Reitnou
Reitnou | |
---|---|
![]() | |
Basisdate | |
Staat: | Schwiiz |
Kanton: | Aargau (AG) |
Bezirk: | Zofige |
BFS-Nr.: | 4281 |
Poschtleitzahl: | 5056 Attelwil 5057 Reitnau |
Koordinate: | 645920 / 233462 |
Höchi: | 508 m ü. M. |
Flächi: | 7,98 km² |
Iiwohner: | 1583 (31. Dezämber 2022)[1] |
Website: | www.reitnau.ch |
![]() Reitnou | |
Charte | |
![]() |
Reitnou (amtlich Reitnau) isch e Gmeind im Bezirk Zofige vom Kanton Aargau.
Geografy
[ändere | Quälltäxt bearbeite]S Dorf Reitnou lyt im Suuretaal a dr Gränze zum Kanton Luzärn. Es stoot am Rand vo dr Ebeni und uf ere Moräne vom Gletscher us dr Yschzyt. S Land undedra a dr Suure isch s Suuremoos. Sid me d Suure ane 1923 in en grade Kanaal gleit het, isch das Gebiet Acherland. Im Weschte goot dr Gmeindbann übere Hügel bis is Üerketaal. D Strooss vo Reitnou i das Taal übere chunt oben a dr Moosersagi i das Taal abe. Uf em Hügelrugge am Hombärg sind Rodigsinsle mid de Puurehöf Grüterhof, Bärghof, Fäldlimoos und d Wüeschteburg.
S Dorf Attewiu isch ei Kilometer nördlech vom Zäntrum vo Reitnou. D Sidlige vo beidne Dörfer sind hüt zämegwachse.
Dr Suure noo goot di nazionali Welorute 3.
D Nochbergmeinde vo Reitnou sind – sid der Fusion mit Attewiu – Wilibärg und Staffelbach gäge Norde, Mooslerb im Oschte, Trienge im Süüde und Reide im Wiggertaal uf der Weschtsyte.
Gschicht
[ändere | Quälltäxt bearbeite]S Dorf isch als Reitinowa in ere Kwelle vo ane 1045 s erschte Mol erwäänt. Es isch en -Au-Name, wil s Dorf i der Nöchi vo der füechten Ebeni lyt.
D Chile vo der refermierte Pfarrei Attewiu-Wilibärg-Reitnou stoot uf ere Gländterrasse z Reitnou. Anne 1993 het mä archäologischi Räschten im Chileboden undersuecht, wo zeige, ass d Chile vo Reitnou scho im sibete Joorhundert als Eigechile vom ene Adelsgschlächt törft gründet worde sy;[2] der hüttig Bou isch usem 16. Joorhundert und der Chiledurm vo 1900. D Chile het mit em Dorf de Grafe vo Länzbrg ghört, wo d Ortschaft öppe 1045 em Chlooschter Schänis gschänkt händ. Im Middelalter isch s Dekanat Reitnou es grosses Gebiet vom Bischtum Konstanz gsi; s Land bis uf Aarau abe het derzue ghört. 1528 het Bärn au do d Refermazion duregsetzt.[3]
Sid 1965 git’s z Reitnou all Joor es Bärgrönne mit Rönnauto.[4]
Uf e 1. Jänner 2019 het sech d Gmeind Reitnou mit der alte Nochbergmeind Attewiu zämetoo; die nöi Gmeind heisst au Reitnou. Bschlosse worde isch die Fusion am 26. Novämber 2017 vo de Stimmberächtigte vo beidne Gmeinde.[5]
Literatur
[ändere | Quälltäxt bearbeite]- Christian Lüthi: Reitnau In: Historisches Lexikon vo dr Schwiiz.
Weblink
[ändere | Quälltäxt bearbeite]![](http://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
Fuessnoote
[ändere | Quälltäxt bearbeite]- ↑ Ständige Wohnbevölkerung nach Staatsangehörigkeitskategorie, Geschlecht und Gemeinde, definitive Jahresergebnisse, 2022. Bei späteren Gemeindefusionen Einwohnerzahlen aufgrund Stand 2022 zusammengefasst. Abruf am 5. September 2023
- ↑ Die Kirchen- und Baugeschichte uf ref-kirchen-ag.ch
- ↑ Die Kirche Reitnau uf ref-kirchen-ag.ch
- ↑ Bergrennen Reitnau (Memento vom 28. Novämber 2018 im Internet Archive) uf bergrennen-reitnau.ch
- ↑ Zwei Dörfer werden eins: Attelwil (hauchdünn) und Reitnau (deutlich) sagen Ja zur Fusion (Memento vom 30. Dezämber 2017 im Internet Archive) Artikel uf aargauerzeitung.ch vom 26. Novämber 2017