Theodore Roosevelt

Si Theodore Roosevelt (27 Oktubre 1858- 6 Enero 1919), iyo an ika-26 na presidente kan Estados Unidos. Sa edad na 43 pagtukaw, siya na an pinaka-huben na nagkapot kan siring na katongdan. Siya man an nagdara nin bagong mga kaisipan sa pagkapot nin siring na kapangyarihan. Mala ta sabi niya "dai man ako (ngaya) nangangagaw poder." kundi "pinalalakbang ko sana an paggamit kan mga poderes kan presidente."

Agresibo siya sa pagtolod kan intereses nin publiko asin doon siya sa pag-osol kan sarong mabagsik na pan-luwas na polisya na siniseguro an intereses kan Estados Unidos pirmeng mangimbabaw sa kinaban.

Pamilya

Siya namundag sa Nueva York, Nueva York, bunga kan pag-aagoman ninda Theodore Roosevelt, Sr. asin Martha Bulloch Roosevelt. Igwa siyang tolong tugang, sinda Bamie, Elliott asin Corrine. Enot na agom niya iyo si Alice Lee Roosevelt na nagadan parehong aldaw kan magadan an ina niya, taon 1884.Ika-duwang agom niya iyo si Edith Carrow kun saen nagkaigwa siya nin limang aki na iyo sa Theodore, Jr., Kermit, Ethel, Archie, asin Quentin.

Mga naginibohan asin mga pwestong kinaptan

Maski ngani naroromdoman siya komo presidente, an totoo dakulon siyang mga ginibo asin nahaman sa pribado asin sa publikong buhay niya.

Siya, bago nagin presidente, nagtukaw man komo Assemblyman kan Estado nin Nueva York, nagin Gobernador kani, asin nagin man Bise-presidente.

Nagin man siyang Deputy Sheriff kan Dakota Territory, Police Commissioner kan Ciudad nin Nueva York, Commissioner sa Serbisyo Sibil kan Estadeos Unidos, Assistant Secretary kan US Navy, asin Colonel kan inaapod na Rough Riders, na iyo an First Volunteer Cavalry, na nagpasiring sa Cuba sa paki-guerra laban sa mga Kastila.

Nagin man siyang historyador asin man ngani nakaptan an pagkapresidente kan American Historical Association, asin siring man siya sarong naturalista mala ta siya an minimirar na otoridad sa kinaban komo hararom an adal manongod kan mga darakulang mammals na nakukua sa Amerika.

Komo an interes niya yaon igdi, nagtolod saiya na mamayo nin duwang darakulang ekspidisyon syantipiko, enot sa Aprika asin ikaduwa sa Sur-Amerika. Mala ta kun siya daa dai nagin Presidente, mas maroromdoman siya huli sa mga nahaman asin naginibo niya bilang sarong naturalista.

Sa tahaw kan mga kasibotan na ini, nakua niya pang mangabayo sa mga rancho, magbatong sa iba-ibang kontinente, magpadakula nin limang masisirot na mga aki, magbasa nin ginatos na libro, asin siring man magsurat nin sadiri niyang mga libro na pambihirang uminabot 35 an bilang. Sa panahon na ini, nakatipon siya nin kadakul-dakul na mga amigo asin mga katrato. Sinasabing labis 150,000 na surat an ginibo niya mamantener lang niya an kontak sa mga amigo.

Mga panluwas na takod

• The White House Archived 2005-11-28 at the Wayback Machine.
• Theodore Roosevelt Association