Saltar al conteníu

Bandera de la Ciudá de Nueva York

De Wikipedia
Ficha d'escuduBandera de la Ciudá de Nueva York
Datos
Estáu Estaos Xuníos
Entidá Nueva York
Fecha d'adopción 1625 (398 años)
Colores azul, blancu y naranxa
Cambiar los datos en Wikidata

Les banderes de la ciudá de Nueva York inclúin la bandera oficial de la ciudá, les banderes respeutives de los cinco distritos de la ciudá (The Bronx, Brooklyn, Manhattan, Queens y Staten Island) y les de determinaos departamentos públicos. La bandera oficial de la ciudá de Nueva York ye tricolor: fórmenla trés bandes verticales del mesmu grosor, de color azul, blancu y naranxa, col azul apegáu al asta, y col sellu de la ciudá, n'azul, ocupando'l centru de la banda central blanca. El so diseñu derívase del de la bandera del Príncipe (la Prinsenvlag) de les Provincies Xuníes de los Países Baxos tal y como ondeaba na colonia de Nueva Ámsterdam en 1625.

Historia

[editar | editar la fonte]
Sellu oficial de la ciudá, en blancu y negru, tres les modificaciones de 1977.

Demientres los primeros sieglos de la so historia la ciudá de Nueva York nun tuvo bandera nin sellu oficial[1]. A finales del sieglu XIX usábase una enseña non oficial, formada por un sellu redondu n'azul nel centru d'un campu blancu. En 1914, pa conmemorar el 250 aniversario del nomamientu del primer alcalde poles autoridaes britániques, la Comisión d'Arte de la Ciudá nombró un comité especial col encargu de que creara los primeros sellu y bandera oficiales. El comité solicitó la collaboración de la Sociedá Histórica de Nueva York pa que-y apurriera los sellos históricos usaos pol gobiernu municipal embaxu del dominiu de neerlandeses y británicos, col envís d'incluyir dél del so simbolismu nos nuevos sellu y bandera oficial[1].[2]

La resolución del comité describe la so propuesta de bandera coles siguientes pallabres[1]: «Na nuesa bandera los colores son neerlandeses, les armes son ingleses y el blasón ye distintivamente americanu; pero la bandera como tal ye la bandera de la Ciudá, que medró dende los sos entamos pa convertise na casa de toles naciones, la gran ciudá cosmopolita del mundu, la Ciudá de Nueva York»[3]. La propuesta de bandera foi aceptada'l 6 d'abril de 1915, y presentada al públicu por primer vegada'l 24 de xunu d'esi añu[4].

El diseñu actual data del 30 d'avientu de 1977, cuando'l sellu foi sutilmente modificáu. La fecha qu'apaez nelli cambióse de 1664 (añu nel que'l reinu d'Inglaterra tomó posesión de la colonia) a 1625, añu de la fundación de la colonia que dio orixe a la ciudá. El cambéu foi propuestu pol presidente del conseyu de la ciudá, Paul O'Dwyer (nacíu n'Irlanda), pa dar valor a les aportaciones neerlandeses a la historia de la ciudá y facer de menos el legáu británicu. La decisión foi polémica, una y bones la fecha propuesta yera discutida, porque al asentamientu diérase-y calter llegal en Países Baxos en 1624 y non en 1625, pero l'alcalde acabó firmando'l cambéu y faciéndolu oficial[5].

Diseñu

[editar | editar la fonte]

La sección 2-103 del Códigu Alministrativu de la Ciudá de Nueva York (Official city flag) establez que'l so diseñu ye'l siguiente: «Una bandera que combina los colores naranxa, blancu y azul, que formen trés bandes verticales d'iguales dimensiones (siendo l'azul la más cercana al asta), y col diseñu estándar del sellu de la ciudá, en color azul, nel centru de la barra blanca, magar qu'omitiendo nelli la lleenda Sigillum Civitatis Novi Eboraci. Los colores han de ser los mesmos de la bandera n'usu nes Provincies Xuníes de los Países Baxos nel añu 1625[6]».

Colores

[editar | editar la fonte]

L'azul, el blancu y el naranxa son los colores de la bandera histórica de los Países Baxos. El naranxa (Oranje en neerlandés) ye'l color adoptáu como de so polos neerlandeses pol nome del so rei Guillermu d'Orange. No que cinca a la colocación de los colores, l'informe de la comisión establez que "la disposición de los colores sigue la práctica avezada nes banderes tricollores (la francesa, la belga ya otres) d'asitiar la franxa del color más escur apegada al asta"[1].

