Rusia
Rusia o la Federación Rusa ye'l país más grande del mundu, espardiéndose per Europa y Asia. Tien una superficie de 17.075.400 quilómetros cuadraos, más de la novena parte de la tierra firme del planeta, con una gran variedá d'entornos naturales y relieves. Esta república semipresidencialista, aniciada por 83 elementos federales, ye'l novenu país por población al tener 142.000.000 habitantes. Ocupa tol norte d'Asia y alredor del 40% d'Europa (cimeramente Europa Oriental), siendo un país trescontinental. En Rusia hai 9 fasteres horaries, dende UTC+2 hasta UTC+11, ensin incluyir UTC+4. Rusia tien les mayores reserves de recursos minerales y enerxéticos tovía ensin esplotar, y ye considerada la mayor superpotencia enerxética. Tien les mayores reserves de recursos forestales y la cuarta parte d'agua doce non conxelada del mundu.
Rusia ye, xunto con China, el país qu'allenda con más países y el que tien les llendes más grandes. Tien llendes comunes colos vinientes países (entamando pel noroeste y siguiendo'l sentíu antihorariu): Noruega, Finlandia, Estonia, Letonia, Bielorrusia, Lituania, Polonia, Ucraína, Xeorxa, Azerbaixán, Kazakstán, China, Mongolia y Corea del Norte. Amás tien llendes marítimes con Xapón y Estaos Xuníos (al traviés d'Alaska). Les sos costes tan bañaes pol Océanu Árticu, l'Océanu Pacíficu y por mares interiores como'l Mar Bálticu, el Mar Negru y el Mar Caspiu.
La historia del país entamó colos eslavos orientales. Los eslavos remanecieron como un grupu reconocible n'Europa ente los sieglos III y VIII d.C. Fundáu y dirixíu por una clas noble viquinga guerrera y los soso descendientes, el primer estáu de los eslavos orientales, la Rus de Kiev, aprució nel sieglu IX y adoptó'l cristianismu procedente del Imperiu Bizantín en 988, entamando una remestura de les cultures bizantina y eslava que definiría la cultura rusa durante'l siguiente mileniu. Posteriormente la Rus de Kiev desanicióse en munchos pequeños estaos feudales, de los que'l más poderoso yera'l Principáu de Moscú, que se tornó na fuercia cimera de l'amestadura rusa y la llucha pola independencia escontra la Horda d'Oru. Dapoco Moscú ameció los principaos rusos de la redolada y entamó a dominar nel legáu cultural y políticu de la Rus de Kiev. Nel sieglu XVIII la nación espardióse per aciu de la conquista, anexón y esploración hasta tornase nel Imperiu rusu, el tercer imperiu más grande de la historia al espardese dende Zaratu de Polonia|Polonia]] nel oeste, hasta l'océanu Pacíficu y Alaska.
Rusia afitó un poder y influencia mundial dende los tiempos del Imperiu rusu hasta ser el mayor y dominante país constituyente de la Xunión Soviética (XRSS), el primer y más grande estáu socialista constituyíu constitucionalmente y una superpotencia reconocida. El país puede presumir d'una llarga tradición d'escelencia en tolos aspeutos de les artes y les ciencies. La Federación Rusa fundóse al sumise la Xunión Soviética en 1991, pero ye reconocida como la heredera de la personalidá llegal de la Xunión Soviética. La so economía tien un de los mayores crecimientos del mundu. Ye l'octavu país por PIB nominal, col quintu presupuestu militar más grande del mundu. Ye un de los cinco países con armes nucleares reconocíos y tien el mayor arsenal d'armes de desaniciu masivu del mundu. Rusia ye miembru permanente del Conseyu de Seguridá de Naciones Xuníes, miembru del G8, APEC y OCS, con gran influencia nel espaciu postsoviéticu, particularmente na Comunidá d'Estaos Independientes (CEI).
Etimoloxía
[editar | editar la fonte]El nome de Rusia en rusu ye "Rossía" (Россия), que vien del griegu "Ρωσία" (AFI: [rosˈia]), que ye como se nomaba a la Rus' (Русь) nel Imperiu Bizantín. Sobro l'orixe del términu "Rus'" hai delles teoríes, pero denguna d'elles ye aceptada por toos. Les versiones dixébrense n'históriques, que se basen n'autores contemporáneos, llingüístiques y toponímiques. Asina, les cimeres hipótesis son la histórica bizantina, la indo-iranín, la llingüística finesa, la histórico-toponímica prusiana, amás de delles toponímiques.
Historia
[editar | editar la fonte]Antigua Rusia, eslavos orientales y la Rus de Kiev
[editar | editar la fonte]Enantes del sieglu I, les grandes tierres de Rusia meridional foron poblaes por delles tribus, mui espardíes pel gran territoriu, como los proto-indoeuropeos y los escites. Ente'l sieglu III y el sieglu VI, les estepes foron asolaes por foles socesives d'invasiones nómades, dirixíes por tribus belicoses que davezu continuaríen el so avance hasta Europa, como foi'l casu de los hunos y los avaros.
