بيپولير
بيپولير
| ||
![]() | ||
معلومات عامة | ||
نوع | تقلاب مجاجي |
البيپولير (لفرانساوية: le bipolaire) هو مرضة نفسية كاتأثر على المجاج ديال الواحد. هاد المرض كان كيتسمى قبل "الهوس ليكتيئابي ". الناس لي عندهم هاد المرضة كيعيشو تڭليبات كبيرة ف المجاج ديالهم، من الفرحة الزايدة (لي كيسميوها هوس) للضيم الكبير (لي هو الاكتئاب).[1]
ليمارات ديال البيپولير كتختالف على حساب الحالة ديال المريض:
- فرحة زايدة بلا سبب
- حركة زايدة وطاقة كبيرة
- قلة النعاس
- أفكار زربانة
- كلام بزاف وبالزربة
- تصرفات بلا ميزان (بحال الشرا بزاف ولا السيكس بلا پروطيكس)[1]
- غبينة كبيرة ومستمرة
- ضياع الاهتمام بالأنشطة لي كانو كيعجبو المريض
- تبدال ف الشهية والوزن
- مشاكل ف النعاس (زيادة ولا نقصان)
- العيا وفقدان الطاقة
- صعوبة ف التركيز
- أفكار على الموت ولا الانتحار[1]
كاينين جوج نواع رئيسيين ديال البيپولير:
- النوع اللول: فيه كريزات هوس قاسحة و كريزات اكتئاب
- النوع الثاني: فيه كريزات هوس خفيفة (كيسميوها هوس خفيف) وكريزات اكتئاب[1]
مازال الأسباب الدقيقة ديال الاضطراب ثنائي القطب ماشي معروفة بالضبط، ولكن العولاما كيعتقدو بلي كاينين اسباب كتيرة كتساهم فيه:
- الوراثة: المرض كيمشي ف الفاميلات
- التركيبة الكيماوية ديال الدماغ: خرطات ف الناقلات العصبية
- الطانسيو والصدمات النفسية[1]
التشخيص كيتم عن طريق الطبيب النفسي، لي كيدير دياڭنوستيك شامل للمريض ويسولو على التاريخ الطبي ديالو وديال فاميلتو . خاص المريض يعيش كريز وحدة على الأقل ديال الهوس أو الهوس الخفيف باش يتشخص بالبيپولير .[1]
العلاج ديال البيپولير كيكون طويل وكادخل فيه:
- الدوايات : بحال مثبتات المجاج، ومضادات الاكتئاب، ومضادات الذهان
- العلاج النفسي: بحال العلاج المعرفي السلوكي
- تبدال فالنمط د المعيشة : بحال السيستيم الغذائي المتوازن، والسپور ، والنعاس المقاد
الموهيم هو المتابعة الدايمة مع الطبيب والالتزام بالعلاج حتى ف وقيتات الاستقرار.[1]
البيپولير مرض جدي، ولكن يمكن تحكم فيه بالعلاج المناسب والدعم. الوعي بهاد المرض مهم باش الناس لي كيعانيو منو يلقاو المساعدة لي محتاجينها ويعيشو حياة طبيعية وصحية.