ويكيپيديا:زعم
يلا بانت ليك شي حاجة خاصها تّصلح ؤلا تّزاد، سوا ف لمحتوى بشكل عام، الصحة د لمعلومات، ؤلا لأسلوب د لكتابة، ماتحشمش، كون زاعم و بدّلها. ف شي عالم ميتالي، خاص جميع الناس لي كيقراو ويكيپيديا تكون عندهوم الزعامة و يعاونو ف تطوير لموسوعة باش تولي حسن ف لمضمون و ف الشكل، و يتزادو فيها لمعلومات و نستافدو منها جميع.
علاش هاد لمقال مامكتوبش مزيان؟ علاش هاد لفقرة فيها غير سطر؟ علاش الديزاين ديال هاد الصفحة عيّان؟ السؤال لي خاص بنادم بصّح يطرح على راسو هوّ "علاش مانوضش أنا نقاد داكشي لي خاصو يتقاد؟" السؤال و الشكوى ساهلين، ولاكين ماغاديش يتقاداو تا يتطوع شي حد باش يكتب و يصاوب و يطوّر، و علاش ماتكونش نتا هوّ داك الشخص؟
و تا يلا درتي تبديل و جا شي حد حيّد التبديلات ديالك، ماتقلقش! لكتاتبيا لخرين تاهوما بحالك بغاو ويكيپيديا تولي حسن، مي تقدر تكون عندهوم نضرة مختالفة على شنو كاتعني "حسن". ماتبقاش ساكت، و ماتديرش لمطايفة ف لكتابة. حل مداكرة جديدة ف الصفحة د لمداكرة ديال لمقال لي طاري فيه لموشكيل، و طاڭي الناس لمعنيين، باش تفهم وجهة د النظر ديالهوم، و تشرح وجهة النظر ديالك، و توصلو ل شي حل كيرضي كولشي. ديما فتارض نية مزيانة، يعني بلي الشخص لاخور ماناويش يدير التخريب ؤلا ماحاملكش ؤلا مضاد معاك بلعاني، مي بلي عندو نظرة مختالفة لي خاصك تحاول تفهمها و تّفهّمها، وخا ماتتافقش معاها.
دير ف بالك هاد لقضية: يلا ماعمّر شي تبديل ديالك مارجّعو شي حد، راك غالباً ماكاتزعمش بشكل كافي، و كاتبقى غير شاد ف جنب لحيط.
الزعامة عاوتان ماشي تبرير باش تنوّض مطايفة ف لكتابة، ؤلا تبدّل معلومات لي باينة بحال الشمش ف السما. يلا كان التبديل لي بغيتي تدير عندو علاقة معا لمحتوى، تيقّن معا راسك، و ف مصادر موتوقة بلي داكشي لي غادي تكتب عندو موتوقية عالية، و وتّقو مزيان ف لمقال. و من لأحسن توجّد مصادر خرين ف حالت يلا شي حد عتارض على التبديل ديالك، باش تناقش بيهوم. يلا كان التبديل عندو علاقة معا لفورما و الديزاين ديال الصفحة، شوف مقالات مشابهة و ب جودة مزيانة، و حاول تّبع نفس لفورما لي مديور تماك، ؤلا سوّل لكتاتبيا لي عندهوم خبرة كبيرة ف لموسوعة.