Ögmundur Jónasson

Ögmundur Jónasson (ÖJ)
Ögmundur árið 2016.
Fæðingardagur:	17. júlí 1948 (1948-07-17)
Fæðingarstaður:	Reykjavík
10. þingmaður Suðvesturkjördæmis
Flokkur:	Alþýðubandalagið (1995-1998) Vinstrihreyfingin – grænt framboð (1999-2020)
Þingsetutímabil
1995-1998	í Reykv. fyrir Alþb.
1998-1999	í Reykv. fyrir Óh.
1999-2003	í Reykv. fyrir Vg.
2003-2007	í Reykv. s. fyrir Vg.
2007-2009	í Suðvest. fyrir Vg.
2009-2013	í Suðvest. fyrir Vg. ✽
2013-2016	í Suðvest. fyrir Vg.
✽ = stjórnarsinni
Embætti
1998-1999	Þingflokksformaður fyrir Óháða
1999-2009	Þingflokksformaður fyrir Vinstri græna
2009	Heilbrigðisráðherra
2010-2011	Dómsmála- og samgönguráðherra
2011-2013	Innanríkisráðherra
Tenglar
Æviágrip á vef Alþingis – Vefsíða

Ögmundur Jónasson (f. 17. júlí 1948 í Reykjavík) er Íslenskur fyrrum stjórnmálamaður og sagnfræðingur. Ögmundur sat á Alþingi frá 1995 til 2016, fyrst fyrir Alþýðubandalagið og síðan fyrir Vinstri græna. Ögmundur gengdi þremur ráðherrahlutverkum í ríkisstjórnum Jóhönnu Sigurðardóttur frá 2009 til 2013. Fyrst var hann heilbrigðisráðherra árið 2009, síðan dómsmála- og samgönguráðherra frá 2010 til 2011 og síðast sem innanríkisráðherra frá 2011 til 2013.

Ögmundur er sagnfræðingur að mennt og sat sem þingmaður Vinstri hreyfingarinnar - græns framboðs. Ögmundur var heilbrigðisráðherra í fyrstu tveim ríkisstjórnum Jóhönnu Sigurðardóttur, frá 1. febrúar 2009 til 1. október. Hann sagði af sér ráðherradómi vegna ágreinings innan ríkisstjórnarinnar um Icesave-málið. Hann sagði af sér formennsku BSRB fyrir ársfund BSRB haustið 2009. Ögmundur er yfirlýstur andstæðingur inngöngu Íslands í Evrópusambandið eins og margir samflokksmenn hans.

Ögmundur varð ráðherra að nýju 2. september 2010, tæpu ári eftir að hann sagði af sér vegna Icesave-málsins og tók sæti sem dómsmála- og samgönguráðherra í aðdraganda þess að nýtt innanríkisráðuneyti varð til með sameiningu dóms- og mannréttindaráðuneytis og samgönguráðuneytis. Árið 2011 var titill ráðherraembættisins breytt í innanríkisráðherra. Ögmundur lýsti því yfir í aðsendri grein í Morgunblaðið um miðjan janúar 2012 að hann myndi styðja tillögu um að vísa mál Landsdóms gegn Geir Haarde frá sökum þess að ekki væri rétt að einn maður væri látinn sæta ábyrgð fyrir hrunið. Það þótti nokkuð umdeilt að innanríkisráðherra skyldi með þessum hætti hlutast um dómsmál sem að öllu jöfnu teldist fara á svig við þrískiptingu ríkisvaldsins.

Ferill

Ögmundur útskrifaðist sem stúdent frá menntaskólanum í Reykjavík árið 1969 og lauk MA-prófi í sagnfræði og stjórnmálafræði frá háskólanum í Edinborg árið 1974. Hann hefur verið stundakennari við Háskóla Íslands síðan 1979 og var formaður BSRB frá 1988 til 2009, er hann sinnti því starfi ásamt þingmennsku.

Ögmundur var kjörinn á Alþingi sem óháður frambjóðandi á lista Alþýðubandalagsins og sat sem slíkur frá 1995 til 1998 og var formaður þingflokks Óháðra frá 1998 til 1999, en gekk síðan til liðs við Vinstrihreyfinguna - grænt framboð árið 1999. Á þingmannatíð sinni, ásamt flokkssystkinum sínum, mótmæli hann stríðinu í Írak og virkjanaframkvæmdunum við Kárahnjúka. Ögmundur ákvað að gefa ekki kost á sér í alþingiskosningunum 2016. Hann sagði sig úr VG árið 2020.

Tenglar

• Vefur Ögmundar
• Stutt æviágrip á heimasíðu Alþingis

Fyrirrennari: Guðlaugur Þór Þórðarson	Heilbrigðisráðherra (1. febrúar 2009 – 1. október 2009)	Eftirmaður: Álfheiður Ingadóttir
Fyrirrennari: Ragna Árnadóttir	Dómsmálaráðherra (2. september 2010 – 1. janúar 2011)	Eftirmaður: enginn
Fyrirrennari: Kristján L. Möller	Samgönguráðherra (2. september 2010 – 1. janúar 2011)	Eftirmaður: enginn
Fyrirrennari: enginn	Innanríkisráðherra (1. janúar 2011 – 23. maí 2013)	Eftirmaður: Hanna Birna Kristjánsdóttir