Em Bebbi sy Jazz
| Dialäkt: Baseldütsch |
Em Bebbi sy Jazz isch en äidäägigs Dschääsfest z Baasel, wo sit 1984 jeedes Joor im August stattfindet. Mit sine 50'000 bis 70'000 Bsuecher ghöört s zu de grösste Dschääsaaläss in dr Schwiz.[1][2] S Wort «Bebbi» im Naame isch dr Baasler Usdrugg für «Baasler».
Bim erste Em Bebbi sy Jazz im Joor 1984 häi 16 Grubbe an acht Blätz rund um s Hotel Basel Muusig gmacht. Hützudags si s mee as 70 Bänds, wo siibe Stunde lang an öbbe 30 Blätz vom säggsi am Oobe aa ufdräte.[3][4] E Hufe vo de Formazioone si us dr Regioon, won e Hoochburg vom Dschääs in dr Schwiz isch; aber au Grubbe us em öiropäische Usland und us Übersee si verdräte. Verschiideni Schaner vo Dschääs wärde gspiilt: Ragtime, Dixie, Bebop, Blues, Funk, Latin, Swing, e Bigband spiilt uf dr Määrtblatzbüüni am Roothuus, Gospelchör singe in Kiirche, Jazzrock- und Streetbands dräte uf öffentlige Blätz und in Gasse uf und Gläinstgrubbe in Lokaal und Innehööf.[5] Daas alles spiilt sich am Spaalebärg und drum ume ab, in dr Groossbaasler Altstadt zwüschen em Fischmäärt, Haibärg und Noodlebärg bis zur Lienerdskiirche. D Uffüerige si gratis und d Veraastaltig wird dur Sponsore, Gönner und Biidrääg vo de Bäize wo mitmache, finanziert. D Organisazioon isch bis hüte eerenamtlig. 2013 het dr Ärnst Mutschler d Läitig vom Festival abgee.[6]
Am Daag noch Em Bebbi sy Jazz het sich non e Dschääsaalass etabliert, d Benefizveraastaltig Em Bebbi sy Burgergmaind für e soziali Iirichdig, wo d Burgergmäind mithilft bim organisiere.[7]
Litratuur
[ändere | Quälltäxt bearbeite]- 25 Jahre Em Bebbi sy Jazz. In: B wie Basel (Spezialusgoob). Spalentor Verlag, Baasel, August 2008, S. 4-39.
Weblingg
[ändere | Quälltäxt bearbeite]- Website vo «Em Bebbi sy Jazz»
- «Em Bebbi sy Jazz» in dr Bilder-Datebangg vom Kanton Baasel-Stadt
- Basel Insider Website: Em Bebbi si Jazz
Fuessnoote
[ändere | Quälltäxt bearbeite]- ↑ Das Festival „Em Bebbi sy Jazz“ lockte wiederum Tausende aus dem In- und Ausland an. fricktal24.ch, 20. August 2006
- ↑ Basel als grosse Jazzbühne "Em Bebbi sy Jazz" im Anflug.... Basler Zeitung, 17. August 2011
- ↑ Basel swingt: «Em Bebbi sy Jazz». bazonline.ch, 16. August 2008
- ↑ JAZZfest im Basler Zentrum: Seit 27 Jahren nicht mehr wegzudenken. badische-zeitung.de, 13. August 2010
- ↑ «Letztlich ein bescheidener Anlass». Baslerstab online, 15. August 2012
- ↑ Em Bebby sy Jazz – Organisieren liegt mir im Blut in Tagewoche (2013)
- ↑ Benefizveranstaltung „Em Bebbi sy Burgergmaind“
|
Dä Artikel basiert uff ere fräie Übersetzig vum Artikel „Em_Bebbi_sy_Jazz“ vu de dütsche Wikipedia. E Liste vu de Autore un Versione isch do z finde. |