Pierre Leroux
![](http://upload.wikimedia.org/wikipedia/commons/thumb/e/eb/LerouxPierreStatueBoussac.jpg/220px-LerouxPierreStatueBoussac.jpg)
Dr Pierre Henri Leroux (* 17. April 1797 z Berri bi Bariis; † 11. April 1871 z Bariis) isch e franzöösische Filosoof und Sozialist gsi.
Lääbe und Wärk
[ändere | Quälltäxt bearbeite]Dr Leroux het Buechdrucker gleert, isch denn Schurnalist und Aahänger vom Henri de Saint-Simon worde und het 1824 s Schurnal Le Globe gründet, wo 1831 s Organ vo de Saint-Simoniste worde isch. Wo dr Enfantin dr Füerer vo de Saint-Simoniste worde isch, het er sich vo iirer Schuel drennt und brobiert, e nöis sozialistischs Süsteem uf d Füess z stelle.
Noch e baar Ardikel in dr Encyclopédie nouvelle (1841, 8 Bänd), won er mit em Jean Reynaud uusegee het, het er De l’égalité (1838), Réfutation de l’éclecticisme (1839), De l’humanité (1840, 2 Bänd; 2. Uflaag 1845) etc. uusegee. Din het er e Süsteem enworfe, won e konfuusi Reprodukzioon vo pythagoreische und buddhistische Leere gsi isch, vermischt mit Saint-Simonistische Ideä. 1841 het er mit dr George Sand d sozialistischi Revue indépendante gründet.
1846 het er e Konzessioon as Buechdrucker überchoo, het denn z Boussac (Creuse) e sozialistisch-gnossenschaftligi Buechdruckerei organisiert und gläitet, het zwäi nöiji Zitschrifte (L’Éclaireur und Revue sociale) uusegee und e Serii vo Broschüre gschriibe.
Noch em Usbruch vo dr Februarrevoluzioon 1848 het er z Boussac d Republik broklamiert und isch am 25. Februar Maire vom Ort worde. Spööter isch er in die konstituierendi und in die legislativi Versammlig gweelt worde, het sich dr radikale Bardei aagschlosse und isch dere iire Hauptredner worde.
1848 si von em verschiideni chliini sozialistischi Schrifte erschiine, under andere über e Normalarbetsdaag, d Organisazioon vo dr nazionale Aarbet, d Plutokratii, Malthus u.s.w. Er het au am demokratische Schurnal La République mitgschafft. Noch em Staatssträich vo 1852 isch er verbannt worde. Er het zerst lengeri Zit mit sinere Familie uf Jersey gläbt und vo dört die sozialfilosofischi Dichdig La Grève de Samarez veröffentligt. Spööter het er mäistens z Lausanne gwoont. 1860 het er en Amnestii nid aagnoo. Noch dr Amnestii vo 1869 isch er aber zrugg uf Frankriich und isch am 11. April 1871 z Bariis gstorbe.
Weblingg
[ändere | Quälltäxt bearbeite] Pierre Leroux im dütschsprochige Wikisource
![]() |
Dä Artikel basiert uff ere fräie Übersetzig vum Artikel „Pierre_Leroux“ vu de dütsche Wikipedia. E Liste vu de Autore un Versione isch do z finde. |