Cambión
Un cambión[1][2][3] u cambrión[1] (d'o francés camion) ye un vehíclo motorizau disenyau pa o transporte de productos y mercaderías. A diferencia d'os autos, que gosan tener una construcción monocasco, muitos cambions se construyen sobre una estructura resistent dita chasis (bastida). A mayor parti d'a estructura ye integrada por un chasis portant, por un regular un marco estructural, una cabina y una estructura (u caixa) pa transportar a carga.
O vocablo cambión puet referir-se a dos vehíclos diferents: cambions richidos[4] y cambions articulaus.
- En os «cambions richidos» no se puet deseparar a caixa d'a cabina[5] (a on se sitúa a cabeza tractora); pueden tener dos u tres eixes.[6] Son disenyaus pa o transporte de carga relativament liviana y distancias curtas u meyas;[7] cheneralment, se fan servir pa o transporte de cargas menors, carga crebadiza... Son cambions richidos os cambions de reparto de muebles, articlos d'a casa, comestibles, aria d'a salut, vestuario, mudanzas, bombers, emerchencias, etc.
- Os «cambions articulaus» se composan de tractocambión y remolque u, mas a sobén, semirremolque; s'emplegan pa largas distancias y carga pesada, tanto de liquidos como material ixuto u a granel, como os cambions de transporte de combustible, cambions de fusta, cambions pa o transporte de contenedors[8] y caixas mobils.
Bi ha cuantas clasificacions de cambions: por o suyo peso, por o suyo volumen u capacidat de carga y por a función que fan. Bi ha cambions de tot tipo y de cuantas grandarias: chicotas (ordinarias), meyanas (cambions pa circular por tierra de 200 toneladas emplegaus en menería) y extragrans («trens de carretera»).
Os cambions s'han iu especializando y adoptando una serie de caracteristicas propias d'o treballo a o que son destinaus. Han evolucionau dende una simpla caixa —ubierta u zarrada—, dica formas mas complexas con disenyo y equipamientos especificos adecuaus a la materia que transportan: periglosa, liquida, refricherada, en chiro contino, con gruba, etcetra.
Referencias
[editar | modificar o codigo]- ↑ 1,0 1,1 (an) Diccionario aragonés-castellano-catalán. Versión preliminar. Estudio de Filología Aragonesa. Edacar num. 14. Zaragoza. Edicions Dichitals de l'Academia de l'Aragonés. ISSN 1988-8139. Octubre de 2024.
- ↑ (es) Francisco Bruballa Angusto Vocabulario del habla de La Puebla de Castro, Instituto de Estudios Altoaragoneses, 2009, ISBN 978-84-8127-214-7, p.35
- ↑ (es) José María Satué Sanromán Vocabulario de Sobrepuerto: léxico comentado de una comarca despoblada del Altoaragón, Instituto de Estudios Altoaragoneses, 1991, ISBN 84-86856-48-5, p.30
- ↑ Ye o cambión sensu stricto.
- ↑ (es) Mira Galiana y Soler García, 2010. O cambión puet estar richido, sin que se puedan deseparar os dos elementos y de modo que a carga reposa sobre o chasis.
- ↑ (es) Baena, 2002. Vehíclos d'estructura richida con dos u tres eixes.
- ↑ (es) Mira Galiana y Soler García, 2010. Por un regular, os cambions richidos de dica 20 toneladas recorren menos kilometros diarios y ye a on a relación tonelada/kilometro recorriu tamién ye menor.
- ↑ (es) Mira Galiana y Soler García, 2010. Ocurre o contrario cuan se tracta de cambions articulaus de mas de 20 toneladas. Ye decir, cuanto mayor ye a capacidat de carga, mayor ye o recorriu meyo d'a carga.
