Nutza:Luki/Tecumseh
Der Artikl is im Dialekt Owaöstareichisch gschriem worn. |
Da Tecumseh (tɛˈkʌmsə) oda a Tecumtha oda Tikamthi (Da zan Schprung ausetzade Beaglöwe (Da duckade Puma)), woa a Indiana ausm Schtaumm vo de Kispokota - Shawnee. In seina Zeid san oiweu mera amerikanische Siedla ins Indianalaund zogn. Und zweng Dem hods vü bluadige Ausanaundasetzungan gebm. Ea hod gneist, das de Schtämm alloani nixe ausricht kenan dagegn. und so hod a vasuacht mera Indiana aus de Schtämm unta seina Fiahrung za vaeinan um so mea Kaumpfkroft zhobm.
Vuagschicht
[Werkeln | Am Gwëntext werkeln]![](http://upload.wikimedia.org/wikipedia/commons/thumb/c/c7/Neufrankreich.svg/220px-Neufrankreich.svg.png)
Ois 1736 Fraunkreich seine Bsitzungan in Kanada valuan hod, woan de Indiana, fias Kaffa vo Schtoihweakzeig und Schußwoffn alloane vo de Englenda ohengi.
- Do de Eiwaundarung aus Eiropa schtoak zuagnumma hod, de Indianabevökarung owa duach Kriag, Infektzionskraunkheitn und em Akoholismus, schtoak zruckgaunga is, hod se eahna Log machti vaschlechtad.
De Shawnee san in da Middn vom 17. Joahundat ausm Ohiotoi vom Irokesnbund vatriebm wuan. A Teu vo de Shawnee san noch Ostn (Pennsylvania) zogn. Aundare in Sidn owi, bis South Carolina, wo se ois Kriaga unta de Cherokees afgriebm wuan san.
- Am Aufaung vom 18. Joahundat hobm de Shawnee, schtoak dezimiat, ois neiche Vabündte vo de Irokesn, wida ins Ohio-Toi zruckkema deafn.
Sei Jugand
[Werkeln | Am Gwëntext werkeln]Da Tecumseh is im Mäaz 1768 geboan, in Piqua (Ohio) in an Shawnee Doaf am Mad River. Sei Vota woa da Pucksinwah (Shawnee) und dea woa da Kriagsheibtling vo An da fimf Teuschtämm, da Kispokotha Shawnee. Sei Muadda de Methoataaskee woa vamuatli a gebiatige Cherokee. Iwa de Schtammeszuaghearigkeit vo de Zwoa gibts owa a nu aundare Deitungan?
Da junge Bua hod zwoa große Vuabüda ghobd. Sein Vota und sein ödan Bruada, em Chiksika. Bade woan inta eahnane Leid recht augsegne und eiflußreiche Kriaga. Sei Vota is scho am 9.10.1774 in da Schlocht vo Point Plesant (Kanawha) gegn de Virginia Miliz gfoin. Do hod daun sei ödara Bruada, da Chiksika midm Shawnee Heibtling Black Fish de weidare Eaziahung iwanumma, vom Tecumseh und seine fimf Gschwista. Sei Mudda hod dem Biabal oiweu de Gschichtn vo seim Vota vazöht und so in Widaschtaundswühn in eam auzundn.
1779 hobm se de Shawnees iwa eahnane Zuakunftsaussichtn zaschtrittn. Drafhie san umma 4000 Leid, des woan eppa 2/3 vo de Schtämm, iwan Missouri ummi wegazogn. De Leid vom Tecumseh san owa blibm. Iah Lebm woa zoachnt vo de Obweahkempf mid de Siedla und Deran Iwagriff.
Zan Aufaung vom amerikanischn Unobhengigkeitsriag san de Shawnee vo de Englenda ois Vabündte augwoam und mid Woffn vasuagt wuan.
- Da Ohio is zan Todesfluß woan.
