Gamsboart

Auf da Wiesn, 2008

Gamsboart vo am „Miaschbecka Trachtla“

Da Gamsboart is a traditionella boarischa Huatschmuck, wo zua Trocht vo Monna ghead.

Heastejung

Da Gamsboart wead aus de Rucknhoar vo am Gamsbog bischlweis bundn. Dazua wean Gamsna vawendd, de wo im Winta gschossn woan san, wei s Fej dann dichda und scheena is. A Gamsboart is teira wiar a Hirschboart oda aa wiar a Dachs- und Wuidsauhoar, trotzdem oda deszweng siagt ma ba boarischn Drochtlan fost nur an Gamsboart. Und a Kenna ko oan Gamsboart sofort vo de nochgmochdn untascheidn.

Fia a guade Qualitet soit a Gamsbog ned ejta ois 4-7 Joar sei. Dees Wuidhoarboartbindn guit ois hohe Kunst. Fia de Orwadsgeng vom Ausrasian vo de Hoar iwas Woschn und Rupfn bis hi zan Bindn brauchts mearane Stundn. Nebm de beruaflichn Gamsboartbinda gibts aa vui Jaga, wo dees mocha. Je nochdem wia gschickt a Binda is, brauchda fia oan oanzign Boart Hoar vo bis za zehn Gamsna. Unta de Wuidhoarbinda wean jeds Joar Wettbewerb austrogn.

De Kiniklass is a Gamsboart mit mindastns 19 cm Leng. Fia so an Gamsboart san de Hoar vo eppa 10 bis 15 Gamsna nedi.

Restauriarung

Wei a neia Gamsboart so teia is, gibts aa Spezialistn fias Restaurian. Da Zaiser Edi aus Stoahaus ba Wejs hod si dafia wejdweit an Nama gmochd.

Statussymboi

Friara hod da Gamsboart iwa de Schneid vo Monna Auskumft gebm. Um an guadn Gamsboart z griagn, hod ma de Gamsna im Winta schiassn miassn, wei s Wintafej bsondas dicht is. Im Hochgebirg - bei Schnee und Eis - is owa ois andare ois oafoch gwen im Winta Gamsna z schiassn. Heit is da Gamsboart meara da Ausdruck vo Woistand, wei Kiniklass ganz schee teia is.

Schau aa

• Roagaspitz
• Schariwari
• Tracht

Literatua

• Bertl Lahnsteiner: Wildbärte. Vom Rupfen bis zum Binden. Stocker, Graz u. a. 2009, ISBN 978-3-7020-1219-9

Beleg

• Gamsbart Olympiade 2008 auf BR-Online
• Schau aaa: de:Gamsbart (a Tei vom Artikl kimmt do hea)

Im Netz

• Zaiser Edis Hoamseitn

00V Boarischa Brauch