La Sociedá História de Nueva York propuso orixinalmente una disposición horizontal de les franxes pa que la bandera fora más representativa de les banderes históriques neerlandeses, pero la comisión caltuvo la so orientación vertical[2].

Simbolismu del sellu

[editar | editar la fonte]
  • L'aigla calva ye'l símbolu de los Estaos Xuníos.
  • El nativu americanu representa a los habitantes orixinales del territoriu qu'ocupa la ciudá.
  • El marineru representa a los colonizadores
  • El castor simboliza a la Compañía Holandesa de les Indies Occidentales, que fue la qu'estableció'l primer asentamientu de la ciudá, nomáu Nieuw Amsterdam. El castor ye tamién l'animal oficial del estáu de Nueva York.
  • Les aspes del molín de vientu faen alcordanza de la época de dominiu neerlandés de la ciudá y la so próspera industria de molienda de cereales pa facer farina.
  • Los barriles de farina: faen alcordanza de que, nel sieglu XVII, Nueva York esfrutó d'una situación de monopoliu na molienda, que-y dio puxu comercial a la recién creada colonia.
  • 1625 foi l'añu de fundación del asentamientu de Nueva Ámsterdam. Orixinalmente nel escudu apaecía la fecha de la so conquista polos ingleses, 1664, pero camudose dempués pola fecha de la fundación de la colonia holandesa. Sicasí, la fecha real de fundación d'esta foi 1624.[7] La fecha de 1625 ye considerada "arbitraria" pola Sociedá Histórica de Nueva York, ya "simplemente incorrecta" pol historiador Michael Miscione[5].

Incongruencia

[editar | editar la fonte]

Magar que les ordenances municipales establecen que la lleenda llatina tien d'omitise na bandera[8], na propia páxina web de la ciudá apaez con ella[6].

Otres banderes oficiales

[editar | editar la fonte]

La bandera ondea nel Ayuntamientu de Nueva York, na comisaría central del departamentu de policía de la ciudá y en delles propiedaes públiques, como los parques[9][10].

Dellos de los equipos profesionales de la ciudá usen los colores de la bandera como los sos colores oficiales, como los New York Knicks de la National Basketball Association,[11] los New York Mets de la Major League Baseball,[12] el Rugby New York de la Major League Rugby[13] y el New York City FC de la Major League Soccer.[14]

La oficina del alcalde tien la so propia bandera. Básase na oficial, a la que se-y añade un arcu de cinco estrelles de cinco puntes, n'azul, allugaes enriba'l sellu. Cada estrella representa a ún de los cinco distritos (boroughs) de la ciudá. Les dimensiones de la bandera del alcalde son fixes: 83,82 cm d'altor y 111,76 cm de llonxitú (33x44 pulgaes)[6].

La corporación municipal usa tamién una variantes de la bandera oficial; nesti casu, aparez la pallabra "COUNCIL" (corporación municipal) embaxu'l sellu[6]

Banderes de la ciudá
Bandera non oficlal de la ciudá, usada primero de 1915.
Bandera oficial de la ciudá
Bandera del alcalde de la ciudá
Bandera de la corporación municipal

Les banderes de los borough

[editar | editar la fonte]

Anguaño, namái Brooklyn y The Bronx tienen banderes de distritu oficiales. Los otros trés tienen banderes d'usu corriente, magar que nun son oficiales. Staten Island tentó de consiguir que la so bandera fora reconocida pol estáu nes décades de 1990 y 2000, pero los sos intentos nun cuayaron[15].

The Bronx

[editar | editar la fonte]

La so bandera ta formada por tres faces horizontales: la superior ye naranxa, la del mediu blanca y la inferior azul, mimetizando la bandera tricollor histórica de los Países Baxos. Nel centru de la bandera hai una guirlanda de lloréu, que simboliza l'honor y la fama, y arrodia l'escudu d'armes de la familia Bronck, que-y da nome al borough. Esi escudu amuesa la cara del sol elevándose dende'l mar, con rayos desplegándose a partir d'elli; simboliza la paz, la llibertá ya'l comerciu. L'escudu, de forma triangular invertirda, ta coronada por un aigla coles ales estendíes que mira hacia l'este, que representa "la esperanza d'un Nuevu Mundu ensin escaecese del Vieyu". Embaxu del escudu apaez una banda col eslogan oficial del distribu: ne cede malis, una espresión llatina que significa "nun cedas ante'l mal"[16]. La bandera foi adoptada en marzu de 1912, y reconocida como oficial pola ciudá'l 29 de xunu de 1915[17].

