Quinase

Mecanismos de activación e inactivación da PKA. A PKA está en forma de tetrámero inactivo cando hai pouco AMPc, pero cando hai moito está en forma de monómero activo, e pode catalizar a transferencia dun fosfato desde o ATP a un substrato.

As quinases ou cinases (chamadas en inglés kinases) ^[1] son un tipo de encimas que transfiren grupos fosfato desde o ATP a un substrato específico ou diana. O proceso chámase fosforilación. A diana pode activarse ou inactivarse por medio da fosforilación, polo que as quinases están implicadas nos mecanismos de regulación e sinalización celular. Todas as quinases necesitan un ión metálico divalente como o Mg²⁺ ou o Mn²⁺ para transferir o grupo fosfato. Un exemplo de quinase é a PKA (proteína quinase A), é dicir, a quinase dependente de AMP cíclico.

Segundo a nomenclatura oficial as quinases son ATP(x)fosfotransferases, onde (x)= molécula á que se transfire o grupo fosfato.

Clasificación das quinases

Unha clasificación actualmente en uso da superfamilia das quinases divídeas en: quinases convencionais (ePKs) e quinases atípicas (aPKs).

Quinases convencionais

As quinases convencionais clasifícanse en oito familias:

Familia AGC: inclúe as quinases enlazadas a proteínas G.
Familia CAMKs: inclúe as quinases reguladas por calmodulina.
Familia CMGC: inclúe as quinases dependentes de ciclinas.
Familia CK1: inclúe a caseína quinase.
Familia RGC: inclúe os receptores asociados a guanilato ciclase.
Familia STE: inclúe as quinases MAP.
Familia TK: inclúe as tirosina quinases.
Familia TKL: inclúe proteínas tipo tirosina quinases.

Quinases atípicas

As quinases atípicas non teñen unha secuencia moi similar á das quinases convencionais, mais teñen a actividade encimática de quinase. Comprenden:

Familia alfa
Familia PIKK
Familia PDHK
Familia RIO

Notas e referencias

↑ Manning G, Whyte DB.; et al. (2002). "The protein kinase complement of the human genome". Science 298 (5600): 1912–1934. PMID 12471243. doi:10.1126/science.1075762.

Hanks, S. K. & Hunter, T. Protein kinases 6. The eukaryotic protein kinase superfamily: kinase (catalytic) domain structure and classification. FASEB J., maio de 1995, 9(8), 576-596.

[pmid12471243-1] Manning G, Whyte DB.; et al. (2002). "The protein kinase complement of the human genome". Science 298 (5600): 1912–1934. PMID 12471243. doi:10.1126/science.1075762.

[1]