Na dómina del sieglu V al sieglu VII los avances humanos tan representaos pola cultura de Dyakovo, en plena edá del fierro, qu'ocupaba la fastera del Volga Superior, el Valday y la zona de ríu d'Oká. La cultura Dyakovo taba formada poles xentes ugrofineses, los antepasaos de les tribus Merya, Muroma, Meshchera y Veps. Tola toponimia rexonal ugrofinesa y el so caráuter hidrónimu llévanos a esta cultura, un exemplu ye'l ríu Yauza, afluente del Moscova, y escurque'l mesmu ríu Moscova tamién.
Los turcos y los kazakos reinaron nes estepes más baxes de la cuenca dle Volga ente los mares Caspiu y Negru hacia'l sieglu VIII. Encalcaron les sos bultables lleis de tolerancia cosmopolita. Los jázaros foron l'amecedura comercial cimera ente'l Bálticu y l'Imperiu musulmán Abbasí allugaos en Bagdag. Tornáronse n'importantes aliaos del Imperiu Bizantín y aniciaron una riestra de guerres exitoses escontra los Califatos Árabes.
Nesta dómina, la pallabra "Rhos" o "Rus" foi primeru aplicao a los varegos y lluegu tamién a los eslavos qu'aniaben na rexón. Na dómina del sieglu X al [[sieglu XI] la Rus de Kiev o Rusia medieval llegó a ser el principáu más grande d'Europa y ún de los más bayurosos, per aciu del comerciu estremáu tanto con Europa como con Asia. L'apertura de nueves rutes del comerciu con Oriente nel tiempu de Les Cruzaes contribuyó a la decadencia y a la escachadura del principáu na fin del sieglu XII.
Na dómina del sieglu XI y el sieglu XII, les incursiones constantes de les tribus turques nómades, como los polovtsy y los pechenego, llevaron a la migración masiva de les poblaciones eslaves, del sur fértil a les rexones más arbolaes del norte, conocíos como Zales'e. Los estaos medievales de la República de Nóvgorod y el Principáu de Vladímir-Súzdal remanecieron como socesores del Rus de Kiev. Mentanto, el cursu medianu del ríu Volga vieno a ser dominaáu pol estáu musulmán de Bulgaria del Volga. Como munches otres partes d'Eurasia, estos territorios foron invadíos polos mongoles, formando l'estáu de la Horda Dorada que saquearía los principaos rusos per más de trés sieglos. Cerca de la metá de la población rusa perecerá demientres la invasión mongola; más sero conocíos como los tártaros, gobernarán les fasteres meridionales y centrales de Rusia mientres los territorios d'anguaño, Ucraína y Bielorrusia, serán inxiríos nel Gran Ducáu de Lituania y Polonia, dixebrando asina a los rusos ente bielorrusos al norte y ucraínos al oeste.
Al igual que nos Balcanes, el movimientu nómada atrasió'l desendolcu económicu y social del país. Sicasí, la República de Nóvgorod xunto cola ciudá de Pskov caltuvieron dalgún gráu d'autonomía nel tiempu de la yunta mongola y foron quienes en gran parte a evitar les atrocidaes qu'afectaron al restu del país. Nel añu 1240, La República de Nóvgorod, dirixida por Alexánder Nevsky (1220-1263), refugó los intentos de los cruzaos xermánicos de colonizar la rexón.
Principáu de Moscú
[editar | editar la fonte]De miente estremada al so líder espiritual, l'Imperiu Bizantín, Rusia, baxo'l lideralgu de Moscú, foi quien a repollecer y organizar la so propia griesca de reconquista, dominando a los sos enemigos y amestándose los territorios perdíos. Dempués de la cayida de Constantinopla en 1453, la Rusia moscovita queda como l'únicu estáu cristianu na llende d'Europa Oriental, consiguiendo asina'l drechu de vindicar la socesión del llegáu del Imperiu Romanu d'Oriente. Tovía baxo'l dominiu de los mongolo-tártaros, el ducáu de Moscú entamó a afirmar la so influencia en Rusia Occidental nel empiezu del sieglu XIV. L'aprucir espiritul, sofitáu pola Ilesia Ortodoxa y San Sergii Radonezhsky, valió al ducáu de Moscú a derrotar a los mongolo-tártaros na Batalla de Kulikovo en 1380.
Iván IV "El Terrible" (1530-1584) pon fin al control de los invasores, postiando rexones averaes baxo'l dominiu de Moscú. Ye'l primeru en tomar el títulu de "Gran Duque de toles Rusies".