Brooklyn

[editar | editar la fonte]

La bandera de Brooklyn tien utilizáose de magar 1860, cuando'l distritu yera una ciudá independiente[18]. La bandera consiste nún sellu sobre fondu blancu. Nel sellu ovaláu y col diámetru mayor paralelu al asta de la bandera, represéntase la Diosa de la Xusticia, sobre fondu azul claru, llevando fasces, un símbolu tradicional de xunidá. El fasces compónese de seis cañes, que representen los seis poblaos del asentamientu orixinariu neerlandés[18]. El óvalu esterior ye un aniellu de color azul escuru nel que ta representada, na metá superior, la frase, escrita en neerlandés antiguu, Een Draght Maekt Maght, que puede traducise como "la xunidá fai la fuercia". La metá inferior tien la lleenda Borough of Brooklyn. Los bordes interior ya esterior del sellu son de color oru. Azul ya oru son los colores que representen al borough.

Manhattan

[editar | editar la fonte]

La bandera non oficial del distritu ye perasemeyada a la oficial de la ciudá; la única diferencia ye l'usu del sellu del borough en cuenta del de la ciudá nel centru de la banda vertical blanca. El sellu del distriu ye asemeyáu al de la ciudá, pero completamente circular. La figura del so interior ye la mesma, pero embaxu d'ella hai dos estrelles, y el conxuntu ta arrodiáu pola inscripción "BOROUGH OF MANHATTAN NOVEMBER 1, 1683". Esa fecha fai referencia al momentu nel que la Provincia de Nueva York foi dividida en 12 condaos pol gobernador Thomas Dongan: ún d'ellos foi'l condáu de Nueva York (New York County), que caltién de magar les sos llendes actuales. Antigualmente'l distritu usaba esa mesma bandera pero con una inscripción diferente na contorna de la figura central del sellu. Esta yera "The President of the Borough of Manhattan" "NYC", y usábase pa representar a esa institución n'actos oficiales.

Queens

[editar | editar la fonte]

La bandera de Queens consiste en trés bandes horizontales: la d'arriba y la d'abaxu de color azul cielu, y la del mediu blanca. Estos colores representen les armes del primer gobernador holandés del asentamientu, Willem Kieft. Nel centru hay una figura formada por un wampum (cinturón d'abalorios usáu como moneda por dellos pueblos amerindios, que lu consideren sagráu) circular, qu'arrodia una rosa ya un tulipán cruciaos en forma de X. Na esquina superior izquierda de la bandera, sobre la franxa superior azul cielu, hai una corona, la espresión Queens Borough y la fecha 1898 (añu de la consolidación de los 5 boroughs de Nueva York)[16], too en color oro.

Los símbolos incluyíos na bandera representen la herencia colectiva del distritu. El wampum apaez n'homenaxe a los nativos Lenape qu'habitaben esti territoriu, al que nomaben Seawanhaka, la "islla de les conches marines", una y bones yera un llugar aú recoyíen amasueles y otros moluscos pa facer los sos abalorios. El tulipán representa a los primeros colonos del área, los neerlandeses, y la rosa roxa y blanca ye la rosa de Tudor, un símbolu tradicional d'Inglaterra y la monarquía inglesa. La corona representa'l nome del distritu, que lu recibió n'honor de Catalina Enriqueta de Bragança, reina consorte en 1683, añu nel que s'establecieran los doce condaos orixinales del estáu de Nueva York[19].

La bandera del distritu foi adoptada'l 3 de xunu de 1913, y ondeó por primer vegada cuatro díes dempués, na celebración del entamu de la construcción del sistema de tresporte dual rápidu del distritu[19].

Staten Island

[editar | editar la fonte]
Flag of Staten Island.
Antigua bandera de Staten Island (1071-2016).
Bandera del borough de Richmond (nome antiguu de Staten Island).

L'actual bandera de Staten Island foi adoptada en 2016[20], y ondea nos edificios del gobiernu municipal del distritu, de la so cámara de comerciu y del periódicu del borough, el Staten Island Advance.

