Ríu

Avissu Esti endilgui ebi sel revissau por un corretol.

Un ríu es una corrienti natural d'água que trascurri de horma continua. Posei un caudal determinau i desembocaúra (parti final del ríu) nel mari, n'un lagu o n'otru ríu (en que'l su chascu se le da el nombri de afluenti). Angunas vezis acaban en zonas desélticas ondi las sus águas se perdin pol filtración i evaporación: es el chascu los rius alótonus (anombraus assina ebiu a que las sus áuguas procein d'otrus lugaris con climi mas úmeu), cumu el chascu del Okavango nel farsu delta ondi desemboca u numerosus uadis del Sáhara i d'otrus desieltus.

Riu Sar en Galícia

Cuandu el riu nu tien albondu longol i anchón recibi el nombri de regachu.

Topugrafia

Un riu está hormau pol varias partis hundamentalis. Polo heneral, los rius, especialmenti los mas grandis, se deviin en tres partis prencipalis, dalcuerdu cola su capaciá erosiva i e trasporti e seimentus: cursu superiol, cursu meyu i cursu inferiol. Desistin angunus rius que presentan carateris especialis nesti sintiu: ena imahin correspondienti a riu Amaçonas cerca e Manaos se puei deferencial el colol las áuguas ena confluencia el Amaçonas, en primel términu, con riu Negro, cuyu nombri es ebiu a Mariel Costancio i el colol mas escuru i con menus seimentus d'esti úrtimu riu pol hechu e qu'el su recorriu s'alcuentra ena su mayol parti sobri el escú guayanés, con áuguas enas que los seimentus arcillosus mu son poquinus.

Cursu meyu

Polo heneral, nel cursu meyu dun riu suelin alternarsi las áreas u zonas ondi el riu erosiona colos lugaris ondi assitia parti los sus seimentus, lo cual es ebiu, prencipalmenti, a las flutuacionis de la pendienti i a la enfruéncia que recibin con respetu al caudal i seimentus los sus afluentis.

Cursu baxu

Enas partis ondi el riu fluyi en áreas relativamenti pranas, sueli hormal meandrus: estableci curvas regularis, puyendu chegal a hormal lagus en herraura. Al correl el riu, lleva emportantis cantiais de sedimentus, los que puein dal orihin a islas seimentárias, hucheás deltas i tamién puei dal lugal a la elevación el cauci pol encima el nivel de la llanura, polo que abondus rius suelin fluil paralelus al mesmu pol nu puel desembocal pola mayol elevación el riu prencipal: son los rius tipu Yazoo.

Aquellus rius cuya desembocaura termina n'una boca e gran anchón i prohunda horman estuarius.

Crasis de rius

Perennes

Estus rius son propius de las rehionis ondi nu desisti un déficit d'escorrentia escesivamenti largu. Inclusu enas áreas ondi lluevi mu pocu puein desistil rius con caudal costanti si desisti una alimentación freática (es izil, d'auguas suterráneas) suficienti. La mayol parti los rius puein esprimental cámbeus estacionalis i diarius nel su caudal, ebiu a las flutuacionis de las caraterísticas de la cobertura vehetal, de las lluvias i d'otrus cámbeus el tiempu amosféricu, cumu la nubosiá, insolación, evaporación u mas bien, evapotraspiración, etc.

Estacionalis

Estus rius i ramblas son propius de zonas con climi tipu meiterraneu, ondi ai estacionis mu deferenciás, con invielnus úmeus i vranus secus.

Transitorius

Son los rius de zonas con climi desérticu u secu, de caudal esporádicu, enus cualis se puei estal sin precipitacionis duranti añus. Estu es ebiu a la poca frecuencia e las tormentas en zonas de climi deserticu. Peru cuandu desistin descargas de tormenta, que muchas vezis son torrencialis, los rius surhin liheramenti i a gran velociá. Se llama wadis u uadis a los caucis abati siempri secus de las zonas desérticas, que puein aportal a tenel crecias violentas i mu brevis.

Alótonus

Son rius, heneralmenti e zonas áridas, cuyas auguas procein d'otras rehionis (velaí el su nombri) mas lluviosas.

Cuencas de los rius

Angunus rius cortus i torrentis puein fluil endi la su caecera u encetu, hata la mari sin convertilsi en afluentis u tributarius d'otru mayol, ni recibil augua d'otrus rius. El restu los rius horma parti dun sistema fluvial ocupandu una cuenca idrográfica.

Rius i paisahis

Los rius erosionan canchus i seimentus, chegandu a abril caucis i vallis, moelandu el paisahi. El cauci prohundu e riu Colorado (Nortiamérica), recortau en angunus lugaris hata una prohundiá e 1,5 km, hormandu el Gran Cañón. I el cañón de riu Mages, en Perú, es entovia mas hondu, con unus 3 km.

