Titus Tatius

de Raub vo de Sabinerine

De Titus Tatius isch e sabinische König und spööter de Mitregent vom Romulus gsii.

De Titus Tatius isch de König vo de sabinische Stadt Cures gsii. Nochem Raub vo de Sabinerine dör d Römer isch er miteme Heer gege Rom zoge. Well di graubte Fraue aber nöd hend wöle, as eri Vättere und Brüedere eri Mane tötet und umgchert, sind si zwösched di baide Truppe gfaare und hend so de Chrieg verhinderet. De Titus Tatius isch denn Mitkönig vom Romulus wore.

De Titus Tatius het de Kult vom Ianus und vom Volcanus iigfüert und d Priesterschaft vo de Titii sodales iigrichtet. Bimene Opferfest z Laurentum isch er umbrocht wore und deno ufem Aventin bigrabe wore. Sini Töchter Tatia isch di ersti Frau vom Numa Pompilius gsii, wo denn de Noofolger vom Titus Tatius woren isch.