Oyun
Oyun — insan vucudınıñ plastik areketleri vastasınen bediiy sımalar yaratılğan bir sanattır. Oyunda muzıka eserleriniñ duyğulı ve obrazlı mündericesi akis ola. Oyun bütün insanlıqnıñ ve insan toplulığınıñ medeniy ananelerinde mevcut olğan edi ve alâ mevcuttır. İnsaniyetniñ uzun tarihı devamında oyun, medeniy inkişafını ifade eterek, deñişken.
![](http://upload.wikimedia.org/wikipedia/commons/thumb/3/3e/%D0%A2%D0%B0%D0%BD%D0%B5%D1%86_%D0%BA%D1%80%D1%8B%D0%BC%D1%81%D0%BA%D0%B8%D1%85_%D1%82%D0%B0%D1%82%D0%B0%D1%80%2C_1790-%D0%B5_%D0%B3%D0%BE%D0%B4%D1%8B.jpg/220px-%D0%A2%D0%B0%D0%BD%D0%B5%D1%86_%D0%BA%D1%80%D1%8B%D0%BC%D1%81%D0%BA%D0%B8%D1%85_%D1%82%D0%B0%D1%82%D0%B0%D1%80%2C_1790-%D0%B5_%D0%B3%D0%BE%D0%B4%D1%8B.jpg)
Oyunnıñ pek çoq çeşiti ve şekli bar. Halq oyunı - er bir halqnıñ dünyabaqışınıñ ve yaratıcılığınıñ açıq ifadesidir, ananelerniñ, horeoğrafiya tiliniñ, muzıkanen plastik ifadeliliginiñ akis olmasıdır.
Klassik oyun, XVI asırnıñ soñunda yaratılğan ve mahsus azırlıq talap etken balet sanatınıñ temeli.
Estrada oyunınıñ öz hususiyetleri ve belli bir estrada yırcısınıñ çıqışlarına qoltutmaq vazifesi bar.
Oyunlar, iştirakçılarnıñ miqdarına köre solo oyunı, çift oyun ve taqım oyunlarına bölüne.
Oyunlar, niyetke köre içtimaiy, merasim, sana, erotika v dig. oyunlarına bölüne.
Qadimiy yunan mifologiyasında Terpsihora, oyunnıñ ilham perisi edi.
Oyun, eski zamanlardan insanlarğa qonuşmağa yardım ete edi: köy meydanlarında, ballarda, cıyınlarda, klublarda, diskotekalarda ve gece klublarında aqradaşlarnen şeñ vaqıt keçirmege, gençlikke ise tanışmağa ve körüşmege yardım ete edi.
Çift oyunları birinciden qonuşmaq maqsadınen peyda olıp, esasen qonuşuv qurmağa hızmet eter.