Doblepensar

Doblepensar (doublethink n'inglés) ye un neoloxismu qu'apaez na novela 1984 de George Orwell, y que forma parte del léxicu de la llamada neofala.

Definición

Según l'autor, el doblepensar, como ferramienta de dominación, puede definise de la siguiente manera:

Doblepensar significa'l poder, la facultá de sostener dos opiniones contradictories simultáneamente, dos creencies contraries allugaes al empar na mente. L'intelectual del Partíu sabe en qué direición han de ser alteriaos les sos alcordances; por tanto, sabe que ta trucando la realidá; pero coles mesmes satisfaise a sigo mesmu per mediu del exerciciu del doblepensar nel sentíu de que la realidá nun queda violada. Esti procesu hai de ser consciente, pos, si non, nun se verificaría cola abonda precisión, pero tamién tien que ser inconsciente por que non dexe un sentimientu de falsedá y, por tanto, de culpabilidá. El doblepensar ta enraigonáu nel corazón mesmu del Ingsoc, una y bones l'actu esencial del Partíu ye l'empléu del engañu consciente, calteniendo al empar la firmeza de propósitu que caracteriza a l'auténtica honradez. Dicir mentires al empar que se cree bonalmente nelles, escaecer tou fechu que nun convenga recordar, y depués, cuando vuelva ser necesariu, sacalo del olvidu namái pol tiempu que convenga, negar la esistencia de la realidá oxetiva ensin dexar nin por un momentu de saber qu'esiste esa realidá que se niega... tou esto ye indispensable. Inclusive pa usar la pallabra doblepensar ye precisu emplegar el doblepensar. Porque pa usar la pallabra almítese que se tán faciendo trampes cola realidá. Por aciu un nuevu actu de doblepensar bórrase esta conocencia; y asina indefinidamente, calteniéndose la mentira siempres unos pasos delantre de la verdá. A última hora, gracies al doblepensar foi capaz el Partíu —y va siguir siéndolo mientres miles d'años— de parar el cursu de la Hestoria.

Fragmentu del llibru ficticiu Teoría y práctica del coleutivismu oligárquicu d'Emmanuel Goldstein, que'l protagonista de la novela, Winston Smith y el llector lleen simultáneamente.

Referencies

• Datos: Q587531