Dama de Baza

La Dama de Baza ye una escultura íbera del sieglu IV a. C., llabrada en piedra caliar policromada polos bastetanos. Atópase espuesta nel Muséu Arqueolóxicu Nacional d'España, en Madrid.

Afayu

Esta obra atopóse'l 22 de xunetu de 1971 pol arqueólogu Francisco José Presedo Velo nel Cuetu del Santuariu, necrópolis de l'antigua Basti (Baza), na provincia de Granada (España).

Taba dientro d'una cámara funeraria de 2,60 m² y 1,80 m de fondura, onde había amás una ánfora púnica que se comunicaba cola superficie per mediu d'un embudu, al traviés del que de xuru facíense dende l'esterior, llibaciones como ufriendes líquides. Esto indica que se profesaba cultu a la persona ellí soterrada.

Delantre de la dama había un pequeñu amontonamientu d'armes amburaes y otros oxetos que formaben la panoplia d'un guerreru. Los arqueólogos, basándose nesto, llegaron a la conclusión de que podría tratase del enterramientu d'un importante guerreru. Sicasí, recién estudios realizaos nos restos atopaos nel interior de la Dama revelen qu'éstos pertenecieron a una muyer.

Les teoríes que s'embaraxen anguaño son que podría tratase d'una guerrera divinizada (en rellación a les falcates y otres armes atopaes nel xacimientu) o d'una reina-sacerdotesa. Magar el calter sacru de la persona ellí soterrada ye más que nidiu, nun lo ye tanto'l so calter guerreru. Ye posible que les falcates sían simples ufriendes o demarcadores del prestíu social del que gociaba la persona ellí soterrada (por cuenta de lo costosa que yera la ellaboración d'una d'estes espaes), polo que se tiende a pensar que se tratara con más probabilidá d'una figura femenina de gran importancia social, como una reina o sacerdotesa.

Descripción y significáu

La dama ta sentada nun tronu que tien unes ales bastante llargues nel respaldu. Les pates delantreres del tronu son garres de lleón. La superficie ta rematada cola téunica del estucado y pintada dempués n'azul, colloráu, marrón y negru, tou ello apiguráu con yelsu.

La so cara amuesa unes faiciones mediterranees. Tien el pelo prieto, con dos grandes ondes llaterales qu'asomen per debaxo d'un tocáu compuestu por una cofia o tiara que cubre parcialmente les oreyes y qu'amás ta decorada con tres bandes. Lleva unos perendengues de gran tamañu que tán buecos y que cuelguen direutamente del lóbulu de la oreya. El pescuezu ta cubiertu por cuatro gargantiyes y de siguío lluz un collar formáu por cuentes en forma de tonel al que engabítense cinco colgantes. Otru gran collar amuésase con tres pieces en forma de corazón. Nos deos tien numberosos aniellos y en cada muñeca pueden vese dellos aros.

Bibliografía

Francisco J. Presedo Velo, «La Dama de Baza», Trabajos de prehistoria vol. 30, nᵘ 1, 1973, páx. 151-216. ISSN 0082-5638

Referencies

Enllaces esternos

Ficha en CERES