USS Yorktown (CV-5)

USS Yorktown in 1937

USS Yorktown (CV-5) was 'n vliegdekskip van die Amerikaanse Vloot wat tydens die Tweede Wêreldoorlog diens gedoen het. Die skip is na die Beleg van Yorktown van 1781 vernoem en is in diens gestel in 1937. Die skip is die eerste skip van die Yorktown-klas vliegdekskepe; daar is drie skepe in die klas gebou. Hulle was ontwerp op die lesse geleer uit die bou van die Lexington-klas vliegdekskepe (omgeskalelde kruisers) en die kleiner, doelgeboude USS Ranger (CV-4).

Die Yorktown was in die hawe by Norfolk tydens die aanval op Pearl Harbor net nadat dit 'n verkenningstog in die Atlantiese Oseaan voltooi het. Die skip het in laat in Desember 1941 na San Diego gevaar en daar die vlagskip van Taakmag 17 geword. Saam met die USS Lexington het hulle suksesvol Japannese skeepsvaart langs die ooskus van Nieu-Guinea aangeval, vroeg in Maart 1942. Vliegtuie van die Yorktown het ook verskeie skepe gekelder of beskadig gedurende die inval van Tulagi in Mei 1942. Daarna ontmoet sy die USS Lexington in die Koraalsee en hulle het probeer om die inval van Port Moresby, Papoea-Nieu-Guinee te verhoed. Hulle het die klein vliegdekskip Shoho gekelder op 7 Mei gedurende die Slag van die Koraalsee. Hulle het egter eers die Japannese hoofmag, bestaande uit die vliegdekskepe Shokaku en Zuikaku, die volgende dag ontmoet. Vliegtuie van die Lexington en Yorktown rig ernstige skade aan die Shokaku maar die Japannese rig ook ernstige skade aan die Lexington en skade aan die Yorktown aan. Die Lexington se bemanning het haar luike oopgemaak en laat sink om te verhoed dat sy in die hande van die Japannese val.

Die Yorktown kon daarin slaag om na Hawaii terug te keer. Die skade beraming daar het bepaal dat dit twee weke sou neem om die skade te herstel. Die Yorktown was egter terug in die see slegs 72 uur nadat sy die droogdok binnegegaan het, wat beteken het dat die skip reg vir die volgende konfrontasie met die Japannese was. Die Yorktown het 'n belangrike rol gespeel tydens die Slag van Midway. Sy vliegtuie het 'n groot rol gespeel in die keldering van twee van die Japannese vliegdekskepe en dit het twee teenaanvalle geabsorbeer wat andersins teen die USS Enterprise en USS Hornet gerig sou gewees het. Op 4 Junie, tydens die Slag van Midway, het Japannese vliegtuie die Yorktown uit aksie gestel. Sy het stoom verloor en met 23 grade oorgehel na bakboord. Daar was begin om die skip te berg en dit was op sleeptou geneem deur die mynveër USS Vireo. Laat in die middag van 6 Junie het die Japannese duikboot I-168 'n salvo torpedo's op die skepe gevuur, twee het die Yorktown getref en 'n derde die torpedojaer USS Hammann. Laasgenoemde het bystand krag aan die Yorktown verskaf. Enige verder berging pogings het vrugteloos blyk te wees en die Yorktown is ontruim en het op 7 Junie gesink. Die wrak van die skip in Mei 1998 deur Robert Ballard opgespoor.