Kearwahan
Kearwahan (hurup Arab Gundul: کأرواحن; Indonésia: animisme, deri basa Latèn anima 'roh, ambekan') entu kepercayaan ama orang alus èn roh nyang jadi alesnya kepercayaan agama nyang sanonya nongol di turu-turu orang jebot.[1] Kepercayaan kearwahan percaya nyang saben barang di ni Bumi (kaya' utekan-utekan kaya' goa, pu'un, atawa batu gedé) ngelah jiwa nyang kudu dipuja-puja biar tu arwah kaga' ngistanin orang.[2]
Selaènnya jiwa ama roh nyang nungguin tu tempat-tempat nyang tadé udah disebutin, kearwahan juga' percaya nyang orang mati punya arwah bisa ngranjing lagi ke binatang punya awak. Orang mati punya arwah juga' bisa ngeranjing ke babuy atawa macan nyang dikata bakalan ngedendem ama orang nyang tau jadi musu bebuyutan pas jaman dia masing idup dulu. Hata, ni barang puluran dipercaya ampé berèrod-rèrod.
Ni kepercayaan mah laèn pisan ama nyang namanya kepercayaan pulang jeleg (reinkarnasi) kaya' nyang ada di agama Indu ama Buda nyang mana entu pulang jeleg jiwanya kaga' ujug-ujug mènclok di laèn binatang idup, melèngken liwat berojol lagi dulu ke dunia dalem bentuk keidupan anyar. Di agama Indu ama Buda gè' juga ada nyang namanya engehan hukum ketulah (karma) nyang laèn ama ni kepercayaan kearwahan.
Jelujur kata
[permak | permak sumber]Setilah animisme nyang bekèn di basa Melayu Tinggi entu kalu dijelujurin asalnya deri basa Latèn, nya'entu anima 'roh, ambekan'.[3] Pemegaran engehan deri kearwahan entu nanggraknya jiwa atawa roh di saben-saben benda idup ama benda mati. Ni kenanggrakan entarnya ngeja nyang nganut ni kearwahan jadi muhun-muhun ama benda. Juntrungannya dia pada muhun-muhun gitu mah anu ngara-ngara biar kaga' ngistanin orang ama bakal ngasi asian atawa hoki. Kalu di ajaran kearwahan, saben barang diyakinin gableg ngasi semenggah ama pertulungan.[4]
Ruju'an
[permak | permak sumber]- ↑ Prabowo, Gama (2020). Gischa, Serafica (prm.). "Sistem Kepercayaan Manusia Purba Masa Praaksara". Kompas.com. Dipungut 20 Januari 2021.
{{cite news}}: More than one of|author=èn|last=specified (pertulungan) - ↑ "Struktur Upacara dan Fungsi Pertunjukkan Tari Asyeik Dalam Pengobatan di Dusun Empih Kecamatan Sungai Bungkal Kota Sungai Penuh". E-Jurnal Sendratasik. 7 (1): 62. 2018. ISSN 2302-3201.
{{cite journal}}: Cite uses deprecated parameter|authors=(pertulungan) - ↑ Lubis, Dahlia (2019). Aliran Kepercayaan atau Kebatinan (PDF). Medan: Perdana Publishing. h. 30. ISBN 978-623-7160-60-1.
{{cite book}}: CS1 maint: url-status (link) - ↑ Kasno (2018). Salsabila, Intan (prm.). Filsafat Agama (PDF). Surabaya: Alpha. h. 33. ISBN 978-602-6681-18-8.
{{cite book}}: CS1 maint: url-status (link)