Nel entamu del sieglu XVI, l'Estáu rusu tomó como metes cimeres recuperar tolos territorios perdíos pola mor de la invasión mongolo-tártara y protexer la fastera meridional escontra los ataques de los tártaros de Crimea (Les Guerres Ruses de Crimea) y de dalgunos pueblos turcos. Los fidalgos, recibiendo un señoríu del soberanu, foron obligaos a servir nel exércitu. El sistema del señoríu llegó a ser la base pa la caballería noble. En 1547, Iván IV foi coronáu oficialmente como'l primer Zar de Rusia. Nel so reináu, Iván IV ameció rexones de Kazán y Astracán ente otres y tornó Rusia nun estáu multiétnicu. Iván IV promulgó un nuevu códigu de lleis (Sudebnik de 1550), afitando'l primer cuerpu representativu feudal (Zemsky Sobor) y inxirió l'autoxestión llocal nes rexones rurales. A fines del sieglu, cosacos rusos fundaron los primeros afitamientos en Siberia Occidental. El so reináu tamién foi marcao pola llarga y fracasada guerra escontra la coalición de Polonia, Lituania y Suecia pal accesu al comerciu al traviés del mar Bálticu.
Iván llevó a cabu una riestra de purgas na aristocracia feudal, escurque provocaes pola traición por parte del príncipe Kurbsky, poles que entró na historia como "El Terrible". Dempués de la so muerte, los fracasos militares, los andancios, y les probes colleches debilitaron l'Estáu, y los tártaros de Crimea quemaron la ciudá de Moscú. La muerte de los fíos d'Iván amestada a la fame de 1601-1603 llevan a la guerra civil ya la intervención foriata.
A mediaos del sieglu XVII había establecimientos rusos en Siberia Oriental y na península de Chukchi al traviés del ríu Amur. En 1648 el navegante rusu Semión Dezhniov descubre l'estrechu que desaparta Siberia d'Alaska. Más sero, en 1728, será esplorao pol navegante danés Vitus Bering y llevará'l so nome (estrechu de Bering).
Imperiu rusu
[editar | editar la fonte]El control moscovita de la nación naciente continuó dempués de la intervención polaca baxo la dinastía sosiguiente de Románov, entamando col Zar Miguel I de Rusia en 1613. Pedru I el Grande, quien gobernó'l Zaratu Rusu, derrotó al Imperiu suecu na Gran Guerra del Norte, forciándolu a ceder Karelia Occidental y Ingria (dos rexones perdíes por Rusia nel "Tiempu Abegosu" y Livonia (anguaño Estonia meridional y Letonia septentrional). Esto afitó l'accesu del Imperiu rusu al mar y el comerciu marítimu, n'Ingria. Fundó en 1703 una nueva capital, San Petersburgu y foi, sobremanera, responsable de llevar la cultura d'Europa Occidental a Rusia, pola mor de les sos reformes.
Dempués d'estes reformes, Rusia tuvo poder n'Europa. Catalina la Grande, que gobernó ente 1762 y 1796, continuó los esfuercios de Pedru I allugando a Rusia como ún de los grandes poderes europeos. Como exemplos de la participación europea nel sieglu XVIII, encalcan la Guerra de Socesión Polaca y la Guerra de los Siete Años. Tres la dixebra de Polonia, Rusia consiguió bultables territorios del oeste, que s'afayaben poblaos cimeramente por persones de relixón ortodoxa. Por aciu de les guerres escontra l'Imperiu otomanu, Rusia enantó les sos llendes hasta'l mar Negru teniendo como oxetivu la proteición de la rexón cristiana de los Balcanes escontra los turcos. En 1783 Rusia y el Reinu Xeorxanu (que foi estragao cuasi dafechu poles invasiones perses y polos turcos) firmaron el tratáu de Georgievsk pol que Xeorxa (Kartl-Kakheti) recibió'l valir rusu.
En 1812, tres regunir cuasi mediu millón de soldaos franceses y provenientes de los otros estaos conquistaos n'Europa, Napoleón invadió Rusia. Sicasí, tres tomar Moscú, foi forciao a retirase hacia Francia. Cuasi'l 90% de les fuercies invasores perecieron nes batalles col exércitu rusu, per aciu de los guerrilleros y del abegosu iviernu. Los exércitos rusos finaron la escorribanda del enemigu tomando la so capital, París. Los oficiales de les guerres napoleóniques llevaron a Rusia les idees del lliberalismu y inclusive intentaron amenorgar los poderes del Zar na rebelión albortada de los dekabristes en 1825, que foi siguida por delles décades de represión política. Otro de los resultaos de les guerres napoleóniques, foi la inxertadura de Besarabia y Finlandia nel Imperiu Rusu. Les polítiques conservadores de Nicolás I de Rusia entorgaron el desendolcu del Imperiu Rusu a mediaos del sieglu XIV. Como resultáu, el país foi derrotao na Guerra de Crimea (1853-1856) por una alianza na que taben Gran Bretaña, Francia, l'Imperiu Otomanu y Piamonte-Cerdeña ente otros.
El socesor de Nicolás I de Rusia, Alexander II (1855-1881 foi foricao a aniciar una riestra de reformes completes y asoleyó un decretu aboliendo la servidume, en 1861. Les grandes reformes del reináu d'Alexander II dirixeron cada vegada más rápido'l desendolcu y l'inclín del capitalista Sergéi Witte hacia la industrialización. Una atmósfera d'eslavofilia diba enantando, liderada pola victoria de Rusia na Guerra Ruso-Turca. Esto puxó al Imperiu Otomanu a reconocer la independencia de Rumanía, Serbia y Montenegro, amás de l'autonomía de Bulgaria.
