Badea de Botnia

Badea de Botnia
Situación
Tipu	golfu
Parte de	Botnia
Coordenaes	65°N 23°E / 65°N 23°E
	Badea de Botnia Badea de Botnia (Finlandia)
Datos

La badea de Botnia (en suecu: Bottenviken; en finés: Perämeri) ye una badea del mar Bálticu, la parte más septentrional del golfu de Botnia, alcontrada ente l'oeste de Finlandia y l'este de Suecia.

Xeografía

Suelse considerar que la llende sur de la badea ye una llinia ente la desaguada del ríu Rickleån, na mariña sueca, y l'estremu más oriental de la pequeña península de Kokkola.

Les agües de la badea son pocu fondes, abondo fríes y dada la gran cantidá de ríos que drenan nella, tienen bien poco salín, 0,2-0,4%, lo que fai que pueden vivir nes sos agües inclusive diverses especies de pexes d'agua duce y qu'en delles zones l'agua seya apta pal consumu humanu.

Permanez xelada unos 120 díes al añu, mientres unos 4 meses, algamando les zones más septentrionales una espesura d'hasta 1 m. Empléguense buques ruempexelos p'abastecer ciertos suministros a dellos puertos.

Llocalidaes a veres del golfu

Dalgunes de les llocalidaes más importantes na badea son:

Suecia: Skellefteå, Piteå y Luleå (45.467 hab. en 2005);

En Finlandia: Tornio (22.457 hab. en 2009), Kemi (22.651 hab.), Oulu (137.360 hab.), Raahe y Kokkola (45.766 hab.)

Ríos tributarios del golfu

la badea de Botnia drena la parte septentrional de Suecia y parte de la Finlandia noroccidental. Los principales ríos son, diendo d'oeste a este, esto ye, dende l'estremu suroccidental, en Suecia, en sentíu antihorario, los siguientes:

en Suecia:

ríu Rickleån, na mariña de la provincia de Västerbotten;
ríu Skellefte (Skellefteälven), en Västerbotten, con un llargor de 410 km;
ríu Byske (Byskeälven), na provincia de Norrbotten;
ríu Aby (Abyälven), en Norrbotten, con un llargor de 165 km;
ríu Pite (Piteälven), en Norrbotten, con un llargor de 400 km;
ríu Lule (Luleälven), en Norrbotten, con un llargor de 460,8 km;
ríu Råne (Råneälven), en Norrbotten;
ríu Kalix (Kalixälven), en Norrbotten, con un llargor de 460,6 km;
ríu Sangi (Sangisälven), en Norrbotten;

frontera Suecia-Finlandia:

ríu Torne (Torneälven), con un llargor de 570 km;

en Finlandia:

ríu Simojoki;
ríu Livojoki;
ríu Kiiminginjoki;
ríu Siikajoki;
ríu Pyhajoki;
ríu Kalajoki;
ríu Lestijoki;
ríu Pernhonjoki;

Especialidá culinaria

La parte sueca de la Badea de Botnia tien un archipiélagu grande onde se produz Kalix löjrom, una especialidá culinaria con Indicación Xeográfica Protexida de la XE (Kalix ye una ciudá sueca de la Badea de Botnia). Trátase básicamente de güeves de corégono blancu, pero por cuenta de la gran arribación d'agua duce de los ríos tresformóse'l sabor de los güevos de pexes, faciéndolos únicos en sabor nesta área.

Los ríos de la Laponia sueca son grandes y echen enormes cantidaes d'agua duce na Badea de Botnia, más de 40 millones de metros cúbicos al añu. Nel llau finlandés de la badea la entrada d'agua duce ye menor, el fondu ye de piedra y poco fondu, asina que nun ye una bona tierra de friega de corégono blancu. Kalix löjrom ye específicu de la parte sueca de la Badea de Botnia.

Referencies