Spazio 1999
|
C'l artìcul chè 'l è scrit in
Miranduléś |
 Space: 1999
| ||
| Spazio 1999 | ||
 La baś lunàra Alpha in na figùra dal telefìlm | ||
| Spasi 1999 1975/1977 | ||
|---|---|---|
| Gènar: Fantasiénsa | ||
| Stagiòṅ: 2 | ||
| Epiśòdi: 48 | ||
| Atōr: Martin Landau: Cm. John Koenig (st.1-2) Barbara Bain: D.sa Helen Russell (st.1-2) Nick Tate: Cap. Alan Carter (st.1-2) Barry Morse: Pruf. Victor Bergman (st.1) Catherine Schell: Maya (st.2) Prentis Hancock: V.cm. Paul Morrow (st.1) Tony Anholt: V.cm. Tony Verdeschi (st.2) Zienia Merton: Sandra Benes (st.1-2) Clifton Jones: David Kano (st.1) John Hug: Bill Fraser (st.2) Anton Phillips: Dr. Bob Mathias (st.1-2) Roy Dotrice: Gerald Simmonds (st.1) Yasuko Nagazumi: Uperadōra Yasko (st.2) Jeffrey Kissoon: Dr. Vincent (st.2) Alibe Parsons: Uperadōra Alibe (st.2) Sam Dastor: Dr. Spencer (st.2) | ||
| Duràda: 52 minùt | ||
| Léngua: Ingléś | ||
| Nasiòṅ: Régn Unî | ||
Spazio 1999 (Spasi 1999) l'è na série televiśìva ad fantasiénsa ad Gerry e Sylvia Anderson ch'la cònta 'n evènt apucalìtic sucès a la Luna a la fiṅ dal vintéśum sècul quànd di espuśiòṅ nucleàri in dla sò fàcia lugàda i l'aṅ fata śluntanàr da la Tèra par sèmpar.
Gl'abitànt dla baś lunàra Alpha i gh'aṅ da inśgnàr-as par scampàr in dal spasi da par lōr e catàr 'n àtar mónd in dua vìvar.
La prima série l'è stada prudóta par la britànica ITC e l'itagliàna RAI méntar par la secónda série Fred Freiberger 'l à tòlt al pòst dla Sylvia Anderson, ch'la s éra in cal méntar divìśa da sò marè. Anc la RAI la s è tiràda indrē.
Trama
Al 9 ad Setémbar dal 1999 John Koenig al tōś al cmand dla baś lunàra Alpha, avampòst di teréstar p'r un viàś espluratìṿ vèrs al pianéda Meta dascuvèrt da pôc. Durànt gl'ùltim preparatìṿ però a sćiòpa 'n depòśit ad scòri nucleàri ch'i daṅ vita a na reasiòṅ a cadéna ch'la fà spustàr la Luna da la sò òrbita. 'L è 'l trédas dal méś e la Luna la partìs par sò cònt p'r un viàś sénsa fiṅ. In sla Tèra invéci i sucédan di diśàstar.
Gl'abitànt 'd Alpha i gh'aṅ la manéra ad cgnósar di mónd abitâ e di aglièṅ, dal vòlti amìg e dal vòlti nemìg. 'L è l'ucaśiòṅ par lōr par far-as dal dmandi su 'l sèns dla vita.
Persunàǵ
- Cmandànt John Robert Koenig (Martin Landau), astrufìśic americàṅ, mémbar dl'Aministrasiòṅ Spasiàla Internasiunàla. Pôc tèmp prima dal diśàstar al tōś al pòst dal rus Gorskij, śluntanâ par di mutìṿ pulìtic;
- Dutōra Helen Russell (Barbara Bain, Helena in dla versiòṅ uriginàla), americàna, la cmanda 'l staff mèdag. Lē e Koenig i sèntan quèl 'l òṅ cun cl'atra;
- Dutōr Victor Bergman (Barry Morse, sōl prima stagiòṅ), ingléś, risercadōr pûr e geniàł, 'l è 'l diretōr dal dipartimènt sietìfic dla baś lunàra;
- Paul Morrow (Prentis Hancock, sōl prima stagiòṅ), scuséś, 'l è 'l vice cmandànt dla baś e respunsàbil dal telecumunicasiòṅ;
- Alan Carter (Nick Tate), austragliàṅ, cmandànt e pilòta dgl'astrunâṿ dla baś ciamàdi Àquili. In dal mumènt dl'espluśiòṅ lò 'l éra su n'àquila in vōl dònca 'l psiva sarnìr se turnàr indrē o rivàr su la Tèra e salvàr-as. 'L à decìś ad turnàr da i sò cumpàgn;
- Sandra Benes (Zienia Merton), tècniga infurmàtiga ligàda prima a 'l pilòta Mike Ryan, mòrt in un buś négar, e pò a Morrow;
- David Kano (Clifton Jones, sōl prima stagiòṅ), tècnig infurmàtig nigeriàṅ;
- Gerald Simmonds (Roy Dotrice, sōl prima stagiòṅ), respunsàbil pulìtic dal prugèt, al fà védar tut al sò cinìśum;
- Maya (Catherine Schell, sōl secónda stagiòṅ), ultma scampàda dal pianéda Psycon, siensiàda, l'è bòna ad tōr la fórma ad tut i èsar vivènt d'l univèrs;
- Tony Verdeschi (Tony Anholt, sōl secónda stagiòṅ), nâ a Firénse, al dvènta al vice cmandànt dal baś. Al gh'à na relasiòṅ cun la Maya;
- Yasko (Yasuko Nagazumi, sōl secónda stagiòṅ), tècniga infurmàtiga giapunéśa;