Hades
Dr Hades (altgriech. ᾍδης, Haidēs) isch in dr griechische Mythologii dr Ort vo de Dote, „d Underwält“, gsi. D Römer hai em Orcus gsait. Au dr Herrscher vo däm Doteriich het Hades gheisse.
![](http://upload.wikimedia.org/wikipedia/commons/thumb/d/d8/Hermes_Psykhopompos_Staatliche_Antikensammlungen_2797_n2.jpg/220px-Hermes_Psykhopompos_Staatliche_Antikensammlungen_2797_n2.jpg)
Dr Hades isch vo dr Wält vo de Läbige dur dr Fluss Styx drennt gsi. Dört het dr Fährima Charon uf die Dote gwartet und si gege Bezahlig über ä Fluss gfahre. Uf de andere Siite hai anderi Gwässer wie dr Kokytos, dr Pyriphlegethon, d Lethe und dr Acherusisch See, wo dr Acheron drii fliesst, d Gränze bildet. Dr Hades isch in zwei Gebiet iideilt gsi: dr Erebos, wo die gwöhnlige Dote anechömme, und dr Tartaros, wo d Titane, d Vorgänger vo de olympische Götter, iigschberrt gsi si. Schbööter isch dr Name „Tartaros“ fascht es Synonym für „Hades“ worde. D Underwält isch vom Kerberos, eme dreichöpfige Hund mit emä Dracheschwanz bewacht worde. Dr Balascht vom Gott vo dr Underwält, em Hades, isch ä Gebäud mit vile Düüre gsi, dunkel und voll vo Gescht. Es isch in dr Middi vo düschdere Fälder gschdande, wo Gschpängschder umegange si.
Dr Hades isch ä dunkle Ort gsi, wo die Dote nume es Schattedosii gha hai, und es het nur wenig glückligi Schdärbligi ge, wo nid dört ane hai müesse. Das si d Halbgötter gsi, wo wie dr Herakles mit de Götter uf em Olymp gläbt hend. Es het kai bsundrigi Höll ge für gwöhnligi bösi Mensche, nume ä baar bsundrigs Schlächti wie dr Sisyphos, dr Tantalos odr d Danaide, hai schbezielle ewigi Schdroofe übercho. Aber d Erinnye hai gwöhnlige Sünder s Läbe zur Höll gmacht. Erscht in schböötere Legände isch dr Hades än Ort worde, wo die Guete belohnt worde si und die Böse ä Schdrof übercho hai.
In dr griechische Übersetzig vom Alte Teschtament isch s Wort „Hades“ bruucht worde für zum s hebräische sheol (שאול) wiidrzgä.
Quelle
ändere- Dr Artikel "Hades" in Microsoft® Encarta® Encyclopedia 99. © 1993-1998 Microsoft Corporation
- Dr Artikel "Hades" in Encyclopædia Britannica. Ultimate Reference Suite. Chicago: Encyclopædia Britannica, 2008.