Clement Greenberg

Clement Greenberg

Biografía
Nacemento	16 de xaneiro de 1909 Bronx, Estados Unidos de América
Morte	7 de maio de 1994 (85 anos) Nova York, Estados Unidos de América
Educación	Universidade de Syracuse Art Students League of New York (pt) Erasmus Hall High School (en)
Actividade
Ocupación	coleccionista de arte, xornalista, crítico de arte, historiador da arte, teórico da arte
Membro de	Phi Beta Kappa American Abstract Artists (en)
Pseudónimo literario	K. Hardesh
Obra
Obras destacables (1939) Avant-Garde and Kitsch (en)
Familia
Irmáns	Martin Greenberg Sol Greenberg

Clement Greenberg, nado en Nova York o 16 de xaneiro de 1909 e finado na mesma cidade o 7 de maio de 1994, foi un influente crítico de arte estadounidense moi relacionado co movemento abstracto no seu país. En particular, promoveu o movemento do expresionismo abstracto e tivo relacións moi estreitas co pintor Jackson Pollock. Ocasionalmente escribiu baixo pseudónimo de K. Hardesh.

Traxectoria

Primeiros anos

Clement Greenberg naceu no barrio do Bronx en 1909. Os seus pai eran inmigrantes xudeus de clase media, e el era o máis vello de tres fillos. Dende a súa infancia, Greenberg debuxaba compulsivamente, ata que na súa mocidade se centrou na literatura.

Greenberg asistiu ao Erasmus Hall High School, a escola Marquand para nenos e á Universidade de Syracuse, da que se graduou cun bacharelato en artes en 1930, cum laude. Durante os seguintes anos, viaxou polos Estados Unidos traballando no negocio de mercadorías do seu pai, mais o traballo non era axeitado para as súas inclinacións, así que o deixou para traballar como tradutor. Greenberg casou en 1934, tivo un fillo o ano seguinte, e no seguinte estaba divorciado. En 1936, Greenberg tivo unha serie de empregos co goberno federal, dende a Administración de Servizos Civís ata a Administración de Veteranos e finalmente da división de avaliacións do servizo de aduanas en 1937. Nese momento comezou a escribir en serio, e pouco despois publicou nunha serie de pequenas revistas e xornais literarios.

Kitsch

Destacou por vez primeira como crítico de arte co seu artigo "Avant-Garde and Kitsch", publicado por vez primeira no xornal Partisan Review de 1939. Neste artigo Greenberg afirmou que a vangarda e a arte moderna foi un medio de resistirse á nivelación da cultura producida pola propaganda capitalista. Greenberg apropiouse da palabra alemá kitsch para describir este consumismo, aínda que as súas connotacións cambiaron dende entón cara a unha noción máis afirmativa de materiais de refugallo da cultura capitalista. A arte moderna, como a filosofía, explorou as condicións baixo as que se experimenta e se entende o mundo.

Expresionismo abstracto

Nos anos posteriores á segunda guerra mundial, Greenberg considerou que os mellores artistas de vangarda estaban a xurdir nos Estados Unidos e non en Europa. Defendeu en particular a Jackson Pollock como o mellor pintor da súa xeración, conmemorando os lenzos de «pintura xestual» all over. No artigo do ano 1955 titulado "American-Type Painting", Greenberg defendeu a obra dos expresionistas abstractos, entre eles Pollock, Willem de Kooning, Hans Hofmann, Barnett Newman, e Clyfford Still, como a seguinte etapa na arte moderna, afirmando que estes pintores estaban a avanzar cara a unha maior énfase na «planeidade» do plano pictórico. Greenberg afirmou que este carácter plano separaba a súa obra da dos antigos mestres, que consideraban o carácter plano do lenzo como un obstáculo para a pintura. Greenberg defendeu un método de autocrítica que permitise que a pintura abstracta pasase de ser «decorativo papel pintado» a unha auténtica arte. Consideraba que os Estados Unidos se converteron no gardián da «arte avanzada». Encomiou movementos similares que estaban a ter lugar no estranxeiro e, despois do éxito da exposición de Painters Eleven en 1956 cos artistas abstractos estadounidenses na galería Riverside de Nova York, viaxou a Toronto a ver a obra do grupo en 1957. Quedou particularmente impresionado polo potencial de pintores como William Ronald e Jack Bush, e máis tarde trabaou unha íntima amizade con Bush. Greenberg viu na obra post-Painters Eleven de Bush unha clara manifestación do cambio dende o expresionismo abstracto cara á pintura dos campos de cor e a abstracción lírica, un cambio que el reclamara na maior parte dos seus escritos da época.