- A sei Eazotzvota, da Black Fish is im Juli 1779 gfoin. Fia den jungan Tecumseh woa da Kriag oitegli.
- In Kentucky is 1781 zan Joah vom Bluad eakleat woan. Greultotn san vo bade Seitn begaungan woan. 1782 san 90 kristlige Delaware, vo de Milizionäa mid Hoizhaua daschlogn woan.
1783 is im Friedn vo Versailles (Paris), de Unobhengigkeid vo de Nuadamerikanischn Schtootn besieglt woan. Do jo vü Loyalistn, denan große Ländareien in de Schtootn ghead hom, noch Kanada gflohn san, hod ma ausgmocht, das mas entschädigt.
- Do jo de neiche U.S.A. koa Göd ghobd hod, is ma iwaeikema, das de Englenda, de Forts und Haundlsplätz am Ohio und am owan Mississipi vawoitn soidn, bis de U.S.A. de Schuidn ozoiht hobm.
- So haum de Englenda nu a guads Gscheft mid de Haundlsplätz gmocht. Owa se hobm koane Bresln mea mid de Indiana ghobd, des is eahna jo nix meah augaunga. Owa trozdem hobms so nu an Fuaß in da Tüar drin ghobt.
- In Versaille hod ma nua iwa de Aulign vo de neichn Schtootn und de Englenda vahaundlt.
- De Intaressn vo de Ureiwohna san nia eawehnt wuan. Jo es woa glei aso ois wia waun De goa ned scho Joahtausende af dem Kontinent glebd hedn. Denan eahnane Aulign oda Viaschtöllungan san oafoch untan Vahaundlunstisch gfoin. Zweng Dem is via de Indiana da Kriag a weidagaunga.
- Da Druck vo de Siedla is narrisch augwoxn. In de Joah vo 1785-1790 hobm se alloane im Ohio-Toi iwa 20.000 Siedla nidaglossn. Obwoi de U.S.Regiarung de Siedla empfoin, se vo de Indianagebiat feanzhoidn, woa fia De da Aureiz vom vamondli nu jungfreulign Laund fia Se vü z`groß. Wos owa a jeda zehnte Siedla mid seim Lebm zoihn hod miaßn.
Im Oita vo 15/16 Joah soid da Tecumseh an seim easchtn Kriagszug teugnumma hobm. Dabei soid a im Nohkaumpf 4 Kegna daschlogn hobm. Vo do weg is a aa bei de ödan Kriaga reschpektiad gwest. Und ois umma 3 Joah schpoda, bei am Augriff af a Fort da Aufiahra vo seina Shawneegruppn gfoin is, hod a wia söbstvaschtendli de Gruppm weifa augfiat.
1788 is bei de Kämpf sei vaehta Bruada Chiksika gfoin.
- Weu da neiche Schtoot, in da oidn Wöd wia a Magnet de Eiwaundara auzogn hod, san de englischn Forts boid neamma in da Einödn glegn, sundan san boid vo de neichn Ausiedlungan umzinglt gwest.
- Owa nu wichtiga woa, daß de englischn Companien gfiacht hobm, das in eitreglign Pözhaundl an de US-Ami valian kentn.
![](http://upload.wikimedia.org/wikipedia/commons/thumb/8/8a/Wilderness_road_de.png/220px-Wilderness_road_de.png)
Und so hobms de Indiana gegn de neichn Siedla afgschtachtl. Kloanane Scharmützl hobm daun 1790 in an Kriag gmündt.
- Da President Georg Washington hod em Genereu Harmar en Aftrog gebm, das a an da Siedlagrenz, de Indiana vatreibm soid.
- Da Harmar hod bei Cincinnati de Truppn gsaummit und is noch Nuadn zogn. Do is a owa in an Hintahoit vo de Shawnee, Wyandot und de Delaware kema. Vo de eppa 1500 Amerikana hobm nua Wenige bis an Ohio zruckflichtn kena, de Meahzoi san im Kaumpf gfoin.