El fracasu de les reformes ente otres coses, afaló que continuaren los problemes. Na viéspera de la Primer Guerra Mundial, la posición del Zar Nikolái II y la so dinastía perdió pesu.
El gobiernu rusu nun quería participar na Primer Guerra Mundial, pero nun podía aceptar la dominación alemana d'Europa. Rusos de clas alta y burgueses aidaron nel puxu de guerra rusu, anque llabriegos y trabayadores participaron con menos entusiamu. Alemaña tenía un gran exércitu y un importante poder industrial, teniendo amás a Austria y al Imperiu Otomanu como aliaos. El puxu rusu na guerra foi enorme. Teniendo ganao delles grandes batalles en 1916, l'exércitu alloñóse cuando españó la Revolución Rusa de 1917, en parte por razones económiques, pero sobromanera porque la falta d'esfotu públicu que yá había hacia'l réxime afondóse pola corrupción.
El líder bolxevique Vladimir Ilich Lenin afuxó a Finlandia por seguridá en xunetu de 1917. Ellí escribió "L'Estáu y la Revolución", faciendo un llamáu a una nueva forma de gobiernu afitáu sobro conseyos de trabayadores o sóviets. Tornó a Petrográu n'ochobre inspirando la Revolución d'Ochobre col lema "Tol poder pa los soviets!". Lenin dirixó'l derrocamientu del Gobiernu provisional rusu del Institutou de Smolny dende'l 6 al 8 de payares de 1917. Tres la fin de la Revolución Rusa de 1917, una estaya política marxista llamo a los bolxeviques a tomar el poder en Petrográu y Moscú baxo'l lideralgu de Lenin. L'asaltu y capitulación del Palaciu d'Iviernu na nueche del 7 al 8 de payares marcaron l'entamu del gobiernu soviéticu.
El Zar Nikolai II y la familia real foron asesinaos y con ello finó la cabera dinastía rusa. Per un tiempu camentóse que la fía menor de la familia, la princesa Anastasia, sobreviviera, dalgo que nunca llegó a confirmase.
Revolución de 1917 y fin de la dómina zarista
[editar | editar la fonte]Magar Rusia s'industrializaba rápido, malpenes una pequeña parte de la población, sobromanera nobles y dalgunos industriales, teníen bones condiciones de vida. Los llabriegos yeren probes y, magar la reforma agraria d'Alexander II, yera mui abegosu acceder a la propiedá de la tierra. Les socesives derrotes en batalles durante la I Guerra Mundial y el descontentu xeneralizáu de la población, llevaron a que la economía entamara a deteriorase, lo qu'afaló al tracamundiu social y a delles revueltes y intentos revolucionarios. Estes revoluciones tienen dos feches: 1905 y 1917. Na revolución de 1905 entama la fin de la dómina zarista, cuando Rusia foi derrotada ensin esperalo por Xapón tres una guerra ente dambos países. Xapón yera un país pequeñu y de sonce nivel teunolóxicu y la derrota afeutó a la popularidá del zar Nikolai II. Tamién en 1905 un grupu de trabayadores vindicó al Zar reformes económiques y sociales. Esti movimientu foi violentamente reprimío poles tropes del Zar, que mataron a dellos trabayadores, siendo conocío'l socesu como "Domingu Sangrientu". Dende entós entamaron a aniciase los primeros sóviets.
El poder de los soviéticos y la influencia de la revolución de 1905 foi sumiendo nos siguientes años; sicasí, cola entrada de Rusia na I Guerra Mundial, les condiciones de vida de gran parte de la población foron a peor, faciendo qu'apaecieren nueves revueltes que daríen orixe a la Revolución de Febreru de 1917. El Partíu Social-Revolucionariu, los menxeviques, el Partíu Democráticu Constitucional y los bolxevique intentaron -desapartaos- esquerar nueves fórmules de gobiernu pal país. Esto dio llugar a una curtia República d'inspiración occidental liderada por Alexander Kerensky. El nuevu réxime nun prosperó, sobro too, pola oposición de los cabezaleros de la República a sacar a Rusia de la guerra. Ello favoreció a los bolxeviques que, magar ser minoritarios, yeren los únicos que defendíen la salida del país del conflictu. Asina xurdió la revolución d'ochobre, de xeitu bolxevique, y la posterior toma del poder por parte de los soviets lideraos po Lenin y Trotsky, qu'aniciaron el Partíu Comunista y entamaron a empobinase a l'apaición de la XRSS.
Tres la victoria de los bolxeviques, Rusia sufre una Guerra Civil (1918-1922) ente partidarios de la revolución bolxevique (Exércitu Roxu) y opositores a ella (Exércitu Blancu), sofitaos estos por delles potencies foriates. Lenin llegó a confiscar l'aniciu agrícola p'abastecer a los soldaos y a zarrar grandes compañíes privaes tres la so victoria.