Rexeitou o pop art da década de 1960, unha tendencia claramente influída pola cultura kitsch. A súa oposición ás teorías posmodernas e aos movementos socialmente comprometidos dentro da arte levaron a que fose rexeitado por artistas e historiadores da arte posteriores.

Abstracción postpictórica

Co tempo, Greenberg preocupouse porque algúns expresionistas abstractos quedaran reducidos a un «conxunto de manierismos» e buscou unha nova serie de artistas que alcanzasen unha certa pureza que revelase a veracidade do lenzo, e os aspectos bidimensionais do espazo («planeidade»). Greenberg cuñou a expresión «abstracción postpictórica» para distinguilos do expresionismo abstracto, ou abstracción pictórica, tal como Greenberg prefería chamala. A abstracción postpictórica reaccionou contra a abstracción xestual e ramificouse en dous grupos, os pintores Hard-Edged como Ellsworth Kelly e Frank Stella, que exploraron as relacións entre formas e bordos, e os pintores Color-Field como Helen Frankenthaler e Morris Louis, quen verteron pintura diluída no lenzo sen imprimación para explorar os aspectos da cor pura e fluída.

Na cultura popular

Greenberg foi interpretado polo actor Jeffrey Tambor no filme de 2000 Pollock, sobre a vida de Jackson Pollock.

Véxase tamén

Bibliografía

• Greenberg, Clement. Art and Culture, Beacon Press, 1961
• Greenberg, Clement. Late Writings, edited by Robert C. Morgan, St. Paul: University of Minnesota Press, 2003.
• Clement Greenberg: A Critic's Collection by Bruce Guenther, Karen Wilkin (Editor), Portland: Portland Art Museum, 2001. (ISBN 0-691-09049-1)
• Greenberg, Clement. Homemade Esthetics: Observations on Art and Taste. Oxford University Press, 1999.
• Jones, Caroline A. Eyesight Alone: Clement Greenberg's Modernism and the Bureaucratization of the Senses. University of Chicago Press, 2005.Arquivado 31 de outubro de 2020 en Wayback Machine.
• Kuspit, Donald. Clement Greenberg: Art Critic. University of Wisconsin, 1979.
• Marquis, Alice Goldfarb. Art Czar: The Rise and Fall of Clement Greenberg. Boston: MFA Publications, 2006.
• O'Brian, John. Clement Greenberg: The Collected Essays and Criticism. 4 vols. Chicago: University of Chicago Press, 1986 and 1993.
• Rubenfeld, Florence. Clement Greenberg: A Life. Scribner, 1997.
• Tekiner, Deniz. "Formalist Art Criticism and the Politics of Meaning." Arquivado 03 de febreiro de 2011 en Wayback Machine. Social Justice, Issue on Art, Power, and Social Change, 33:2 (2006).
• Anatoly Rykov. Clement Greenberg and American theory of contemporary art in the 1960s" in Art History, Journal of the Russian Institute of Art History. 2007, no. 1-2, pp. 538–563.

Ligazóns externas

• Clement Greenberg Arquivado 06 de novembro de 2020 en Wayback Machine. – Author page that includes text of many works by Greenberg
• Clement Greenberg – Art Critic on The Art Story Foundation website
• Clement Greenberg papers, 1928–1995 The Getty Research Institute, Los Angeles, California.