1791 hods da Genareu St. Clair, bessa ausgrist, nuamoi vasuacht. Ea hod umma 11/12 hundat Mau beföhligt. Eafohrane Siedla, Miliz und hod a Scouts dabei ghobt. Owa de Miami untam Little Turtle hobm eahna wieda an Hintahoit glegt und so san 832 Amerikana und davo 40 Offizia gfoin. De Indiana hobm dabei nua 66 Mau valuan.
Da Tecumseh is mid an Jogdtrupp in Ohio entlaung zogn und hod a de Mississippiindiana bsuacht. Zruckkema sans eascht 1790, wia de Indiana den Sieg gegn em Harmar gfeiat hobm.
- Midm Little Turtle und seine Maimi is a za de Quöln vom Wabash groast, wo a se im Kaumpf gegn de Truppn vom St Clair auszoachnt hod.
Sei Reifezeid
[Werkeln | Am Gwëntext werkeln]Bei de Amerikana woa des a Schock, zwoa Schlochtn gegn de Indiana valoan und des in nua zwoa Joah. Ma woas do gwehnd, das ma gegn de Hoibwüdn de Kämpf gwind.
- Do hod da Genareu Anthony Wayne s`Komando iwanumma. Ea hod im Fort Pitt oide Pionia, Foinschtölla und Jaga zaumgschtöd. De san daun vo Eahm in zwoanzg Monat drillt und ausbüt woan. Ea hod so aus de Einzkempfa a eigschpüde Kaumpfmaschien gfuamd.
![](http://upload.wikimedia.org/wikipedia/commons/thumb/7/79/Tecumseh_bust_at_the_Royal_Ontario_Museum.jpg/220px-Tecumseh_bust_at_the_Royal_Ontario_Museum.jpg)
De Indiana hobm noch de zwoa Sieg Owawossa kriagd. Nua da Little Turtle woa realistischa und hod gmoand, Festgschriebane Gsetz san bessa ois a neicha Kriag. Daun is da Genereu Wayne nochm Westn zogn und hod bei de Quöln vom Wabash den Schtitzpunkt Recovery grindt.
- Des woa natiali fia de Indiana a Zoachn. Genau duat hod as afbaud, wo se de Schlocht gwunna hobm.
- Dahea san de Shawnee unta eahnan Heibtling Blue Jacket und de Wayandot untam Tarhe hiezogn und woitns vatreibm. Se hobm se do bluadige Köpf ghoid und so woitn ses Aundas mocha miaßn.
- Es is a nu a Irokesnoboatnung kema, de eahne Untaschtitzung aubotn hobm, de wos owa nochand ned kema san.
- Oiso hobs em Plan gfoßt, se wea nebm am englischn Haundlsfort Miami, am Michigan See zlogan. Eahna Rechnung woa, waun de Amerikana augreifn, muaß da englische Kommandant Campell mid seine Soidotn eigreiffa.
Da Wayne is a kema. Owa nua bis eppa via Kilometa bis zan Haundlpostn zuwi. Do homs daun glogat. Af des affi san de Indiana ungeduidig woan und hobm de vaschaunztn Soidotn augriffa. In dera valuana Schlocht vo Fallen Timbers hobm de Indiana an hochn Bluadzoi zoihn miaßn. Dabei is a aa jingara Bruada vom Tecumseh tod liegmbliebm.
Da Tecumseh hod do nocha nu a Red ghoitn: De Schtämm hobm se zvü af de Rotreck (Englenda) valossn. Nua aus eigna Kroft kenan ma insa Schicksoi meistan. Do is scho in Eahm da Plan greift vo an Indianabund.
- Owa de Indiana woan nu nidagschlogn nochm leztn Kaumpf.