Xuntura de les repúbliques soviétiques
[editar | editar la fonte]El 29 d'avientu de 1922 una conferencia de delegaciones plenipotenciaries de la RSFS de Rusia, RFSS de Trescaucasia, RSS d'Ucraína y RSS de Bielorrusia aprobaron el Tratáu d'Aniciu de la XRSS y la Declaración del Aniciu de la URSS, formándose la Xunión de Repúbliques Socialistes Soviétiques. Estos dos documentos foron confirmaos pol primer congresu soviéticu de la XRSS y firmaos polos cabezaleros de les delegaciones Mikhail Kalinin, Mikha Tshakaya, Mikhail Frunze, Grigory Petrovsky y Aleksandr Chervyakov el 30 d'avientu de 1922. El 1 de febreru de 1924 la URSS foi reconocida pola primer potencia mundial daquella, l'Imperiu Británicu.
Dende los primeros díes del poder soviéticu en 1917 entamó la re-estructuración intensiva de la economía, la industria y la política del país. Gran parte fízose según los Decretos Iniciales Bolxeviques, documentos del gobiernu soviéticu, firmaos por Vladimir Lenin. Ún de los adelantos más importantes yera'l plan GOELRO, qu'afalaba una re-estructuración fonda de la economía soviética afitada na lletrificación total del país. El plan principió en 1920, desendolcándose durante un periodu de 10 a 15 años. Supunxo l'aniciu d'una rede de trenta centrales llétriques rexonales, ente elles diez grandes centrales hidrollétriques y la lletrificación de numberoses empreses industriales. El plan sirvió pal siguiente Plan Quinquenal.
La dómina de Stalin
[editar | editar la fonte]Dempués de la dura política económica afitada polos bolxeviques durante la Guerra Civil, el gobiernu soviéticu permitió que dalgunes empreses privaes acompangaren cola industria nacionalizada nos años 1920. Igualmente, el requisamientu total de los escedentes alimenticios nel campu foi camudao por impuestos sobro los ialimentos. Anque dalgunes d'estes midíes foron aldericaes por cabezaleros soviéticos, consideróse necesariu pa evitar que la esplotación capitalista tornara a la Xunión Soviética. Les mientes económiques foron el telón de fondu na llucha pol poder que se desencadenó ente los cabezaleros soviéticos tres la muerte de Lenin en 1924. Postiando dapoco la so influencia y aislando a los sos rivales dientro del partíu Iosif Stalin tornóse nel cabezaleru de la Xunión Soviéticu a mediaos de los años 1920.
En 1928 Stalin inxirió'l Primer Plan Quinquenal empobináu a aniciar una economía socialiega. Esto, a diferencia del internacionalismu espresáu por Lenin y Trotsky al traviés del cursu de la Revolución. Na industria, l'estáu fízose col control de toles empreses y anició un programa intensivu d'industrialización; na agricultura afitáronse granxes coleutives por tol país. Hubo resistencia espardida de llabriegos ricos que caltuvieron granu, siendo'l resultáu una llucha azurniada escontra les autoridaes y la fame, causando millones de muertes. La Gran Purga de Stalin nel partíu eliminó a munchos "vieyos bolxeviques" que tomaren parte na Revolución con Lenin. Mentanto, bien de ciudadanos soviéticos foron prindaos y unviaos al Gulag (Alministración Cimera pa Campamentos de Trabayu Correutivos), una gran rede de campamentos de trabayu forciaos, o cenciellamente executaos. Magar el tracamundiu de mediaos de los años 1930, la Xunión Soviética desendolcó una economía industrial bultable años enantes de la Segunda Guerra Mundial.
Los años trenta vieron l'andecha más averada ente los países Occidentales y la XRSS. En 1933 afitáronse les rellaciones diplomátiques con Estaos Xuníos y cuatro años más sero la URSS sofitó activamente a la Segunda República Española na Guerra Civil Española escontra los fascistes italianos y alemanes. Sicasí, tres que Gran Bretaña y Francia firmaren los Alcuerdos de München cola Alemaña Nazi, la XRSS tamién fizo tratos con ella, económica y militarmente, incluyendo'l Pautu Ribbentrop-Molotov (pautu de non agresión nazi-soviéticu), qu'arreyó la ocupación de Lituania, Letonia, Estonia y la Invasión de Polonia en 1939. A fines de payares de 1939, por nun ser quien a puxar a Finlandia a abayar la so llende 25 quilómetros de Leningráu por preseos diplomáticos, Stalin ordenó la Guerra d'Iviernu. Anque se tien aldericao si la Xunión Soviética tuvo l'inclín d'invadir l'Alemaña Nazi cuando fora abondo fuerte, la mesma Alemaña frayó'l tratáu y invadió la Xunión Soviética en 1941. L'Exércitu Bermeyu paró la ofensiva nazi na Batalla d'Stalingráu, dende fines de 1942 hasta l'entamu de 1943, y avanzó por Europa del Este hasta Berlín enantes del rindimientu d'Alemaña en 1945. Tamién participó na derrota de Xapón, invadiendo la rexón de Manchuria trés meses dempués de que finare la guerra nel Oeste. Anque estrozada pola guerra, la Xunión Soviética xurdió del conflictu como una superpotencia reconocida.