Los vallis fluvialis en heneral tiinin horma e V, sobri tó enas zonas montañosas de levantamientu recienti, peru esta horma se moifica a lo largu el cursu el riu, ampliandu amás el su tamañu, pendienti, perfil trasversal, capaciá e trasporti e seimentus i algotras muchas caraterísticas.

Biologia

Ria e Ribadesella

La frora i fauna los rius son deferentis a la que s'alcuentra enus océanus, ya qu'el augua es durci. Las especis que vivin enus rius s'an tiniu qu'adatal a las corrientis i a los desnivelis. Sin embargu, desistin abondas ececionis, cumu es el chascu e los salmonis u los tiburonis d'augua durci e Nicaragua, i tamién nel chascu las especis marinas que penetran enus deltas oceánicus llevaus pola pleamari e las mareas i corrientis oceánicas, tal cumu pasa nel delta el Orinoco i el Amazonas. Lo mesmu sucei colos estuarius de los rius, inque n'esti chascu, la entrá d'especis marinas enus estuarius de los rius sueli sel momentánea (duranti el fluhu u pleamari), lo cual es ebiu a que los estuarius se vacian duranti el refluhu u bahamari mentris qu'enus deltas, lo que chamba duranti las mareas es la mayol u menol saliniá las sus áuguas.

Contaminación

El augua es un recursu renovabli en peligru pol culpa e la ativiá umana. Tol augua pura proceenti las lluvias, ya enantis de chegal al suelu recibi una primera carga contaminanti, cuandu disuelvi sustancias cumu anídriu carbónicu, óxiu d'azufri i e nitróhenu, que la conviertin en lluvia ácia. Ya nel suelu, el augua discurri pola superfici u se filtra a capas suterráneas. Al correl polos campus el augua el riu se carga con pesticias i cuandu pasa pol ciáis arrastra produtus cumu naftas, aceitis d'autumóvilis, metalis pesaus, etc. Los rius muestran una cierta capaciá pa deshacelsi e los contaminantis, peru pa esu nesecitan tenel un tramu mu largu nel cual las baterias puean realizal el su labutu depuraol. Nun riu contaminau pol matéria orgánica se distinguin tres zonas a partil el puntu e contaminación:

a) Zona polisaprobia: Mu contaminá. Elevá puebración de baterias.

b) Zona mesosaprobia: Contaminación meya. Las baterias ya an eliminau gran parti la contaminación orgánica.

c) Zona oligosaprobia: El augua está en condicionis similaris a las que tinia enantis de que se huera prouciu la contaminación.

Rius con mayol longol

Resurta dificultosu miil el longol desatu dun riu ebiu a las propieais el terrenu pol ondi fluyi. A continuación se listan los 10 mayoris rius el mundu con un longol aprosimau:

1. Amaçonas (7,020 qm).
2. Nilu (6,695 qm).
3. Yangzi (6,380 qm).
4. Riu Mississippi (6,270 qm).
5. Riu Amarillo u Huang He (5,464 qm).
6. Obi (5,400 qm).
7. Amur (4,410 qm).
8. Congo (4,380 qm o 4,670 qm, sigún se consieri el lugal d'encetu d'esti riu).
9. Lena (4,260 qm).
10. Mackenzie (4,240 qm).

Regulación entrinacional

Tó Estau eherci soberania territorial sobri el cursu u porción el cursu dun riu que horma parti el su territoriu.

Desistin dos categorias de rius:

• Los rius enterioris u nacionalis, que tinin el su cursu nel territoriu dun Estau.
• Los rius que nel su cursu separan u atraviesan el territoriu e mas dun Estau, hucheaus binacionalis u murtinacionalis. Estus rius puein sel fronteriçus u sucesivus, u dambas dos cosas a la vezi.

Los rius entrinacionaliçaus son aquellus enus cualis desisti libertá e navegación que sigún se mas u menus amplia, puei sel a favol de tolas banderas u sólu e los ribereñus.

La pulicia i almenistración dun riu abiertu a la libri navegación suscita numerosus pobremas: el réhimin aduaneru, el pilotahi, los reglamentus de puertu, las tasas... La norma heneral es qu'en prencipiu la alministración de ca setol del riu es ehercia pol respetivu ribereñu. Una hórmula qu'á chegau a evital pobremas, sobri tó enus rius uropeus, ondi la concentración de la navegación es mu grandi, consisti nel establecimientu e comisionis entrinacionalis d'alministración fluvial.

Potamología

Potamulohia es el estuyu los rius, qu'abarca concetus cumu el su caudal, cauci, rehoyu, cursu u corrienti, réhimin fluvial, perfilis (lonhitudinal i trasversal), afluentis i la su emportancia, eculohia, frora, fauna, recursus ídricus i idruelétricus, navegación fluvial, etc. Vini a sel una parti la idrugrafia.

Guipal tamién

• Domiñu Púbricu Idráulicu