- Dahea is zan Friednsvatrog kema, wo se de Miami und de Shawnee vapflichtn hobm miaßn, des Ohiotoi za valossn. Ois Entschedigung hobms a jeda Schtaumm Woarn fia eppa 2500 Dollar kriagt.
In ana großn Red hod da Tecumseh nu gegn em Friednsvatrog gred und ea hod a sei Wampum (Untaschrift) ned untan Vatrog gsezt.
- Do hod da Genereu Wayne easchtmolig in Naum Tecumseh gheat.
- Em Gouvaneua Harrison hod a gschriebm:
- Nua da Tecumseh mocht Bresln. Zan Glick is da Eifluß vom Little Turtle, af de Rodn nu gressa. So hobm ma den Friednsvatrog unta Doch und Foch. God sei Daunk. Hoff, das i den Naum Tecumseh nemma heahn wead.
- Sei Wunsch is eahm ned in Eafüllung gaunga, wei scho siebm Joah schpoda is em Tecumseh sei Indianabund gschtaundn
Da Bolitika Tecumseh
[Werkeln | Am Gwëntext werkeln]Do da Tecumseh a aa großa Redna woa, is sei Ausehgn bei de Indianaschtämm mera gwoxn. Ob 1799 is a sei Eifluß augwoxn. Im Fruahjoa is a za de faschidan Schtämm groast um fia sei Idee vo da panindianischn Eiheid gwoabn. Eahm is a Indianaheer vo eppa 30.000 Kempfa viagschwebd.
- Ea is a za de Creek, Choctaws und Cherokees groast und hod 1805 so vü Zuaschproch und Untaschtitzung vo mera Schtämm ghobd wia nu koa aundara Indianaheibtling vua Eahm.
- Natiali hod a aa augsehgnte Gegna ghobd. Do woa amoi da Little Turtle vo de Maimi, owa a da Shawnee-Heibtling Black Hoof und bade woan augsehgne Kriagsheibtling. Se hobm owa af de Söbstschtendigkeit vo de Vöka bschtaundn.
![](http://upload.wikimedia.org/wikipedia/commons/thumb/b/bf/Tecumseh_ante_Harrison.jpeg/220px-Tecumseh_ante_Harrison.jpeg)
Aus dene Gründ hod da Tecumseh, a schtaummiwagreifads Simboi gsuacht, des de Schtommeszuaghörigkeit afhebm kunnt.
- Do hod as mid religiösn Middl vasuacht und so is sei Bruada da Lowawluwaysica ins Schpü kema.
- Dea woa zwoa a Alkoholika und oaaugad, owa sunst a pfiffiga Mau. Ea hod se ois Prophet an Naum gmocht, weu a in Tod vo an Indianaheibtling vuaheagsogt hod. Owa aa, wia a de Sunnafinstanis aukindigt hod, de a owa zvia vo de Weißn eafoahn hod. Und so is a zan gfiachtn Prophetn Tenskwatawa wuan (De offane Tüar 1775-1834).
Weu da Alkoholismus bei de Indiana a vaherands Problem woan is, hod a fia seine Leid in Haundl mid de Weißn vabodn, vuaoim es Kaffa vom Schnops. Des hod de Haundlspostn und Forts finanziö weh dau.
![](http://upload.wikimedia.org/wikipedia/commons/thumb/a/a1/Ten-sq%C3%BAat-a-way.jpg/220px-Ten-sq%C3%BAat-a-way.jpg)
Daun hod a mid seim Bruada Prophet Ville gründt. Do hobm seine bessan 400 Midkempfa glebd.
Im Septemba 1809 hod da Harrison im Fort Wayne (owan Recovery), mid de Delaware, de Miami und de Potawatomo an neichn Vatrog gschloßn. In dems 60 Meiln Laund em Wabash entlaung an de Weißn otretn hobm.
- Do is da Tecumseh owa narrisch woan und eah hod teufid:
- Ka roda Mau hod des Recht, Laund des ins Olle ghearad, de Laungmessa za vakaffa. De Weißn san wia a gwoitige Flut, de ins Olle datrenkn wead.