Durante la posguerra, la Xunión Soviética re-edificó primero y entós enanchó la so economía, al caltener el so control estrictamente centralizáu. La XRSS aidó al rexurdimentu nos países d'Europa del Este, tornándose ellos n'estaos satélite. Too ello fízose per aciu del Pautu de Varsovia (1955), y más sero del Conseyu de Gabitu Mutuu Económicu. La influencia de la URSS medró n'otres fasteres del mundu y la tensión de la Guerra Fría tornó en nemigos a Reinu Xuníu y Estaos Xuníos.
La Xunión Soviética dempués de Stalin
[editar | editar la fonte]Iosif Stalin morrió'l 5 de marzu de 1953. Ensin un socesor que fora aceptao, los cabezaleros del Partíu Comunista escoyeron gobernar la XRSS de miente collectiva, anque hubiera una llucha pol poder interna. Nikita Khruxchov, que ganara'l baltu pol poder nel entamu de la década de los años 50, denunció en 1956 l'emplegu de la represión por parte de Stalin. Nesi añu la fuercia militar soviética foi usada pa suprimir los llevantamientos nacionalistes n'Hungría y Polonia. Nesi tiempu la Xunión Soviética esplotó'l so enorme poder científicu y teunolóxicu, por exemplu, llanzando'l primer satélite artificial (Sputnik I), el primer ser vivu en viaxar al espaciu (la perra Laika) y el primer ser humanu Yuri Gagarin que se pon nuna órbita terrestre. Valentina Tereshkova foi la primer muyer en dir al espaciu, nel Vostok 6, el 16 de xunu de 1963, y Alekséi Leónov el primer home n'abayase pol espaciu'l 18 de marzu de 1965. Les reformes de Khruxchov na agricultura y l'alministración foron xeneralmente improductives y la política esterior, sobro too con China y Estaos Xuníos, foi a peor. Khruxchov dexó'l poder en 1964.
Tres la salida de Khruxchov, siguió otru periodu de mandáu collectivu, qu'avagó hasta que Leonid Brezhnev s'afitó al entamu de los años 70 como la figura más importante na vida política soviética. En 1979 la URSS invadió Afganistán. Nesti tiempu la URSS compitió con Estaos Xuníos na estaya militar, pero la economía entamó a parase. La industria tuvo ganancies que medraben selemente pero yeren estables, ente'l desendolcu agrícola s'atrasiaba. Fonderamente, la XRSS nun yera quien a aniciar abondo p'alimentar una población que medraba, y tuvo que principiar a importar. Otramiente, la mala calidá de los productos soviéticos fizo que la XRSS namás fora quien a esportar materies primeres. Too ello llevó a una balanza de pagos negativa.
Les reformes de Gorbachov y la fin de la XRSS
[editar | editar la fonte]Cada vegada foi más evidente l'esbarrumbamientu de les cadarmes económiques y polítiques de la Xunión Soviética. Tres la rápida socesión de Yuri Andropov y Konstantin Chernenko, figures de transición, Mikhail Gorbachov foi escoyíu líder de la XRSS. Gorbachov principió a aplicar cambios bultables na economía (Perestroika) y el lideralgu del partíu. La política de Glasnost lliberó l'accesu públicu a la información dempués de décades de fuerte censura del gobiernu, encamentando tamién la tresparencia na xestión.
A fines de los años 80, les repúbliques que formaben la Xunión Soviética entamaron llegalmente a abayase hacia una declaración de soberanía sobro los sos territorios, basándose nel Artículu 72 de la Constitución de la XRSS, que mentaba que cualesquier república yera llibre d'axebrase. El 7 d'abril de 1990 foi aprobada una llei pola que una república podría desapartase si más de dos terceres partes de los residentes na república votaben a favor d'ello nun referendu. Munches aviaron les eleiciones pa les sos propies llexislatures nacionales en 1990. Les repúbliques aniciaron lleis que diben a la escontra de les lleis de la Xunión, no que foi conocío como "Guerra de Lleis". En 1989, la RSFS de Rusia, que yera entós la república más grande (con cuasi la metá de la población) convocó una nueva escoyeta pa un Congresu de Diputaos del Pueblu. [[Boris Yeltsin foi elixíu presidente del Congresu. El 12 de xunu de 1990 el Congresu declarió la soberanía de Rusia sobro'l so territoriu y adelantróse a facer lleis que teníen el procuru de desaniciar dalgunes de les normes de la XRSS. El periodu d'incertidumbre llegal continuó al traviés de 1991 cuando les repúbliques que formaben la URSS llegaron a ser selemente independientes.
