Pikëpamja e qeverisë së SHBA

Vetëm dhjetë ditë pasi forcat e armatosura ruse filluan sulmin në shkallë të gjerë ndaj Ukrainës në shkurt të vitit 2022, Shtetet e Bashkuara filluan të vendosnin sanksione ndaj individëve dhe subjekteve përgjegjëse për shkeljen e sovranitetit dhe integritetit territorial të Ukrainës dhe vjedhjen e pasurive të popullit ukrainas. Gjatë tridhjetë muajve pasues, u vendosën dhjetëra sanksione shtesë ndaj individëve dhe subjekteve të përfshirë në përpjekjet për të ndihmuar Vladimir Putinin për nënshtrimin e Ukrainës dhe popullit të saj.

Megjithatë, ka ende disa entitete, duke përfshirë një numër qeverish, që synojnë të përfitojnë nga lufta e Rusisë kundër Ukrainës duke ndihmuar Rusinë në luftën e saj të paligjshme. Kështu që, në fund të gushtit, qeveria e Shteteve të Bashkuara vendosi sanksione të reja ndaj afro katërqind individëve dhe subjekteve të reja, si në Rusi ashtu edhe jashtë saj.

Në përpjekje për të penguar shmangien e sanksioneve, Departamenti Amerikan i Shtetit vendosi kufizime ndaj më shumë se 190 individëve dhe subjekteve. Për shembull, si pjesë e përpjekjes së tij për të penguar aftësinë e Rusisë për të blerë teknologji dhe pajisje nga vendet e treta, Departamenti i Shtetit vendosi sanksione ndaj prodhuesve, eksportuesve dhe importuesve të materialeve kritike për industrinë ushtarake të Rusisë.

Mes atyre në shënjestër të këtyre sanksioneve ishin edhe një numër kompanish në vende të treta, duke përfshirë Republikën Popullore të Kinës, dhe një mori entitetesh kineze që bashkëpunojnë me qeverinë ruse. Për një listë më të detajuar të individëve dhe subjekteve të sanksionuara nga Departamenti i Shtetit, ju mund të vizitoni faqen e Departamentit të Shtetetit: state.gov/new-masures-to-degrade-russias-wartime-economy/.

Në të njëjtën kohë, Departamenti amerikan i Thesarit vendosi sanksione ndaj rrjeteve të shumta transnacionale, që ndihmojnë Rusinë të blejë materiale të rëndësishme, si pajisje të avancuara të makinerive dhe pjesë elektronike. Departamenti i Thesarit po vendos sanksione edhe ndaj kompanive të teknologjisë financiare që ofrojnë programe të nevojshme kompjuterike dhe teknologji të tjera kritike për sektorin financiar të Rusisë. Lista e këtyre sanksioneve është publikuar në faqen e internetit të Departamentit të Thesarit: home.treasury.gov/news/press-releases/jy2546.

“Rusia e ka kthyer ekonominë e saj në një mjet në shërbim të kompleksit industrial ushtarak të Kremlinit. Veprimet e Departamentit të Thesarit sot vazhdojnë të zbatojnë angazhimet e marra nga Presidenti Biden dhe homologët e tij të vendeve të G7-ës për të ndërprerë zinxhirët e furnizimit të industrisë ushtarake ruse dhe kanalet e pagesave", tha Zëvendës Sekretari i Thesarit Wally Adeyemo.

“Kompanitë, institucionet financiare dhe qeveritë në mbarë botën duhet të sigurohen se nuk po mbështesin zinxhirët e furnizimit të industrisë ushtarake të Rusisë.”

Qeveria e Shteteve të Bashkuara do të vazhdojë të mbështesë Ukrainën, ndërsa ajo mbron pavarësinë e saj dhe do të mbajë Rusinë përgjegjëse për agresionin e saj ndaj popullit ukrainas.

