Nagra
| Nagra |
|---|
| instantia de: interprisa[*] |
|
|
| data de creation: 1951 |
| sito web official: https://www.nagraaudio.com/ |
| Commons: Nagra |
Nagra es le marca de un serie de magnetophonos professional producite per Kudelski S.A., situate in Cheseaux-sur-Lausanne, Switza.
Inter le annos 1960 e le annos 1990, le magnetophonos de Nagra esseva le standard de facto pro systemas de registration sonar pro filmes e productiones de television a camera singule. Lor aspecto physic, con le singule selector de transporto e con le grande lector de bandas a bobina aperte, continua a esser le imagine stereotypic de un magnetophono professional. Le parola nagra proveni del lingua materne de Stefan Kudelski, le polonese, e significa "registrara".
Le magnetophonos analoge de Nagra ha le reputation de esser extrememente robuste e solide, como le "horologio switze" del magnetophonos. Lor cassas es multo resistente, e omne componente, como le rolatores de transporto e le potentiometros de ganio, da le impression de ingenieria excellente. Lo que dava al Nagra le avantage qualitative pro usage in filmes esseva le disveloppamento per Stefan Kudelski del systema Neo-Pilottone, que permitteva le registration de datos de synchronisation in le medio del pista de audio del banda, sin problemas de diaphonia.
Le magnetophonos de Nagra se identifica con lor numeros de modello, le quales indica lor generation technologic e lor functiones:
- NAGRA I - Le primissime prototypo con motor mechanic e tubos in miniatura, facite in 1951. Duo se vendeva a Radio Genève.
- NAGRA II - Le prime modello a production, equipate con tubos in miniatura e motor mechanic, appareva in 1953.
- NAGRA II CI - Le secunde generation, in que circuitos imprimite reimplaciava le filos electric del chassis, appareva in 1955.
- Nagra III NP - Le prime Nagra usabile in le production de filmes, appareva in 1962.
- Nagra IV-L - Iste modello monophonic, que habeva duo entratas de microphonos e incorporava un limitator de audio, se introduceva in 1968.
- Nagra 4.2 - Como le IV-L, sed addeva currente electric al microphonos e incorporava equalisatores. Se introduceva in 1972. In le annos 1980 esseva possibile modernisar un 4.2 pro registrar codice de tempore del SMPTE.
- Nagra IV-S - Un Nagra stereophonic, que registrava in duo pistas. Habeva potentiometros a duo nivellos, limitatores, e equalisatores scalonate. Se introduceva in 1971. Originalmente esseva disponibile con un crystallo de pilottone, e postea in 1984, con supporto de codice de tempore del SMPTE. Con iste supporto, un IV-S se appellava un Nagra IV-STC.
In addition a iste magnetophonos de campania, Kudelski S.A. produceva un magnetophono de studio appellate le Nagra T-Audio, designate principalmente pro uso in telecinemas pro le transferimento de quotidianos. Tote le machinas precitate usa bandas a 1/4 uncias.
Kudelski S.A. ha etiam producite un serie de magnetophonos a bobina aperte in miniatura con bandas a 1/8 uncias. Iste machinas se appella SN (Série Noire, serie nigre) e le production de illos esseva originalmente commandate per le presidente Kennedy pro le servicios secrete statounitese.