Błóta

Błóta (delnjoserbsce Błota; němsce Spreewald) su nižinowa krajina w Delnjej Łužicy, kotruž Sprjewja a jeje so rozhałžkowace rěčne promjenja a kanale přeběža. Jako łučna nižina a bahnišćo maja nadregionalny wuznam za přirodoškit a su oficielnje jako biosferowy rezerwat připóznate. Kulturna krajina Błótow bu předewšěm přez Serbow wuformowana. Błóta słušeja k najwoblubowanišim pućowanskim cilam Braniborskeje.

Karta Błótow

Typiski čołm w Błótach

Historiski dom na Lědach

Geografija

Błóta namakaja so w krajnych wokrjesach Sprjewja-Nysa, Dubja-Błóta a Hornje Błóta-Łužica. Wobsteji z wjetšich Hornich Błótow w juhu a mjeńšich Delnich Błótow w sewjeru. Mjez tutymaj dźělomaj zjednoći so Sprjewja na krótkej čarje w měsće Lubin.

Přirodna južna hranica Błótow je Łužiska wuhroda. W sewjeru twori sucha Luboraska hola markantnu krajinowu mjezu. We wuchodźe je dźensa brunicowa jama Choćebuz-sewjer kumštnje stworjena hranica Błótow.

Wotkazaj

 Commons: Błóta – Zběrka wobrazow, widejow a awdiodatajow