USS Ranger (CV-4)

Die Ranger ter see in die 1930's

Die USS Ranger (CV-4) was 'n vliegdekskip wat tussen die twee Wêreldoorloë gebou is vir die Amerikaanse Vloot as die enigste skip van sy klas. Die Ranger is ontwerp en gebou, onderhewig aan beperkings van die Vlootverdrag van Washington. Dit is die eerste Amerikaanse skip wat ontwerp en gebou is as 'n vliegdekskip. Die Ranger was relatief klein, slegs 222,5 m lank en het maar 15 000 ton geweeg. Sy grootte en verplasing is nader aan Amerika se eerste vliegdekskip USS Langley (CV-1) as aan ander skepe. Die eiland-bobou was nie ingesluit in die oorspronklike ontwerp nie, maar is aangebring nadat die skip voltooi was.

Die Ranger was geag te stadig te wees vir diens in die Stille Oseaan-vloot se vliegdekskiptaakmag teen Japan en het die hele Tweede Wêreldoorlog in die Atlantiese Oseaan diens gedoen teen die Duitse Vloot, die Kriegsmarine, wat 'n swakker opponent was. Die Ranger het aan aksie deelgeneem in daardie front en onder andere lugondersteuning verskaf vir Operasie Torch. In Oktober 1943 het die skip deelgeneem aan Operasie Leader, lugaanvalle teen Duitse skeepsvervoer aan die kus van Noorweë. Die Ranger was as skroot verkoop in 1947.