Parlamentarischi Republik

Dr Begriff parlamentarischi Republik bezieht sich vilmol uf die republikanischi Form vom parlamentarische Regierigssüsteem. Zum Däil wird si aber au zur allgemäine Klassifikazion von ere (semibresidenzielle) Republik mit eme Parlamänt verwändet, wo Bedütig het.

S schwizerische Parlamänt weelt dr Bundesroot (Im Bild dr Applaus vo dr Bundesversammlig noch dr Waal vom Bundesroot Didier Burkhalter), si legislativi Kompetänz isch aber wäge dr Möögligkäit vom ene Referendum iigschränggt.

Bin ere Republik mit eme parlamentarische Regierigssüsteem het s gweelte Staatsoberhaupt vor allem d Ufgoob, dr Staat gege dinne und dusse z representiere. D Stellig vom Regierigsschef, wo mäistens vom Parlamänt gweelt wird und wo denn d Minister vo sim Kabinett bestimmt, isch stark aber, im Gegesatz zum Bresidialsüsteem, vom Verdraue vom Parlamänt abhängig. S Brinzip, wo d Basis vo dere Machtverdäilig isch, isch dr Parlamentarismus.

Es git verschiideni Usbräägige, je nochdäm wo d Macht konzentriert isch. So cha dr Iifluss vo de bäide Exekutivorgan Regierig und Staatsoberhaupt öbbe gliich grooss si, wie z Italie oder in Östriich. Mä reedet denn vo Exekutivkooperazion. Wenn dr maassgääblig politisch Aktöör dr Regierigsschef isch, wie das in dr Bundesrepublik Dütschland vilmol dr Fall gsi isch, schwätzt mä von ere Kanzlerdemokratii. Bi dr Versammligsdominanz het s Parlamänt s Sääge, was hüte nume no sälte vorchunnt.

Dä Artikel basiert uff ere fräie Übersetzig vum Artikel „Parlamentarisches_Regierungssystem#Parlamentarische_Republik“ vu de dütsche Wikipedia. E Liste vu de Autore un Versione isch do z finde.