Russ Meyer
C'l artìcul chè 'l è scrit in
Miranduléś |
![](http://upload.wikimedia.org/wikipedia/commons/thumb/d/db/Faster_pussycat_kill_kill_poster_%281%29.jpg/260px-Faster_pussycat_kill_kill_poster_%281%29.jpg)
![](http://upload.wikimedia.org/wikipedia/commons/thumb/5/57/Russ_Meyer_by_Roger_Ebert.jpg/200px-Russ_Meyer_by_Roger_Ebert.jpg)
![](http://upload.wikimedia.org/wikipedia/commons/thumb/7/76/MotorpsychoPoster.jpg/200px-MotorpsychoPoster.jpg)
![](http://upload.wikimedia.org/wikipedia/commons/thumb/b/bb/Vixen_poster_01.jpg/200px-Vixen_poster_01.jpg)
Russell Albion Meyer, cgnusû méj sōl cuma Russ Meyer (San Leàndar, 21 ad Mars dal 1922 - Los Angeles, 18 ad Setémbar dal 2004) 'l è stâ 'n regista, senegiadōr, prudutōr, atōr, muntadōr, diretōr dla futugrafìa e futógrafar americàṅ.
Tuti al sò òpri i èṅ carateriśàdi da la sàtira e dal sèns d'l umurìśum. I sò film i èṅ pîṅ ad sès e 'd viulénsa, ma sèmp'r in na ciàṿ da rìdar. Meyer 'l à scrit soquànt di sò film insém a 'l crìtic e senegiadōr Roger Ebert.
Dòp la sò mòrt, ch'l'è rivàda in dla sò abitasiòṅ 'd Hollywood par na palmunît quànd 'l iva tacâ a patìr la deménsa, la sò cà l'è dvintàda 'n muśèo ch'al móstra i sò lavōr, tgnénd adrē a qvél ch'al vliva lò.
Biugrafìa
Uriginàri dla Califòrgna, Meyer al nas da 'n pàdar agìnt ad pulisìa viulènt ch'al mòla la famìja quànd al gh'iva 'n an ad vita e da na màd'r infarméra. Quànd chi lē a quatórd'ś an la gh rigàla na cinepréśa, Russ al taca a catàr-ag gust a tiràr śò al parsòni e 'l ròbi tant ch'al vins subìt un prèmi par cineàsta prinsipiànt.
Durànt la secónda guèra mundiàla, in dal 1943, al lavóra in Európa faghénd di servìsi filmâ da 'l frònt e da i camp ad batàja. Soquànti sò ripréśi dl'avansàda dal generàł George Smith Patton i èṅ stadi druàdi dabòṅ p'r al film Prèmi Òscar Patton, generale d'acciaio dirèt par Franklin J. Schaffner in dal 1970.
In chi an lè, a n cavànd-'g-la minga a lauràr a Hollywood, al gira di ducumentòri industriàł, pò al dà a la luś al sò prim film da 'l tìtul The French Peep Show ambintâ in un lucàl in du cal dóni i s càvan śò. La pelìcula l'è però andàda pardùda. In séguit al taca a far al futógrafar par la rivìsta spurcaciòna Playboy 'd Hugh Hefner. In dal 1955 a fà 'l sò prim reportage ad nûd in dua, in dal paśni sentràli, a s véd la mudèla Eve ch'la dvintarà la sò secónda mujēr e anc prudutōra ad dagnóra tut i film ch'al farà in di an a vgnir.
Al prim sucès dal regìsta califurgnàṅ 'l è Lorna, pelìcula in biànc e négar dal 1964 ispiràda a Riso amaro ad Giuseppe De Santis. Sèmp'r in c'l an lè al fà La cugina Fanny, lavōr ch'al gh'iva da èsar girâ par Douglas Sirk che però a 'l ùltim 'l è stâ mandâ via. In dal 1965 l'è la vòlta dal drama Motorpsycho!, ch'al fà part dal filòṅ di film su di motociclìsta arvèrs, ma specialmènt ad Faster, Pussycat! Kill! Kill! cunsideràda la sò òpra più bèla e 'n cult movie a dita ad regìsta cuma John Waters e Quentin Tarantino.
Cal film chè, ólt'r a far cgnós'r al sò atōri tetóni, in primis la Tura Satana, 'l à fisâ definitivamènt al sò stîł. La band sleaze metal di Faster Pussycat l'à ciapâ 'l nóm pròpria da la pelìcula 'd Meyer che, fra 'l àtar, in séguit al girarà anc al vìddeo dla sò canta Don't Change That Song (1987).
In dal 1966 Russ al gira Mondo Topless, un ducumentàri su 'l ragàsi tetóni ch'i aṅ laurâ sèg, méntar dū and dòp al càmbia in part gènar cun Vixen, pelìcula pop cun di avenimènt eśagerâ cum i s véd'n in di cartòṅ animâ. Cla pelìcula chè, anc s'l'iva patî al giudìsi censòri dla "X rating", la gh'à abû dimóndi sucès listés faghénd sù vint-siē migliòṅ ad dòlar.
La 20th Century Fox la s fà viva sèg par mét'r-al sóta cuntràr e far-ag giràr Lungo la valle delle bambole, pelìcula ch'la crìtica fòrt la sucietà dal spetàcul misćiànd drama, cumèdia e splatter. Anc 'sta vòlta Meyer al fà sèntar parchè al film al mùcia sù déś vòlti da piò rispèt a 'l cóst ad nuvsènt-mila dòlar. Purtròp però al lavōr sucesìṿ, I 7 minuti che contano dal 1971, 'l è 'n diśàstar e dònca la major la decìd ad sćiancàr 'l acòrd.
Meyer al tórna acsè a prudùr i sò film da par lò, girànd la trilugìa pop-pulp Supervixens, Le deliranti avventure erotiche dell'agente speciale Margò, in du a gh'è 'n sòśia fnòć 'd Adolf Hitler ch'l al ciàp' in dal cûl, e Beneath the Valley of the Ultra-Vixens, film fóra 'd tèsta ma divertènt ch'al strica 'l òć a 'l pòran.