El 17 de marzu de 1991 celebróse un referendu pal caltenimientu de la XRSS, que foi sofitao mayoritariamente pola población en nueve de les quince repúbliques. El referendu supunxo un emburrión pa Gorbachov y nel branu d'esi mesmu añu el Nuevu Tratáu de la Xunión foi diseñáu y alcordáu pa ocho repúbliques que tuvieren el determín de tornar la Xunión Soviética nuna federación más sonce que la URSS. La firma del tratáu foi interrumpida pol güelpe d'estáu d'agostu empobináu escontra Gorbachov por miembros marxistes estremistes del gobiernu. Esti movimientu tenía'l determín d'invertir les reformes de Gorbachov y postiar el control central del gobiernu sobro les repúbliques. Tres el fracasu del güelpe, Yeltsin salió postiáu ente que'l poder de Gorbachov amenorgó. L'equilibriu políticu tercióse de miente bultable hacia les repúbliques. N'agostu de 1991 Letonia y Estonia declariaron la so independencia (siguiendo la güelga de Lituania en 1990), mientres les otres 12 repúbliques continuaben aldericando'l modelu más afayadizu pa la Xunión.
L'8 d'avientu de 1991 los presidentes de Rusia, Ucraína y Bielorrusia firmaron el Tratáu de Belovesh que declarió la Xunión Soviética sumida y afitóse la Comunidá d'Estaos Independientes (CEI) nel so llugar. Al quedar duldes de l'autoridá del Tratáu de Belovesh pa sumir la Xunión, el 21 d'avientu de 1991 los representantes de toles repúbliques soviétiques, sacantes Xeorxa, y inclusive repúbliques que firmaren el Tratáu de Belovesh, firmaron el Protocolu d'Alma-Ata, que confirmó'l desaniciu y la fin consecuente de la XRSS y tornaba a plantegar l'afitamientu de la CEI. El 25 d'avientu de 1991 Gorbachov, a la vista de los fechos, refugó la presidencia de la Xunión Soviética y pasó los poderes a Boris Yeltsin, presidente de Rusia. El día siguiente sumió tamién el Sóviet Supremu de la URSS, lo que supunxo la fin de la Xunión Soviética como estáu. Munches institucuiones como l'Exércitu Bermeyu y la policía asitiaron hasta l'entamu de 1992 pero foron desapaeciendo selemente o s'inxirieron nos nuevos estaos.
La Federación Rusa
[editar | editar la fonte]A mediaos de los noventa, Rusia yera una democracia multipartidista, pero yera abegosu postiar un gobiernu per aciu de dos problemes: l'enfrentamientu ente'l presidente y el parllamentu y el trafulcáu sistema de partíos. Anque Yeltsin ganó prestixu nos países foriatos, gobernaba de miente autocrática, ensin tener consideranza pa col parllamentu. Al tiempu la gran cantidá de pequeños partíos y la falta d'alianzas fixeron que la llexislatura nun fora gobernable.
En 1993 el xaréu ente Yeltsin y el parllamentu acabaría na Crisis constitucional rusa de 1993 n'ochobre d'esi añu. Depués de que Yeltsin mandara tanques al parllamentu col envís de bombardialu, el presidente tuvo llibertá dafechu pa imponer una constitución con fuertes poderes presidenciales y que foi aprobada en referendu n'avientu de 1993. Al tiempu el votu d'avientu supunxo un fuerte emburrie pa comunistes y nacionalistes, espeyando asina'l descontentu de la población pa coles reformes económiques neolliberales.
El prestixu de Yeltsin dientro del país foi amenorgando tres encontar les midíes económiques de Yegor Gaidar: fin del control de precios de la dómina soviética, encorties nel gastu públicu y apertura al comerciu esterior. Les reformes estragaron nel intre la calidá de vida de la gran mayoría de la población, especialmente a aquellos que se beneficiaben de salarios y precios controlaos, amás de los sosidios de la dómina soviética. Rusia sufrió nesta década una crisis económica mayor que la Gran Depresión qu'azotó a Estaos Xuníos nos años trenta.
Les reformes económiques postiaron una oligarquía enraigonada nel vieyu sistema soviéticu. Aconseyada polos gobiernos occidentales, el Bancu Mundial y el Fondu Monetariu Internacional, Rusia entamó la más grande y rápida privatización xamás fecha por un gobiernu na historia. A mediaos de los noventa el comerciu, los servicios y la pequeña industra ya taben en manes privaes. Casi toles grandes empreses foron mercaes polos sos antiguos direutivos, aniciando una clas de nuevos ricos averaos a inversores occidentales. Na parte baxera del sistema, pola mor de la inflación o'l desemplegu, munchos obreros acabaron na probetú, la prostitución o'l lladroniciu.