El distritu tien trés banderes non oficiales. La primera representa, en fondu azul marín, un sellu circular naranxa nel centru nel qu'apaecen dos aves marines y el testu "Richmond Borough 1663 1898 New York". "Borough of Richmond" yera'l nome oficial de Staten Island hasta 1975. La segunda recoye los elementos escoyíos nún concursu convocáu en 1971 pol que yera d'aquella presidente del distritu, Robert T. Connor. La bandera, de fondu blancu, tien un óvalu nel centru. Na so metá superior vese'l cielu azul, con dos gaviotes esnalando, y embaxu una llinia de paisaxe en verde, que representa al distritu, y na que se dibuxa un paisaxe urbanu, símbolu de la zona habitada del distritu. El centru del óvalu ocúpalu la lleenda "Staten Island", en lletres mayúscules de color oro, y embaxu hai cinco llinies en forma de fola que simbolicen l'agua qu'arrodia la islla. La cabera bandera, l'actual, foi creada tres d'un concursu convocáu pol presidente del distritu del momentu, James Oddo. El fondu ye de color tierra, y tien nel centru un óvalu con una figura alegórica femenina de pie sobre la costa de la islla y mirando hacia The Narrows, l'estrechu que la separta de Manhattan, aú se ve al fondu'l barcu de Henry Hudson, el The Half Moon. Ente medies de les dos figures vese una lancha pequeña con trés pescadores d'ostres: dos nativos de la islla y un marineru del barcu de Hudson[18]. Magar que Oddo dixo que nun tenía decidío si facer la bandera oficial, como les de Brooklyn y The Bronx, la ciudá mercó delles copies en 2017 pa usala n'actos oficiales[20].

Banderes oficiales ya oficioses de los borough

[editar | editar la fonte]
  • The Bronx
    The Bronx
  • Brooklyn
    Brooklyn
  • Manhattan
    Manhattan
  • Queens
    Queens
  • Staten Island
    Staten Island

Ver tamién

[editar | editar la fonte]

Referencies

[editar | editar la fonte]
  1. ↑ 1,0 1,1 1,2 1,3 Pine, John B. (1915) Seal and Flag of the City of New York : Authorized by the Committee Appointed by the Mayor to Commemorate the Two Hundred and Fiftieth Anniversary of the Installation of the First Mayor and Board of Aldermen of the City of New York on June 24, 1665, and the Adoption of the Official City Flag on June 24, 1915. Consultáu'l 21 December 2016.
  2. ↑ 2,0 2,1 «Of Seals and Rampant Beavers: New York City's Flag on its 100th Birthday». Consultáu'l 21 December 2016.
  3. ↑ Committee of the Art Commission Associates, Seal and Flag of the City of New York, p. 84.
  4. ↑ «New York City's Flag, Centuries in the Making, Turns 100». Consultáu'l 21 December 2016.
  5. ↑ 5,0 5,1 «New York's Birth Date: Don't Go by City's Seal». Consultáu'l 21 December 2016.
  6. ↑ 6,0 6,1 6,2 6,3 City seal and flag, na web de los Servicios Alministrativos del Gobiernu de la ciudá de Nueva York.
  7. ↑ (2012) Discovering Black America, páx. 15.
  8. ↑ New York City Administrative Code, § 2-103, na web de la American Legal Publishing Company.
  9. ↑ Shattuck, Kathryn (1996-05-05). «F.y.i.» (n'inglés). The New York Times. ISSN 0362-4331. https://www.nytimes.com/1996/05/05/nyregion/fyi-024716.html. Consultáu'l 2019-12-04. 
  10. ↑ (15 November 2006) The Politics of Urban Beauty: New York and Its Art Commission, páx. 236–. ISBN 978-0-226-06305-8.
  11. ↑ LoRé M, How the New York Knicks Got Their Name, artículu na web theculturetrip.com (1 de marzu de 2018).
  12. ↑ Páxina web oficial de los New York Mets,
  13. ↑ Páxina web oficial del equipu Rugby New York.
  14. ↑ «New York City FC reveal subway token-inspired badge with heavy NYC influence». Major League Soccer. Consultáu'l 14 February 2017.
  15. ↑ «Staten Island 'landfill' flag gets dumped by new vision». Staten Island Advance. Consultáu'l 3 January 2017.
  16. ↑ 16,0 16,1 «Eighteenth Annual Report, 1913, of the American Scenic and Historic Preservation Society to the Legislature of the State of New York». Consultáu'l 3 January 2017.
  17. ↑ (1915) Proceedings of the Board of Aldermen, páx. 1089–.
  18. ↑ 18,0 18,1 18,2 «New York Today: Decoding Our Borough Flags» (June 14, 2017). Consultáu'l November 17, 2017.
  19. ↑ 19,0 19,1 «Queens Flag And Its Origin». Consultáu'l 3 January 2017.
  20. ↑ 20,0 20,1 «CITY PURCHASES UPDATED VERSION OF UNOFFICIAL STATEN ISLAND FLAG». Charter Communications (September 26, 2017). Consultáu'l November 17, 2017.

Enllaces esternos

[editar | editar la fonte]
Sacáu de «https://ast.wikipedia.org/w/index.php?title=Bandera_de_la_Ciudá_de_Nueva_York&oldid=4243863»