- I, da Tecumseh, hob an Damm baud, dea des Vadeam afhoitn kau.
- Da Damm is da Bund olla Schtämm, vom Ohio bis zan Mississipi. Und ohn da Zuaschtimmung vom Bund deaf Neamand meah Laund vakaffa.
Damid is außa, hod da Harrison an am Kongress gschriebm. Da Shawnee wü de Schtämm af seina Linie eischwöan. Owa ea hod nu a Wengl bresln dabei. Dahea dad i Viaschlogn, mia maschian noch Tippecanoa um de Rodn zroatzn und aussazfoadan.
1811 is da Tecumseh, za de sidlign Indianaschtämm af a Weaberoas gaunga. Am 26. Septemba is owa da William Harison mid 900 Soidotn noch Prophet Ville zogn und da Tecumseh woa bei de Creek.
- Da a Wengl varuckte Tenkswatawa woit sein Bruada ois Aufiahra iwatrumpfn und hod se ned laung roatzn lossn. Und so hobms de vaschaunztn Amerikana augriffa. Noch via Schtundn woa da Kaumpf vuabei. Ois da Tecumseh zruckkema is woa Prophet Ville saummt olle Vuarät zaschteat. Midm Tenkawatawa seina Propheatarei woas viabei. Afgrund vo seim Götungsdraung is da Indianabund zbrocha. Vom Tenkswatawa hod ma vo do weg nix meah ghead und a da Tecumseh hod sein Bruada neamma troffn.
- Des woa a großa Rückfoi fian Tecumseh seim Traam, owa im Nuadn bei de Schtämm hod a oiweu nu an großn Eifluß ghobd. Ea söwa is noch Kanada gflohn.
![](http://upload.wikimedia.org/wikipedia/commons/thumb/5/59/Tecumseh%27s_War.png/220px-Tecumseh%27s_War.png)
Da Födherr
[Werkeln | Am Gwëntext werkeln]1812 is da zwoate englisch-amerikanische Kriag ausbrocha. De Ami woitn de englischschprochign gbiat an eahnan Schtootnbund auschliaßn. Do hod se da Tecumseh scho de Englenda augschlossn und Eah is a da Kommandant vo olle indianischn Kämpfa woan.
- Untam Tecumseh hobm daun nua 70 Indiana und 40 britische Soidotn en Van Horne, mid 600 Mau gschlogn.
De Amerikana hobm scho fria de Englenda aus Detroit außidrengt ghobd.
Ois in Tecumseh seine Indiana vua Detroit afmaschiat san hod se da Beföhshowa, da Brigadegenareu William Hull kaumpflos eagebm.
- Da Tecumseh hod nemli seine 600 Indiana so gschickt owei aundas afmaschian lossn, das da Hull gmoand hod, das a eppa 5000 Indianakriaga via eahm hed. A Chicago hod a nu eaowat.
Da Tecumseh hod se owa nia gaunz af seine Vabündtn Schtämm valossn kena. De Wyandot hobm mera Moi de Front gwexlt und a nu 1812 san de Ottawas und a de Chippewas oafoch hoamgroast.
- 1813 hod da Tecumseh za de Schtämm a Rundroas gmocht und is mid hundate Kriaga zruckkema.
De Amerikana woitn natiali Detroit wida zruckeaowan und hobm zweng dem in da Nachn Fort Meigs afbaud. Drafhi hod des da englische Beföhshowa Henry Procter, mid da Untaschtitzung vo 1200 Indiana untan Tecumseh, des Fort Meigs augriffa.
- Des unzlenglige Gländ ummas Fort woa fia Augriff ned günsti. Und de Amerikana hobm trotz Bschuß vo de englischn Kanonan ned afgebm. Jo se hobm sogoa bei an Ausfoi de engl. Atüllarieschtöllung eaowad.
