Rōnin

Un ronin (xaponés 浪人: rōnin, tamién trescrito rounin) yera un samurái ensin amu o señor na dómina del Xapón feudal (1185–1868). Un samurái llega tar ensin amu per aciu de la muerte d'esti, o por perder el favor o mercé del so amu.

Nel usu modernu, el términu aplícase tamién pa describir un emplegáu que tan nuna situación "ente patronos " o un bachiller qu'inda nun almitieron na universidá.

Etimoloxía

La pallabra ronin significa lliteralmente "home fola". El términu anició nos periodos Nara y Heian, cuando se refería a un siervu qu'afuxera o desertara de les tierres del so amu. Daquella principió a usase pa un samurái que perdiera al so señor. (D’ehí’l términu "home fola", qu'ilustra a unu que ta socialmente al debalu.)

Estatus

Según el Bushido Shoshinshu (el Códigu de los Samuráis), supónse qu'un samurái tien que cometer oibara seppuku (tamién "hara kiri", suicidiu ritual) al perder al so señor. El que nun quería honrar el códigu diba "a lo suyo", lo que significaba pasar per una gran vergoña. Lo indeseable del estatus de ronin debíase sobre too a la discriminación impuesta polos otros samuráis y polos daimyos (señores feudales).

Como samuráis regulares, los ronin llevaben les dos espaes (daisho). Tamién usaben una variedá d'otres armes. Dalgunos ronin, normalmente si taben ensin cuartos, llevaben un “bo” (palu d'ente 1,50 y 1,80 m) o un “jo” (palu más pequeñu o cayáu d'ente 1 y 1,50 m), o usaben un “yumi” (arcu). La mayoría de les armes reflexaben el ryu o escuela de bujutsu de la que veníen si yeren estudiantes.

Nel periodu Edo, col ríxidu sistema de clases y lleis del shogunáu, el númberu de ronin agrandóse de manera. La confiscación de feudos baxo’l gobiernu del tercer shogun Tokugawa, Tokugawa Iemitsu, produxo un aumentu enforma grande de los ronin. Nos periodos anteriores, los samuráis podíen movese fácil ente señores y hasta ente ocupaciones. Tamién podíen casase ente clases. Pero nel periodu Edo los samuráis foron llendaos, y sobre too torgáron-yos poder emplegase con otru amu ensin primero tener el permisu del postreru. Amás los samuráis de nivel baxu, davezu probes y ensin poder escoyer, yeren forciaos a colar o a escapar de los sos señores.

Historia

Nos periodos Kamakura y Muromachi, cuando los guerreros se quedaben coles tierres qu'ocupaben, un ronin yera un guerreru que perdiera les sos tierres. Nestos periodos, como davezu había per tol Xapón guerres a pequeña escala, los daimyos necesitaben enantar los sos exércitos, asina que los ronin teníen oportunidaes de sirvir a nuevos señores. Tamién había ronin que se xuntaben en bandes, dedicándose a los robos y a les refrontaes.

Especialmente nel periodu Sengoku, los daimyo necesitaben más homes d'armes, y inclusive cuando un señor morría, un ronin podía sirvir a un nuevu amu. Al aviesu del posterior periodu Edo, los llazos ente señor y samurái yeren floxos, y dellos samuráis que nun taben satisfechos col tratu dexaben a los sos amos y buscaben nuevos señores. Munchos guerreros sirvíen a un señor tres otru, y dalgunos inclusive llegaben a daimyo. Por exemplu, Todo Takatora sirvió a diez señores. Amás la división del pueblu en clases inda nun se produxera, asina que yera posible cambiar la ocupación d'unu de guerreru a mercadel o a llabrador, o al contrario. Saito Dosan yera un mercadel qu'ascendió pelos rangos de guerreru hasta llegar a daimyo.

Cuando Toyotomi Hideyoshi foi auniendo poco a poco fasteres del país cada vez más grandes, los daimyo atoparon innecesario atropar más soldaos. Dempués, la Batalla de Sekigahara (1600) resultó na confiscación o reducción de los feudos de munchos daimyo del bandu perdedor; poro, munchos samuráis convirtiéronse en ronin. Hasta cien mil ronin xuntáronse a Toyotomi Hideyori pa lluchar nel sitiu d'Osaka. Nos años de paz que siguieron yá nun yera tan necesario caltener caros exércitos permanentes, y munchos ronin sobrevivientes tornaron a la llabranza o a la ciudá. Unos pocos, como Yamada Nagamasa, foron en cata d'aventures pel estranxeru como mercenarios. Pero la mayoría vivieron como ronin na probitú. Baxo’l tercer shogun Tokugawa, Tokugawa Iemitsu, el so númberu taba cerca del mediu millón.

De primeres, el shogunáu víalos como un peligru, y echábalos de les ciudaes o llendaba los barrios onde podíen vivir. Tamién-yos torgaben sirvir a nuevos amos. Viendo que como ronin teníen cada vez menos opciones, auniéronse nel Llevantamientu Keian (1651). Esto obligó al shogunáu a reconsiderar la so política. Afloxó les torgues sobre l'heriedu de los daimyo, resultando en menos confiscaciones de feudos, lo que permitió a los ronin xuntase a nuevos señores.

Ente los ronin de más nomadía tán Miyamoto Musashi, el famosu espadachín, y los Cuarenta y siete Ronin.

Al nun tener l'estatus o'l poder de los samuráis con emplegu, los ronin teníen davezu mala fama, y el grupu yera oxetu de mofla o de sátira. Nun yera deseable ser un ronin, porque significaba nun tener ingresos.

Como exemplu de la vergoña que sentíen los samuráis que se convertíen en ronin, Algernon Bertram Freeman-Mitford, Lord Redesdale, contó qu'un ronin se matara na sepultura de los Cuarenta y siete Ronin. Dexó una nota que dicía que tentara d'entrar al serviciu de los daimyo del señoríu Choshu, pero que fuera refugáu. Nun queriendo sirvir a otru amu, y anoxando ser un ronin, decidió matase.

Per otru llau, el famosu escritor del sieglu XVIII, Kyokutei Bakin, renunció a la so llealtá a Matsudaira Nobunari, al serviciu del que’l padre samurái de Bakin dexara tola so vida. Bakin convirtióse voluntariamente en ronin, y col tiempu dedicóse a escribir llibros (munchos con tema samurái).