پولونيا
پولونيا، رسميا لجمهورية د پولونيا (ب لپولونية: Rzeczpospolita Polska) هي بلاد لمساحة ديالها 312.696 كم² جات ف لوسط د ؤروپا، و مقسومة على 16 لإقليم. كاتحدّها ليتوانيا و روسيا من الشمال الشرقي، بيلاروسيا و أوكرانيا من الشرق، لبحر د لبلطيق من الشمال، صلوڤاكيا و التشيك من لجنوب، و ألمانيا من لغرب. لبلاد فيها طبيعة متنوعة داخلين فيها الجبال و لغابات و لبحورا.
لبلاصة اللي فيها پولونيا عندها تاريخ قديم و دازو عليها بزاف د لبلدان و لحضارات. أول مرّة اللي يقدر يتقال فيها باللي تجمعات فيها لبلاد ديال پولونيا كانت ف 966، و كانت ف نفس لوقت اللي دخلات فيه لمسيحية للمنطقة. ف 1025 تأسسات مملكة ف لبلاد، و كانت مدخّلة معاها ليتوانيا ف بلاد وحدة. هاد التحالف كان من أكبر لبلدان ف ؤروپا ف لقرون 16 و 17، و كانت أول بلاد أوروپية دارت دستور جديد (ف 3 ماي 1791). ف اللخر د لقرن 18 بدات هاد لبلاد لكبيرة تتقسم، و بزاف د لبلدان خداو منها طراف. من مورا لحرب لعالمية اللولا، ستاقلات لجمهورية د پولونيا، و ولاّت هي لبلاد اللي عندها لحدود ديال دابا. من 1939 ل 1989، تحكمات لبلاد بالنضام الشيوعي، و ملّي طاح دخلات للنضام الرأسمالي و وّلاو فيها لأحزاب بزاف، و دخلات ف لمرحلة د الديموقراطية.
تيسكنو ف پولونيا تقريبا 38.3 مليون د الناس و لعاصمة ديالها هي وارسو. اللغة الرسمية د لبلاد هي لپولونية، و لفلوس اللي كاتخدّم هي الزلوتي. لإقتصاد ديالها تيتطوّر مزيان (سادس أكبر قتصاد ف لإتحاد لأوروپي[1])، و فيها 16 موقع ديال الترات لعالمي ديال ليونيسكو. هي داخلة مع بزاف د لمنضمات دولية بحال لأمم لمتحدة و لإتحاد لأوروپي و الناطو و لمنضمة د التعاون لإقتصادي و التنمية، و لمنضمة لإقتصادية لأوروپية.
- ^ "بولندا: القوة الأوروبية القادم - نون بوست (2015)". مأرشيڤي من لأصل ف 2022-01-01. تطّالع عليه ب تاريخ 2021-05-25.
|
تقدر تزيد شوف بزاف د تّصاور و لمعلومات ديال Poland ف ويكيميديا كومنز. |