- Da Tecumseh hod mid seine Leid de Log grett. Ea hod in am Gegnaugriff de Arischtöllung wida zruckeaowat und de Amerikana zrucktribm.
- Owa ned Olle hobm se ned ins Fort rettn kena. Vo de Gfaunganen san scho 20 Skalpiat und töt wuan. Wia da Tecumseh zruckkema is hod a des sufuat untabundn und so de restlign Gfaungane es Lebm grett.
- Da Tecumseh hod se scho ois junga Beasch gegn de Martarei vo de Gfaunganan gwead und se oglehnd. A ois Kriagsherr hod a sowos ned leidn kena und untabundn. waun a ned söwa dabei woa is eahm leida ned oiweu glunga und de Indiana hobm de neichn Bräuch augwent (Skalpian).
![](http://upload.wikimedia.org/wikipedia/commons/thumb/8/87/Anglo_American_War_1812_Locations_map-en.svg/220px-Anglo_American_War_1812_Locations_map-en.svg.png)
Weu de englische Fiahrung ned gscheid dau, hod da Tecumse de Eahrung za an englischn Brigadegenareu oglehnt und hod em engl Beföhshowa Procter empfoin, eah soi se liwa söwa a Weiwaschitzn aulegn.
- Af des affi is de Belogarung vom Fort Meings obrocha wuan, de Englenda hobm se noch Nuadn zruckzog. Owa se hobm vuahea nu olle Haisl in Detroit zaschteat.
Sei End
[Werkeln | Am Gwëntext werkeln]De Amerikana hobm de Britn noch Kanada eini fafoigt und dabei a boa Forts zaschteat.
Afm Eriesee hod de amerikanische Flottn, untam Kommodore Perry, am 10 Septemba 1813, de Englische vanicht.
- Af des affi hod se da Genareu Procter nu weida zruckzogn. Eascht af des Drenga vom Tecumseh hod a se za an Kaumpf iwaredn lossn. Nebm an Sümpfgbiat, beim Fluss Thames, hom Se se za Schlocht afgschtöd. Weu da Procter zweng Soidotn ghobt, hod a nua a launge dinne Linie afschtön kena. Em Tecumseh sei Schlochtplan is ned afgaunga, weu a dichta Bodnnöwi afzogn is.
![](http://upload.wikimedia.org/wikipedia/commons/thumb/2/29/Death_of_Tecumseh.jpg/220px-Death_of_Tecumseh.jpg)
Da Tecumseh woa wia sei Traam innalich zabrocha. Ois de Amerikana augruckt san, hod a sein Söwi (Säbel) an seina Untafiahra gebm, mid de Wuat, eah soidn seim Suhn bringa.
- Daun hod a de brittane Iwamocht vom Owast Richard Jackson augriffn und se ins Getümml gschmißn.
- In dem Kaumpf is a duach an Brustschuß (Kopfschuß?) töt wuan.
- Sei Leich is nia gfundn wuan, weu olle Indiana so schtoak vaschtümmit gwest woan, das mas ned ausanaunda kena hod.
Mid em Tod vom Kriagsherr Tecumseh und da Nidalog am Thames woa a da zwoate Britisch-amerikanische Kriag goa. Fia de Britn und de Amerikana hod se gbiatsmaßi ned vü gendat, owa fia de Indiana is des Unheu nu bleda weidagaunga.
Bei de Amerikana is da Indianahoßa, da Genareu Andrew Jackson Präsident wuan. Ea hod scho in Florida de Seminolen in de Sümpf treibm lossn. Und so is a de Indiana im Nuad-Westn gaunga.
Da edle Wüde
[Werkeln | Am Gwëntext werkeln]Tecumsehs Vasuach vo da Einigung da nuad-westlign Indianaschtämm, woa vo Aufaung au zan Scheitan vauateud.
