De Doelen
![](http://upload.wikimedia.org/wikipedia/commons/thumb/b/bf/Rotterdam_Doelen.jpg/360px-Rotterdam_Doelen.jpg)
De Doelen esas koncerteyo e konfero-centro en Rotterdam, Nederlando.
Ol originale konstruktesis en 1934 ma destruktesis en mayo 1940 ye la komenco dil Duesma Mondo-Milito. Ol rikonstruktesis en 1966, originale kun un halo, a qua du plusa hali adjuntesis dum la 1990a yari.
Ol havas diversa spaci, inkluze la Grote Zaal (Granda Halo), koncerto-halo kun 2200-sidili, du plu mikra hali kun sidili por cirkume 700 homi, e konfero-chambri. En 2015 ol klasifikesis kom Rijksmonument (protekata historiala edifico). Quankam precipue konocata kom loko por klasika muziko, De Doelen esas anke ceneyo por jazo, mondo-muziko, e servas kom la Centrala Kaso por la Internaciona Filmo-Festivalo di Rotterdam. Ol esas anke la hemo dil orkestro Rotterdams Philharmonisch Orkest.
De Doelen esas, per plu kam 450.000 koncerto-vizitanti che 600 koncerti singlayare, la duesma koncert-edifico di Nederlando, dop la Concertgebouw en Amsterdam, ma avan TivoliVredenburg en Utrecht. Se on adjuntas la kongres- ed evento-vizitanti ta nombro augmentas til plu kam 650.000 vizitanti singlayare.
La Rotterdams Philharmonisch Orkest (RPhO) esas la maxim importanta lokacero di De Doelen. Ultre to pleesas jazo e mondo-muziko, e l'edifico provizas la Internaciona Filmo-Festivalo di Rotterdam per kaso- ed informo-spaci e filmo-hali.
La nomo aparis unesmafoye dum la 17ma yarcento, kande grupo de muzikisti reguloze pleis koncerti en edifico nomizita ‘De Doele’ qua stacis an la strado Haagscheveer, proxim la Delftsche Poort. Ta edifico remplasis l'antea St. Joris Doele, qua depos la Mezepoko esabis la hemo dil gildo dil arkeri ("doelen"). Arkeri praktikis arkpafado a 'doelen' (skopi). Ta arkeri-gildo recevis en 1697 oficala permiso por organizar koncerti ibe.
Depos 1966 yarale la kristana koro Deo Cantemus dum la monato decembro pleas kristnasko-koncerto che De Doelen. La brodkasterio Evangelische Omroep (EO) brodkastas la koncerto per televiziono. Anke tradicionala esas yarala printempo-koncerto kun la temo “Rotterdam zingt van Hem” (Rotterdam kantas pri Ilu). Altra importanta reguloza evento esas la Gergiev-Festivalo, depos 1995.