Por aciu del puxu del preciu del crudu, la so cimera esportación, la economía rusa vivió la fin de la so crisis rematando la década de los noventa. En 1998 Yeltsin afayábase nel tapecer de la so trayeutoria. Namás unes hores enantes del primer día de 2000 dimitió de sópetu dexando'l gobiernu en manes del so primer ministru, Vladimir Putin, antaño funcionariu del KGB y xefe de l'axencia socesora tres la cayida de la URSS. En 2000 el nuevu presidente ganó fácilmente a los sos contrincantes nes eleiiones presidenciales del 26 de marzu. En 2004 foi de nuevu escoyío col 71% de los votos, y los sos aliaos vencieron nes llexislatives, coles torgues d'observadores nacionales y foriatos sobro la llimpieza del procesu eleutoral. Dende la fin de 2004 la preocupación internacional enantó per aciu del duru control del presidente sobro'l parllamentu, la sociedá y los representantes rexonales.
Nes eleiciones llexislatives ruses de 2007 el partíu Rusia Xunida, qu'enconta a Putin, consiguió'l 64,3% de los votos, y nes eleiciones presidenciales de 2008 el candidatu del mesmu partíu, Dmitri Medvedev ganó con marxe abondo. Medved destituyó en setiembre de 2010 del so cargu como alcalde de Moscú a Yuri Luzhkov, que llevaba nel puestu dende 1992, asitiando nel so llugar a Sergei Sobianin, home d'esfotu pal presidente.
Economía
[editar | editar la fonte]Xeografía
[editar | editar la fonte]Principales ciudaes
[editar | editar la fonte]Puestu | Ciudá | Provincia / República | Población | Puestu | Ciudá | Provincia / República | Población | ![]() Moscú ![]() San Petersburgu | ||
---|---|---|---|---|---|---|---|---|---|---|
1 | Moscú | Óblast de Moscú | 10.563.038 | 11 | Ufá | Bashkortostán | 1.030.812 | |||
2 | San Petersburgu | Óblast de Leningráu | 4.600.276 | 12 | Perm | Krai de Perm | 986.497 | |||
3 | Novosibirsk | Óblast de Novosibirsk | 1.409.137 | 13 | Volgográu | Óblast de Volgográu | 1.015.617 | |||
4 | Ekaterimburgu | Óblast de Sverdlovsk | 1.343.839 | 14 | Krasnoyarsk | Krai de Krasnoyarsk | 962.466 | |||
5 | Nizhni Nóvgorod | Óblast de Nizhny Novgorod | 1.271.045 | 15 | Vorónezh | Óblast de Voronezh | 847.620 | |||
6 | Kazán | Tatarstan | 1.136.566 | 16 | Sarátov | Óblast de Sarátov | 827.193 | |||
7 | Samara | Óblast de Samara | 1.133.754 | 17 | Tolyatti | Óblast de Samara | 721.752 | |||
8 | Omsk | Óblast de Omsk | 1.127.675 | 18 | Krasnodar | Krai de Krasnodar | 713.426 | |||
9 | Cheliábinsk | Óblast de Cheliábinsk | 1.095.909 | 19 | Izhevsk | Udmurtia | 610.633 | |||
10 | Rostov del Don | Óblast de Rostov | 1.048.124 | 20 | Yaroslavl | Óblast de Yaroslavl | 606.888 | |||
Censu rusu (2010)[19] |
Referencies
[editar | editar la fonte]- ↑ Sergey Shakhray (25 avientu 1993). «Constitución de la Federación de Rusia» (en rusu). Rossiyskaya Gazeta: páxs. 102.
- ↑ URL de la referencia: https://www.un.org/ru/about-us/un-charter/full-text.
- ↑ URL de la referencia: http://www.unesco.org/eri/cp/ListeMS_Indicators.asp.
- ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
- ↑ URL de la referencia: https://russian.rt.com/ussr/article/344585-rossiya-pravopreemnitsa-sssr.
- ↑ URL de la referencia: http://mtcr.info/partners/. Data de consulta: 4 avientu 2017.
- ↑ URL de la referencia: http://eng.sectsco.org/about_sco/. Editorial: Organización de Cooperación de Shanghái. Data de consulta: 8 avientu 2017.
- ↑ URL de la referencia: http://www.nuclearsuppliersgroup.org/en/participants1. Editorial: Grupu d'abastecedores nucleares. Data de consulta: 7 avientu 2017.
- ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
- ↑ URL de la referencia: https://www.iho.int/srv1/index.php?option=com_wrapper&view=wrapper&Itemid=452&lang=en. Editorial: Organización Hidrográfica Internacional. Data de consulta: 8 avientu 2017.
- ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
- ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
- ↑ URL de la referencia: https://public.wmo.int/en/members/russian-federation. Data de consulta: 26 mayu 2020.
- ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
- ↑ URL de la referencia: https://twitter.com/N_Hervieu/status/1504078727671652355. Data de consulta: 16 marzu 2022.
- ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 5. Supports qualifier: data de principiu.
- ↑ Aplícase a esta parte: masculín singular.
- ↑ Aplícase a esta parte: femenín singular.
- ↑ «Censu rusu de 2010». Serviciu Xeneral d'Estadístiques. Consultáu'l 21 de payares de 2010.