- De Annimositätn, jo sogoa de Joahhundate laungan kriagarischn Feindschoftn untaranaund, woan schwaa zan Iwawindn.
![](http://upload.wikimedia.org/wikipedia/commons/thumb/5/5a/Brooklyn_Museum_-_Ledger_Book_Drawing_-_3.jpg/220px-Brooklyn_Museum_-_Ledger_Book_Drawing_-_3.jpg)
Da Tecumseh lebt owa nu Heid, im Bwustsei da Amerikana ois da edle Wüde weida.
- Megligawoas weu a seine gfaungane Gegna guad behaundlt hod.
- In da Owaschicht is sei Figua a aa Wengl vakleat wuan.
- So is a da schpodare Genareu William Tecumseh Sherman midm zwoatn Vianam nochm Indianaheibtling tauft wuan. Und Eahm noche is a da Sherman Paunza benaunnt woan.
Litaradua
[Werkeln | Am Gwëntext werkeln]- Stig Förster/Markus Pöhlmann/Dierk Walter, Außageba: Kriegsherren der Weltgeschichte. Stephan Maninger; Tecumseh, Roter Napoleon der neuen Welt. Seitn 202-217.Deutscher Taschenbuchverlag, 2010, Minga. ISBN 978-3-423-34578-1
- Lothar Wehrle: Abenteuer Mississipi, Weltgeschichte am großen Strom. Molden Verlag, Wean1983. ISBN 3-88919-021-9
- Peter Farb: Die Indianer, Entwicklung und Vernichtung eines Volkes. MTV Verlag, 1968/1971 Wean. ISBN 3-217-05008-8
- Dee Brown: Begrabt mein Herz an der Biegung des Flusses. Drömersche Verlagsanstalt, Minga 1977. ISBN 4-326-00351-1
- Gregory Evans Dowd: A Spirited Resistance: The North American Indian Struggle for Unity, 1745–1815. Johns Hopkins University Press, Baltimore 1992.
- R. David Edmunds: Tecumseh and the Quest for Indian Leadership. Little Brown, Boston 1984.
- Bill Gilbert: God Gave us This Country: Tekamthi and the First American Civil War. Atheneum, New York 1989.
- John Sugden: Tecumseh: A Life. Holt, New York 1997.
- John Sugden: Tecumseh’s Last Stand. University of Oklahoma Press 1985.
- Cave, Alfred A. "The Shawnee Prophet, Tecumseh, and Tippecanoe: A Case Study of Historical
- Benjamin Drake: The Life of Tecumseh and His Brother The Prophet. Reprint der Ausgabe von 1858, University Press of the Pacific, Verlagsort 2002.
- Fritz Steuben: Tecumseh – Der Fliegende Pfeil, Franckh, Stuttgart 1930; sowie weitere 7 Bände.
Im Netz
[Werkeln | Am Gwëntext werkeln]- http://de.wikipedia.org/wiki/Tecumseh
- http://de.wikipedia.org/wiki/Biberkriege
- http://en.wikipedia.org/wiki/Tecumseh%27s_War
- http://en.wikipedia.org/wiki/Tecumseh%27s_Confederacy
- http://de.wikipedia.org/wiki/William_T._Sherman
- http://en.wikipedia.org/wiki/United_States_Capitol_rotunda
- http://www.indianerwww.de/indian/tecumseh.htm
- http://www.eighteentwelve.ca/?q=eng/Topic/107
- http://courses.missouristate.edu/ftmiller/Documents/Prophet&Tecumseh.htm
- Tecumseh!, des Drama.
- Tecumseh – DEFA-Vafuimung, IMDB.
Video:
- http://www.eighteentwelve.ca/?q=eng/Topic/6 | Text und Video, englisch
Kategorie:Noadamerika Kategorie:Indianer Kategorie:Geboren 1768 Kategorie:Gestorben 1813 Kategorie:Indianische Kultur Kategorie:Wuida Westn