Rreth dy miliardë njerëz sot jetojnë në zona të prekura nga konflikti. “Detyra jonë”, deklaroi ambasadorja e amerikane në OKB, Linda Thomas-Greenfield, “duhet të jetë të shpëtojmë madje edhe një person tjetër nga përjetimi i ferrit të luftës”.

Lajmi i mirë, tha ambasadorja Thomas-Greenfield, është se “ne dimë të krijojmë kushte që nxisin paqen”. Hapi i parë është investimi në aspektin e parandalimit të konflikteve.

“Parandalimi i konflikteve kërkon qasje afatgjata dhe gjithëpërfshirëse, vullnet politik, partneritete efektive, burime të qëndrueshme dhe angazhime kombëtare. Zhvillimi i strategjive kombëtare të frenimit të konflikteve ka dëshmuar se ndihmon në trajtimin e faktorëve që nxisin konfliktin dhe forcimin e infrastrukturës kombëtare për paqen.”

Me kontribut dhe mbështetje të gjerë, strategjitë e parandalimit të konflikteve mund të përforcojnë institucionet shtetërore, të nxisin sundimin e ligjit, të forcojnë shoqërinë civile dhe të ndërtojnë tolerancë dhe kohezion shoqëror më të madh.

“Paqja, zhvillimi dhe përpjekjet humanitare kanë lidhje reciproke dhe përforcuese mes tyre”, tha ambasadorja Thomas-Greenfield. Ajo u bëri thirrje gjithashtu vendeve anëtare që të vazhdojnë të mësojnë nga njëri-tjetri në lidhje me parandalimin e konflikteve. Sierra Leone është një rast i tillë, vuri në dukje ambasadorja Thomas-Greenfield.

“Sierra Leone ka bërë përparim të rëndësishëm në rindërtimin dhe forcimin e institucioneve të pasluftës dhe në përmbushjen e disa nevojave themelore të banorëve të saj dhe viktimave të luftës, duke përfshirë krijimin e Komisionit të së Vërtetës dhe Pajtimit. Mbështetja e Fondit për Ndërtimin e Paqes për Sierra Leonen ka përfshirë një përqëndrim të fortë në konfliktin e tokës, sfidat e komuniteteve ndërkufitare dhe fuqizimin dhe pjesëmarrjen e grave dhe të rinjve në proceset demokratike.”

Për të qenë efektive, përpjekjet për parandalimin e konflikteve dhe ndërtimin e paqes duhet të jenë gjithëpërfshirëse, tha ambasadorja Thomas-Greenfield.

“Kur gratë, të rinjtë dhe zërat e tjerë jo të përfaqësuar mirë mund të marrin pjesë plotësisht, në mënyrë të barabartë dhe domethënëse në jetën politike dhe publike, politikat dhe zbatimin e tyre, ka më shumë gjasa të pasqyrojnë nevojat e të gjithë shoqërisë dhe të sjellin rezultate të qëndrueshme për të gjithë.”

Samiti i së Ardhmes i muajit të ardhshëm dhe ai i vitit 2025 mbi Rishikimin e Arkitekturës së Ndërtimit të Paqes janë mjete të rëndësishme për të forcuar përpjekjet për ndërtimin e paqes, duke përfshirë parandalimin e konflikteve dhe ndërmjetësimin për zgjidhjen e tyre.

Shtetet e Bashkuara mbeten të përkushtuara ndaj përpjekjeve të OKB-së për parandalimin e konfliktit dhe ndërtimin e paqes përmes planeve të saj 10-vjeçare në katër vende me përparësi të lartë, përkatësisht Haiti, Libi, Mozambik dhe Papua Guinenë e Re, si dhe në rajonin bregdetar të Afrikës Perëndimore.

Shtetet e Bashkuara do të vazhdojnë të mbështesin nismat e OKB-së për zgjerimin e përpjekjeve gjiththpërfshirëse për parandalimin e konflikteve, ndërmjetësimin e tyre dhe përpjekjet për paqe. Shtetet e Bashkuara u bëjnë thirrje të gjitha vendeve anëtare të OKB-së që të bëjnë të njejtën gjë.