Agatho
![](http://upload.wikimedia.org/wikipedia/commons/0/0d/Agatho.png)
Dr Agatho (au Agathon, † 10. Jänner 681 z Rom) isch vu 678 bis zue sym Dood Paapscht un Bischof vu Rom gsii.
Lääbe un Wiirke
[ändere | Quälltäxt bearbeite]Är isch us Sizilie chuu un isch Mench woore. No dr Legänd het er drei Johr lang e Stai im Muul drait go schwyyge leere.
Am 27. Juni 678 isch er Noofolger vum Donus as Paapscht woore un het wytergmacht mit sällem syre Bolitik. Dr Agatho het s eso gschafft, d Stadt Ravenna, wu syter anne 666 unabhängig gsii isch, wider unter d Heerschaft vu dr Pääpscht z bringe.
S wiichtigscht, was in dr Zyt vu sym Pontifikat bassiert isch, isch, ass em Stryt um dr Monotheletismus en Änd het chenne gmacht wääre. Dr Chaiser Konstantin IV. het dr Paapscht Donus im Augschte 678 yyglaade ghaa, drei aigeni Verdrätter un zwelf Bischef uf Konstantinopel z sände, go dr Stryt zwische dr Monothelete, an dr Spitz d Patriarche vu Konstantinopel un Antiochia, un dr reemische Riichtig z leese, sälber het si dr Chaiser as neitraal gsääne. Wu s Schryybe abgange isch, isch dr Donus aber scho gstoorbe gsii. Sy Noofolger Agatho het statt däm e Synod vu dr ganze Weschtchilche veraastaltet, wu am 25. Merz 680 125 Bischef derzue uf Rom chuu sin. Dert het d Weschtchilche d Lehr vum zweefache Wille vum Jesus bsteetigt. En Abornig vu siibe Gaischtlige, doodrunter drei Bischef, un e baar Mench het des Ergeebnis em Chaiser solle mitdaile.
Bis doo isch dr Konstantin IV. en Aahänger vum Monotheletismus gsii, anne 680 het er sy Yystellig gänderet un het ere Verurdailig vum Monotheletismus zuegstimmt. Des isch unter anderem doodraa glääge, ass d Dail vum Ryych, wu die Glaubesriichtig am maischte verbraitet gsii isch (Egypte, Paleschtina un Syrie), dur Eroberige an d Araber verloore gange sin, derwylscht dr monotheletisch Patriarch Theodor dur dr romfryndli Georgios abgleest wooren isch. Dr Konstantin het derno gsait, dogmatischi Dischkussione seie us däm Grund iberflissig woore. Am 10. Septämber 680 het er dr ghaiße, ass e allgmaini Synod soll yygruefe wääre, wu scho am 7. Novämber unter sym Vorsitz im chaiserlige Palascht vu Konstantinopel ufgmacht woore un mit Unterbrich bis zum 16. Septämber 681 gangen isch. Dr Patriarch vu Antiochia, dr Makarios, e Monothelet, het sy Position mit Fälschige verdaidigt, wu vum Konzil ufdeckt woore sin, het d Abchehr verwaigeret un isch im Merz 681 as Chetzer abgsetzt woore.
Am 16. Septämber het s Konzil aistimmig d Verdammig vum Monotheletismus as Häresy bschlosse. Dr Agatho, wu am 10. Jänner gstoorbe gsii isch, het des nimi erläbt ghaa. Zum eerschte Mool isch au ne Paapscht, dr Honorius, wu si em Monotheletismus gegeniber konziliant zaigt ghaa het, mit em Anathema wäge Chetzerei verfluecht woore.
Sy kadoolische Mahndaag isch dr 10. Jänner, dr orthodox am 20. Februar.
Literatur
[ändere | Quälltäxt bearbeite]- E. Gorys: Lexikon der Heiligen. Deutscher Taschenbuch Verlag, München 1997, ISBN 3-423-32507-0.
- Friedrich Wilhelm Bautz: Agatho (Papst). In: Biographisch-Bibliographisches Kirchenlexikon (BBKL). Band 1, Hamm 1975, Sp. 54.
Weblink
[ändere | Quälltäxt bearbeite]![](http://upload.wikimedia.org/wikipedia/commons/thumb/4/4a/Commons-logo.svg/12px-Commons-logo.svg.png)
- Ytrag in d Catholic Encyclopedia, Robert Appleton Company, New York 1913 (änglisch)
- Agatho im Heiligenlexikon
Vorgänger | Amt | Nachfolger |
---|---|---|
Donus | Papscht 678–681 | Leo II. |
![]() |
Dä Artikel basiert uff ere fräie Übersetzig vu dere Version vum Artikel „Agatho_(Papst)“ vu de dütsche Wikipedia. E Liste vu de Autore un Versione isch do z finde. |