). Mangsa kakuwaosanipun minangka kaisar dipuntepangi minangka era Showa ingkang ateges tentrem, luhur budi. Nanging ironisipun, malah ing wekdal punika, Jepang kalibat perang nglawan RRC lan pungkasanipun salebeting Perang Donya II. Ing Indonésia, nalika wekdal pandhudhukan Jepang (1942-1945) Hirohito dipuntepangi minangka Tenno Heika ingkang ateges " Kaisar Ingkang Mulya".
Hirohito nglampahi pendhidhikan awal ing Gakushuin Peer's School wiwit April 1908 dumugi April 1914, salajengipun pikantuk pendhidhikan mirunggan kanggé putra makutha (Togu-gogakumonsho) ing Pura Akasaka wiwit taun 1914 dumugi Fèbruari 1921. Pikantuk karir minangka letnan lan sub-lieutnant (kelas sepindhah) 9 Dhésèmber, 1912 ing Angkatan Dharat Kakaisaran, kapten lan letnan (31 Oktober 1916, mayor lan wakil komandhan (31 Oktober 1920) letnan kolonèl lan komandhan (31 oktober 1923) lan kolonèl lan komandhan Angkatan Laut Kakasairan (Kaigun) (31 Oktober 1924). Panjenenganipun dipunangkat dados putra makutha kanthi resmi tanggal 16 November 1916. Ing taun 1922 panjenenganipun ngawontenaken kunjungan dhateng Inggris lan sapérangan nagari Éropah. Kunjungan puniki dipunanggep golongan sayap tengen kontrovèrsial saéngga niwasaken Mahamantri Hamaguchi.
Hirohito gadhah pangertosan ngenani panlitèn biologi laut lan sapérangan asil panlitènanipun dipunasokaken dhateng sapérangan buku ing antawisipun The Opisthobranchia of Sagami Bay lan Some Hydrozoans of the Amakusa Islands.
Hirohito palakrami kaliyan Putri Nagako, putri pembajeng Pangéran Kuniyoshi tanggal 26 Januari] 1924 lan gadhah 7 yoga, Putri Teru Shigeko (1925-1961, Putri Hisa Sichiko(1927-1928), Putri Taka Kazuko (1929-1989), Putri Yori Atsuko(1931-), Pangéran Akihito (1933-), Pangéran Hitachi Masahito (1935-), lan Putri Suga Takako (1939-).
Panjenenganipun dipunnobataken dados kaisar tanggal 25 Dhésèmber 1926 sasampunipun ramanipun Kaisar Taisho tilar donya, dipunlantik kanthi resmi 10 November, 1928, ing Kyoto.
Tilar donya
[besut | besut sumber]Kaisar Hirohito tilar donya tanggal 7 Januari 1989 amargi nandhang lelara kanker usus kalih welas driji (duodenum). Panguburan kanegaranipun dipunrawuhi déning para pamimpin donya ing antawisipun Présidhèn Amérikah Sarékat George Bush, Présidhèn Prancis Francois Mitterand, HRH Duke of Edinburgh saking Inggris, lan Raja HM Baudouin saking Bèlgi, tanggal 24 Fèbruari 1989. Dhisinipun dipunsarèkaken ing Mausoleum Kakaisaran Musashino, sisihan kaliyan pasaréyanipun Kaisar Taisho. Kalenggahanipun dipungantosaken déning Putra Makutha Akihito.
Ugi pirsani
[besut | besut sumber]Pranala njawi
[besut | besut sumber]- Imperial Family of Japan
- Japan Longest Day Archived 2011-02-25 at the Wayback Machine.
Didhisiki déning Yoshihito, Kaisar Taishō |
Pratélan Kaisar Jepang | Diterusaké déning: Kaisar Akihito |