Michael Cimino
|
C'l artìcul chè 'l è scrit in
Miranduléś |
Michael Cimino (New York, 3 ad Favràr dal 1939 - Los Angeles, 2 ad Luj dal 2016, a s lèś [ˈmaɪkəl tʃɪˈmiːnoʊ] in ingléś) 'l è stâ 'n regìsta, 'n senegiadōr e prudutōr americàṅ, vinsidōr in dal 1979 dal Prèmi Òscar p'r al film Il cacciatore.
Biugrafìa
Fiōl dna famìja burghéśa ad New York cun di urìgini itagliàni, Cimino da śōv'n al stùddia architetùra, pitùra, mùśica e literadùra. In dal 1956 al tōś al diplóma a la Westbury High School ad Long Island. Dòp ès'r-as laureâ in Arti Gràfichi, in dal 1962 al pasa siē méś in d'l eśèrcit americàṅ pò al taca a lauràr in televiśiòṅ faghénd di ducumentàri e dla reclàm.
In di an Stanta al taca a far al senegiadōr a Hollywood pò in dal 1974 al gira 'l sò prim film Una calibro 20 per lo specialista cun Clint Eastwood e Jeff Bridges. In dal 1978 al gira al sò caplavōr, Il cacciatore, ch'al vins sinc Prèmi Òscar. La United Artists la gh dà acsè carta biànca par giràr dū an dòp I cancelli del cielo, un western èpic ambintâ in dal Wyoming dal 1890. Quànd però al film al vîṅ fóra 'l è 'n fiasc clamuróś ch'al pòrta a 'l falimènt la cà 'd prudusiòṅ e al ruìna la caréra 'd Michael. Cimino in séguit al girarà sōl atri quàtar pelìculi in di an Utànta e Nuànta e pò 'n epiśòdi dal film Chacun son cinéma.
Filmugrafìa
- 1974 - Una calibro 20 per lo specialista (Thunderbolt and Lightfoot)
- 1978 - Il cacciatore (The Deer Hunter)
- 1980 - I cancelli del cielo (Heaven's Gate)
- 1985 - L'anno del dragone (Year of the Dragon)
- 1987 - Il siciliano (The Sicilian)
- 1990 - Ore disperate (Desperate Hours)
- 1996 - Verso il sole (The Sunchaser)
- 2007 - Chacun son cinéma (epiśòdi No Translation Needed), insém a àtar 35 regìsta